Чингэлтэй дүүргийн Иргэний хэргийн анхан шатны шүүхэд иргэн Л.Д өөрийн төрсөн ах Л.Б -д бэлэглэлийн гэрээгээр өгсөн орон сууцаа буцаан авахаар гэрээг хүчингүйд тооцуулах тухай нэхэмжлэлийн шаардлага гаргасан байна.

Л.Д шүүх хуралдаанд гаргасан нэхэмжлэлдээ: Бид 2017 оны 03 дугаар сарын 17-ны өдөр Чингэлтэй дүүргийн ..............хороо, .......... байр, 12 тоот хаягт байрлах 32 м.кв талбай бүхий 2 өрөө орон сууцны өмчлөх эрхийг бэлэглэлийн гэрээгээр Л.Б-д шилжүүлсэн. Бэлэглэлийн гэрээгээр шилжүүлсэн орон сууц нь бидний аав, ээжийн амьдарч байсан гал голомт учраас Л.Д -д шилжүүлэхдээ бусдын өмчлөлд шилжүүлэхгүй, хамтран өмчлөгч нэмэхгүй гэж ярилцаж тохиролцсон. Гэтэл Л.Б нь эхнэр Г.Мөнхцэцэгийг орон сууцны хамтран өмчлөгчөөр бүртгүүлсэн байсан. Л.Б нь 2020 оны 9 дүгээр сараас эхнэр Г.М- ээс тусдаа амьдарч эцэг эхийнхээ гал голомтыг бусдад алдах нөхцөл байдал үүсээд байгаа тул бэлэг хүлээн авагч нь бэлэглэгчтэй харилцан тохиролцсон тохиролцоондоо хүрэлгүй бэлэглэгчийг ноцтой гомдоосон гэх үндэслэлээр орон сууцыг буцаан авахаар болсон. Тус орон сууцанд одоо Г.Мөнхцэцэг амьдарч, ах Л.Б маань найзындаа амьдарч байна. Иймд 2017 оны 08 дугаар сарын 17-ны өдөр байгуулагдсан Орон сууцны бэлэглэлийн гэрээг хүчингүй болгож өгнө үү гэв.

Хариуцагч Л.Б шүүхэд болон шүүх хуралдаанд гаргасан тайлбартаа: Дүү нараасаа бусдын өмчлөлд шилжүүлэхгүй, хамтран өмчлөгч нэмэхгүй, аав ээжийн гал голомтыг авч явж чадна гэдэг амлалт өгч дээр орон сууцыг өөрийн нэр дээр шилжүүлж авсан. Шилжүүлж аваад сар ч бололгүй 2017 оны 09 дүгээр сарын 11-ний өдөр эхнэр Г.М-ийн нэрийг орон сууцны хамтран өмчлөгчөөр шилжүүлж нэмүүлсэн. Дүү нар ч удалгүй гадаад руу явсан. Анх өгсөн амлалт болох аав, ээжийн гал голомтдоо өмчлөгч нэмэхгүй гэдгээ зөрчсөн. Нэгэнт өгсөн амлалтаа зөрчиж дүү нарынхаа итгэлийг алдсан тул бэлэглэлийн гэрээг хүчингүй болгохыг зөвшөөрч байна. Эхнэр Г.М-ээс 2020 оны 9 дүгээр сараас тусдаа амьдарч байна. Орон сууцыг дүү нартаа буцаан өгч эхнэр Г.М-тэй цаашид тусдаа амьдрах бодолтой байгаа гэв.

Шүүхийн хэлэлцүүлэгт зохигчдын тайлбар, хэрэгт авагдсан бичгийн нотлох баримтуудыг шинжлэн судлаад 

ҮНДЭСЛЭХ нь:

Шүүх нэхэмжлэлийг бүхэлд нь хэрэгсэхгүй болгох үндэстэй гэж үзлээ.

... Бэлэглэлийн гэрээгээр бэлэглэгч нь бэлэг хүлээн авагчийн зөвшөөрснөөр түүний өмчлөлд тодорхой хөрөнгө хариу төлбөргүй шилжүүлнэ. Хуулиар тогтоосон хэлбэрээр гэрээ хийснээр өмчлөх эрх үүсдэг хөрөнгийн хувьд бэлэглэлийн гэрээг тухайн хэлбэрээр хийнэ. Иймд 2017 оны 08 дугаар сарын 17-ны өдрийн бэлэглэлийн гэрээг Иргэний хуулийн 276 дугаар зүйлийн 276.1, 276.3 дахь хэсэгт нийцсэн хүчин төгөлдөр гэрээ гэж үзнэ.

... Талуудын хооронд 2017 оны 08 дугаар сарын 17-ны өдөр байгуулсан Орон сууц бэлэглэлийн гэрээний

 1-т Бэлэглэгч Л.Д би, бэлэг хүлээн авагч Л.Бын өмчлөлд өөрийн өмчлөлийн  дүүрэг,  хороо, 1 дүгээр,1 байр 12 тоот орон сууц өмчлөх эрхийн улсын бүртгэлийн Ү- дугаар бүхий 32 м.кв, 2 өрөө 100,000,000 төгрөгийн үнэ бүхий орон сууцыг хариу төлбөргүй бэлэглэж байна.

2-т Энэ гэрээ нотариатчаар гэрчлэгдэн, Үл хөдлөх эд хөрөнгийн бүртгэлийн газарт бүртгүүлснээр хүчин төгөлдөр болно.

3-т Үл хөдлөх эд хөрөнгийн бүртгэлийн газраас бэлэг хүлээн авагч Л.Б т орон сууц өмчлөх эрхийн гэрчилгээ олгосноор бэлэг хүлээн авагчийн өмчлөх эрх үүснэ гэж харилцан тохиролцож, гарын үсэг зурж, нотариатчаар гэрчлүүлсэн байна. /хх-ийн 8 тал/

Бэлэг хүлээн авагч Л.Б  тус орон сууцны хууль ёсны өмчлөгч болжээ. Иргэний хуулийн 101 дүгээр зүйлийн 101.1 дэх хэсэгт зааснаар өмчлөгч нь бусад этгээдэд хууль буюу гэрээгээр олгогдсон эрхийг зөрчихгүйгээр, хуулиар тогтоосон хэмжээ, хязгаарын дотор өмчлөлийн зүйлээ өөрийн үзэмжээр чөлөөтэй эзэмшиж, ашиглаж, захиран зарцуулах бөгөөд аливаа халдлагаас хамгаалах эрхтэй байна.

Дээрх орон сууцны хууль ёсны өмчлөгч Л.Б нь эхнэр Г.Мөнхцэцэгийг хамтран өмчлөгчөөр 2017 оны 09 дүгээр сарын 06-ны өдөр нэмж бүртгүүлэн гэрчилгээ олгогдсон нь бэлэглэлийн гэрээг хүчингүй болгох үндэслэлд хамаарахгүй.

Бэлэг хүлээн авагч Л.Б нь бэлэглэгчтэй орон сууцны өмчлөх эрхийг бусдын өмчлөлд шилжүүлэхгүй, хамтран өмчлөгч нэмэхгүй гэж харилцан тохиролцсон тохиролцоондоо хүрэлгүй, эцэг эхийнхээ гал голомтыг бусдад шилжүүлж бэлэглэгчийг ноцтой гомдоосон ноцтой үйлдэл хийсэн гэж маргасан боловч тус гэрээний Нэмэлт нөхцөл хэсэгт бичилт хийгдээгүй, талууд болзол заасан нь хэрэгт авагдсан баримтаар тогтоогдоогүй.

Иргэний хуулийн 280 дугаар зүйлийн 280.3 дахь хэсэгт бэлэглэлийг хүчингүй болгох шаардах эрх үүссэнээс хойш 1 жил өнгөрсөн бол бэлэглэлийг хүчингүй болгож болохгүй гэж заасан байх ба бэлэглэгч нар бэлэглэлийн гэрээнд болзол заагаагүй, бэлэг хүлээн авагч Л.Б дээрх эд хөрөнгийг хууль ёсны дагуу өмчлөгч болсноос хойш 3 жилийн хугацаа өнгөрсөн байна.

Иймд хариуцагч Л.Бт холбогдох бэлэглэлийн гэрээг хүчингүй болгох тухай Л.Д-ийн нэхэмжлэлийг бүхэлд нь хэрэгсэхгүй болгох үндэслэлтэй.

ТОГТООХ нь:

1.Иргэний хуулийн 280 дугаар зүйлийн 280.1.1 дэх хэсэгт заасан үндэслэл тогтоогдоогүй тул хариуцагч Л.Б т холбогдох бэлэглэлийн гэрээг хүчингүй болгох тухай Л.Д-ийн нэхэмжлэлийг бүхэлд нь хэрэгсэхгүй болгосугай.

 Эх сурвалж: Shuukh.mn