Орчин үед хүмүүс жижиг гэлтгүй бүхий л зүйлст ач холбогдол өгч нэгээхэн зүйл ч орхигдуулалгүй өөрсдийн амьдрах орчноо бүрдүүлж буй билээ. Тэгвэл айл гэрт байх ёстой тавилгын нэгээр яалт ч үгүй дарсны тавиур багтах болжээ. Тийм ч учраас хүмүүс гал тогооны тавилганыхаа жижиг хэсэгт дарсны тавиур төлөвлөсөн байдаг бол зарим нь бүр дарсны өрөөтэй ч байдаг. Иймээс минимал эмх цэгцтэй байдлыг эрхэмлэгч гэр бүлд зориулан жижиг хэмжээтэй дарсны тавиур хийх аргыг танилцуулж байна. 

Ашиглагдах материал: 

●    Фанер 

●    Тавиурны хөл болгох нарс мод 

●    Модон эрэг, шураг

●    Гар хөрөө

●    Өрөмдөгч 

●    Нүх гаргагч

Бидний хийх дарсны тавиурын хэмжээ нь 24*12*18см хэмжээтэй. Та тухайн тавиураа гэрийнхээ хаана тавихаас шалтгаалан хэмжээгээ эхлээд тооцоолоорой. 

Алхам 1: Фанерыг хөрөөдөх

24*12*18см хэмжээгээрээ тооцоолж хажуу, дээд, доод хавтангуудаа бэлтгэнэ. Үүнд та гар хөрөө эсвэл цахилгаан хөрөө ашиглаж болох бөгөөд эсвэл барилгын материалын дэлгүүрт очин хөрөөдүүлж бэлтгэх боломжтой юм.

Алхам 2: Дарс багтах нүхэн хэмжээстүүд 

Хийж буй хэмжээсийн дагуу 9 цооног, 3 хажуу талын хавтан, уртаашаа 4 хавтанг хэмжин тооцоолно. Энэ нь таны хийж буй дарсны тавиурын хэмжээсээс шалтгаалан өөр өөр байх тул өөрийн тооцолсны дагуу хэмжээсээ нарийн хэмжиж бэлтгээрэй. 

Алхам 3: Нүхэн хэмжээстүүдийг хөрөөдөх 

Дээрх хэмжээсийн дагуу 10 см диаметртэй цооног нүх бэлтгэж түүнийгээ хөрөөдөх. 

Түүнчлэн шүүгээгээ илүү гоёмсог болгохыг хүсвэл дээр нь сийлбэр хийх боломжтой төдийгүй өөрийн гэрийн интерьерт тохируулан өнгөө сонгохыг зөвлөж байна. Мөн тухайн шүүгээ нь гэрийн бага орон зайг эзлэх учраас тод өнгө сонгох нь төдийлөн зөв сонголт биш болов уу! 

Алхам 4: Тавиурын хөл бэлтгэх 

Эцэст нь шүүгээний хөл хийх үлдлээ. Шүүгээний эх бие нь жижиг хэмжээтэй учраас урт хөл зохимжгүй. Тиймээс 20см урттай байхад хангалттай. Шүүгээний даацын хэмжээг тооцоолон нарс модоор хөл хийхээр сонгосон бөгөөд дугуй хэлбэртэй хөлөө бэлтгэн эх биетэй нийлэх хэсэгт модон шураг тогтоон байрлуулаад шүүгээ бэлэн боллоо. Та үүнийг унтлагын өрөөнийхөө нэг хэсэгт байрлуулахад ч болох юм. 

Харин одоо жинхэнэ дарсыг мэддэг, мэдэрдэг хүмүүсдээ зориулсан нэг өрөөндөө дизайн гарган дарсаа байршуулах санааг хуваалцъя. 

Ашиглагдах материал: 

●    Хөнгөнцагаан эсвэл цэвэр төмөр. Энэ нь дарс тогтоох гол материал байх бөгөөд та үүндээ бэлэн материал ч ашиглах боломжтой юм. 

●    Ойролцоогоор 27 см урттай дөрвөлжин хавтан

●    2 × 4 ширхэг мод 

●    Зүлгүүр

●    Өрөмдлөг

●    Мод будахад зориулагдсан цэвэр алчуур эсвэл багс

●    Эрэг шураг

●    Шүршигч будаг (Өөрийн хүссэн өнгө)

Ашиглагдах материалаа бэлдэхээс өмнө та ханандаа ямар хэмжээтэйг, хэдий хэр урт үргэжлэхийг шийдээрэй. Үүний дараагаар материалаа авч, хэмжээгээ тооцолбол хялбар байх болно. Мөн нэг дарсанд 2 уян материалтай хаалт байх ёстой гэдгийг санаарай. 

Алхам 1

Хамгийн эхний алхам бол хананд тогтоох суурь модоо бэлтгэх явц юм. Тухайн мод нь дарс байрлах хананы хэмжээ болон таны хүссэн хэмжээнээс шалтгаалж өөр өөр байна. Мөн тухайн модоо сайтар зүлгэж цэвэрлэсний дараа дараагийн алхмаа хийх нь зүйтэй. 

Алхам 2

Модоо сайтар цэвэрлэж зүлгэсний дараа өөрийн хүссэн өнгөөр будаарай. Танай гэрийн интерьер дизайны өнгө ямар байхаас шалтгаалж хананд тогтоох суурь модныхоо өнгийг тооцоолоорой. Тус зааварчилгаагаар модыг будахдаа модонд өнгө оруулагч будаг ашигласан болно. 

Модны өнгө оруулагч будаг нь дараах байдлаар маш олон өнгөний сонголт байдаг бөгөөд та модоо будахдаа дараах өнгөнөөс сонгон ашиглаж болох нь ээ. 

Бид тухайн модны өнгө оруулагчаа цэвэрхэн алчуураар болон багс ашиглан будах боломжтой. 

Алхам 3

Дараа нь дарсаа тогтоох хамгийн чухал материал болох хөнгөн цагаан эсвэл төмрөө гулзайлган дарс тогтох хэлбэртэй болгон өөрчилнө. Дараах зааварчилгаагаар модонд хөшүүрдэж хөнгөн цагаанаа хэвэнд оруулсан болно. 

Ийнхүү хэлбэрт оруулсныхаа дараа өөрийн гаргасан дизайндаа тохируулан будаарай.

Алхам 4

Алхам 2-т хийсэн суурь модны будаг хатсан бол дарсны бэхэлгээг хийх цаг боллоо. Дарс тогтоох хөнгөн цагаан металаа хэлбэрт орсон янзаар нь модон дээр нь тавиад дарс болгонд 2 тогтоогч байхаар төлөвлөн хийнэ. Эхний байдлаар тогтоосны дараагаар дарсыг дааж байгаа эсэхийг шалгаарай. Хэрэв  тогтоогчид бие биендээ хэт ойртох юм бол лонх нэг талдаа хазайж болно гэдгийг санаарай. 

Хоорондын зайг олж, даацыг шалгасны дараа дарс тогтоох хаалтаа өрөмдлөг ашиглан суурь модондоо байршуулж, нэг эгнээнд хоёр хаалт байхаар өрөмдөх хэрэгтэй.

Алхам 5

Хамгийн сүүлд дарсны тавиураа ханандаа тогтооцгооё. Та хананд тогтоохдоо шууд өрөмдөж тогтоох боломжтой. Мөн тухайн тавиур нь дарсаар дүүрсэн үед хүнд болохыг санаж мэргэжлийн хүний тусламж авахад ч илүүдэхгүй. 

Түүнчлэн илүү загварлаг дизайнтай болгохыг хүсвэл орчин үеийн шийдэл болох гэрлийг ашиглаж суурь модны цаана тавьж өгөөрэй. Ингээд бидний зорьсон хоёр төрлийн дизайнтай дарсны тавиур бий боллоо.