Таны гэр зай багатай байж болно. Гэвч илүү дутуу зүйлгүй, маш цэвэрхэн байвал илүү гоёмсог харагддаг. Мөн заавал үнэтэй тавилга, эд материал худалдаж авахын оронд зарим зүйлсийг өөрийн гараар урлаж хийснээр дахин давтагдашгүй, цор ганц бүтээл амилах болно. Ийнхүү та бүхэндээ зай багатай байрыг хэрхэн тохижуулах, мөн өөрийн гараар хийж болох гоёмсог зүйлийн санааг хүргэж байна.

Хэрэглэгдэх материал

    ●    1- 2 см x 4 см x 10 см хэмжээтэй мод 

    ●    Модны цавуу

    ●    Хадаас 

    ●    Алх

    ●    Метр

    ●    Хавчаар

    ●    Ширээний хөрөө (эсвэл туузан хөрөө)

    ●    Гар хөрөө

    ●    Зүлгүүр

    ●    Өнгөлгөөний лак

    ●    Будаг 

    ●    Дэгээ өлгүүр

Алхам 1: Хавтанг  бэлдэх.

Хавтанг бэлдэхийн тулд 2х4 хэмжээтэй модыг ⅜ инч зузаантай зүснэ. Модыг зүсэхийн тулд урт байгаа модоо хөрөө ашиглан богино болгоно. Модоо богино болгосоноор ирмэгүүдийг тэгшилэхэд хялбар болох бөгөөд ирмэгүүдийг хөрөөгөөр тэгшлэхийн тулд чанга баригч хавчаараар тэгш хэмийг тохируулан бэлдэнэ.

Хавтанг дараах хэмжээсүүдийн дагуу хавтан бүрийг зүсэж авна.

10 см x 3см x 23 см  Хайрцагны ар талын хавтангууд

2 см x 3 см x 31см  Дээд талын тавиур

2 см x 3 см x 18 см  Хайрцагны хажуу талууд

2 см x 3 см x 19 см Хайрцагны хэвтээ тасалгаа

1 см x 3см x 6 см Тавиурны босоо тасалгаа 

Алхам 2: Хавтанг цавуугаар холбоход бэлдэх

Хавтангуудыг цавуугаар холбож наахын өмнө маш сайн цэвэрлэх хэрэгтэй.  Хэмжээсийн дагуу зүссэн моднууд барзгар энд тэнд нь толбо үүссэн байдаг учир тэдгээрийг тэгшлэх шаардлагатай. Иймээс бэлдсэн моднуудыг зүлгүүрээр зүлгүүрдэж сайтар цэвэрлэнэ. Зориулалтын зүлгүүрийн аппарат энэ ажиллагааг хийхэд цаг хэмнэж илүү хялбар байх боломжийг олгох бөгөөд танд зүлгүүрийн аппарат байхгүй бол зузаан гар зүлгүүрээр зүлгэж тэгшлээрэй.  Мөн хавтанг угсарахаас өмнө будах ажлыг эхлээд хийхийг зөвлөж байна. Та өөрийн хүссэн өнгөөр хайрцгийг будаарай. Хайрцгийг будахдаа бусад тавилганы өнгөтэй хослуулан өөрийн хүслээр дизайндаа тохируулан гаргах нь зөв. Бас нэг сонголт нь модыг байгалийн өнгөөр нь үлдээж зөвхөн лакаар өнгөлж болно. 

Алхам 3. Хайрцгийг угсрах 

Арын хавтангуудыг сайтар цавуудан хооронд нь холбож хайрцагны арын хэсгийг бэлдэнэ. Цавууг түрхэж холбосноос хойш 2-3 цаг модны бэхлэгч хавчаараар хавчиж хооронд нь сайтар бэхэлж бат бөх болгоно. Цавуу хатсаны дараа хайрцагны талуудыг холбоно. Хайрцагны ар дээр талуудыг байрлуулан цавуугаар тогтооно. Тогтоосны дараа хүрээнүүдийн дагуу хайрцагны ар талаас нь хадаасаар хадаж бэхлэж өгнө. 

Дараа нь хүрээнүүдэд бэлдсэн тавиур тасалгаагаа холбоно. Ингэхдээ бас хүрээг ар талтай холбосонтой адил үйлдлээр буюу эхлээд цавуугаа түрхэж холбоод дараа ар талаас нь хадаасаар хадаж бэхэлж өгнө. 

Алхам 4: Дээд тавиур ба дэгээг бэлтгэх

Дээд тал нь хайрцагнаас үл ялиг илүү гарсан хэмжээтэй байх бөгөөд хананд хайрцгийг байрлуулсаны дараа дээд талаа суурилуулах юм. Дараа нь өлгүүрийг байрлуулж хадна. Өлгүүрний хоорондын зай, төрөл, тоо загварыг таны сонголт байх болно. Ингээд бид энгийн хэрнээ хэрэгцээтэй зүйлээ хийж чадлаа.