Барилгын салбартай холбоотой мэдээ мэдээлэл, судалгаа, салбартаа нэр хүндтэй зочдын ярилцлага, мэргэжилтний зөвлөгөө, шинэ орон сууц, барилгын материалын үнэ ханшийн судалгаа сар бүр, ажил гүйцэтгэлийн үнэлгээ улирал бүр шинэчлэн гаргадаг Барилга МН сэтгүүлийн гуравдугаар сарын дугаар уншигчдадаа хүрч эхэллээ. 

Энэ удаагийн нүүр хуудсанд Keller Williams хамтран ажиллаа. 

Шинэ дугаарт гарсан онцлох булангуудаас товч танилцуулбал,

VIP ЗОЧИН: Барилгын салбарт эрдэнэ мэт гялалзах цөөн хэдэн эмэгтэй инженер, удирдагчдийн нэг, “Гурван бухат” ХХК-ийг үүсгэн байгуулагч Т.Ганчимэгийг энэ удаагийн зочин хоймортоо урилаа. Тэрээр бизнесийн салбарт унаж, босож бүхнийг тэгээс эхлүүлсэн ч өдгөө салбартаа 8 охин компанитай, үндсэн болон туслан гүйцэтгэгч нийлээд 1000 орчим ажилтантай томоохон компанийг босгожээ. Түүний ололт амжилт, хийж бүтээж буй ажлууд, барилгын салбарын өнөөгийн болон хэтийн төлөвийн талаар ийн ярилцлаа. 

НИЙТЛЭЛ: Байгалийн эрс тэс уур амьсгалын нөлөөгөөр уран барилгын багана будаг ховхрох, хөндийрөх, гандах, толботох, давсжих, хөгц мөөгөнцөр ургах гэх мэт гэмтэл үүсдэг. Мөн уран барилгын суурь эд ангийг бүрдүүлэгч чулуу, тоосго, шавар, мод гэх мэт материалууд нь байгалийн аливаа үзэгдэл, физик, химийн нөлөөнд өртөж гэмтэж байдаг. Эдгээр гэмтлийн шалтгаан, механизмыг тодорхойлолгүйгээр хадгалалт хамгаалалт, сэргээн засварлалтын цаашдын арга хэмжээ авахад тун хүндрэлтэй юм…

ЯРИЛЦЛАГА: Үл хөдлөх хөрөнгийн зах зээл нь хүн болгоны анхаарлыг татаж, амьдралд нь томоохон нөлөөллийг үзүүлж байдаг төдийгүй эдийн засгийн гол хөдөлгөгч хүч, мөнгөний томоохон урсгалыг бий болгож байдаг салбаруудын нэг билээ. Тус салбар нь үйл ажиллагаа эрхлэх тусгай зөвшөөрөл, эрх олголт, бүртгэлийн журамтай болсноор салбарын зах зээл тасралтгүй тэлсээр байна. Тиймээс үл хөдлөх хөрөнгө зуучийн чиглэлээр үйл ажиллагаа явуулдаг Монголдоо отгон франчайз Keller Williams - ийн захирал Л.Одсүрэнг урьж, үл хөдлөх хөрөнгийн зах зээлийн талаар ярилцлаа. 

АМИНЫ ОРОН СУУЦ: Сүүлийн жилүүдэд Монгол орны газар хөдлөлтийн идэвхжил ихээр нэмэгдэж олон удаагийн давтамжтай газар хөдлөлт бүртгэгдэж байна. Иймд Гамшигт тэсвэртэй, эрчим хүчний хэмнэлттэй, норм, дүрэм, стандартын шаардлага хангасан, орчин үеийн амьдралын тав тухыг хангасан нэг маягийн загвар зургийг боловсруулан шинээр амины орон сууц барьж байгаа иргэн, хуулийн этгээдэд үнэ төлбөргүй ашиглуулж, барилгын чанар, аюулгүй байдлыг хангуулахаар Өрөгт бүтээц болон Төмөрбетон бүтээцтэй 1 давхар 40.0м2, 60.0м2, 80.0м2, 2 давхар 100.0м2, 120.0м2  талбайтай ажлын зургийг танилцуулж байна. Бид онцлох загваруудыг Амины орон сууц-ны булангаар дамжуулан цувралаар хүргэж байгаа бөгөөд дэлгэрэнгүй зураг төслийг barilga.mn платформын Номын сан цэснээс харах боломжтой. 

ДУУЛГАХ СОНИН: Заха Хадид архитекторын бас нэгэн гайхалтай бүтээл биежиж 2023 оны онцлох барилгуудын нэг болоод байгаа билээ. Тухайн бүтээл нь БНХАУ-ын Жухай хотын Жинван дүүрэгт байрлах бөгөөд нүүдлийн шувууд тэнгэрт нисэж буй хэлбэртэй соёл урлагийн төв юм. Тухайн соёл урлагийн төв нь 100 мянган метр квадрат талбайтай, 270 м*170 м хэмжээтэй, 35 м өндөртэй ба соёл, эрдэм шинжилгээний болон худалдааны шинэ дэд бүтцийг бий болгожээ. Үүнд 1200 хүний суудалтай урлагийн театр, 500 хүний суудалтай олон үйлдэлт  Black box театр, интерактив шинжлэх ухааны төв, урлагийн музей тус тус багтжээ.     

МЭРГЭЖИЛТНИЙ ҮГ: Манай оронд барилгын модон бүтээцэд БНбД 54 – 01 – 21 “Модон бүтээцийн төсөллөлт”, угсралтын ажил гүйцэтгэхэд зориулсан БНбД 54 – 02 – 05 “Модон бүтээц” норм ба  дүрмүүдийг мөрдөж байна. “Модон бүтээцийн төсөллөлт” БНбД 54-01-21 норм ба дүрэм нь 2021 онд шинэчлэгдэн мөрдөгдөж байгаа билээ… 

Эдгээр булангуудаас гадна хууль эрх зүй, та чадна, монгол уран бүтээлч гэх зэрэг булангууд маань шинэ мэдээ мэдээллээр дүүрэн байгаа.  

СЭТГҮҮЛ ЗАХИАЛАХ 

Онлайн унших: Номын сан

Утас: 9100-0233, 7711-3333-2