Монгол Улсад барилгын салбар үүсч хөгжсөн 85 жилийн түүхт ойн нэрэмжит Улс, аймаг, цэргийн алдар цолтой хүчит 128 бөхийн барилдаан болоод баярын ёслолын үйл ажиллагаа 9-р сарын 2-ны 15 цагт Монгол бөхийн өргөөнд зохиогдох гэж байна. Тус бөхийн барилдааныг Улс орныхоо хөгжил цэцэглэлтийн эн тэргүүнд явдаг барилгын  салбарынхан болон МҮБХ хамтран зохион байгуулж байгаа бөгөөд түрүү бөхийг 5 сая төгрөг, үзүүрлэсэн бөхийг 2 сая 500 мянган төгрөгийн бай шагналаар урамшуулахаар болжээ. Энэхүү үйл ажиллагааны хөтөлбөрт урлагийн тоглолт, барилгын салбарын шилдэгүүдэд шагнал гардуулах ёслол гэх мэт зүйлүүд багтсан аж. Сонирхуулахад өнгөрсөн жилийн барилдааны түрүү бөхөөр Архангай аймгийн Хашаат сумын харьяат, Уулын Баяжуулах Эрдэнэт үйлдвэрийн бөх Улсын заан Ч.Санжаадамба түрүүлж, Говь-Алтай аймгийн Чандмань сумын уугуул “Хүч” спорт хороо, “Туушин” компанийн бөх Улсын гарьд Н.Ганбаатар үзүүрлэж байсан. Харин Их шөвөгт Булган аймгийн Бүрэгхангай сумын харьяат ах дүү заанууд шалгарч байсан билээ. Энэ жил хоёр дахь удаагаа зохиогдож буй уг бөхийн барилдааны Ерөнхий ивээн тэтгэгчээр “Их Үйлсийн эрэлд” ХХК ажиллаж байна. Бөхөд хорхойтой хэн бүхэн барилгын салбар үүсч хөгжсөний 85 жилийн ойн бөхийн барилдаанд өргөнөөр хүрэлцэн ирж, хэн түрүүлж, үзүүрлэхийг шимтэн үзээрэй.

Лавлах утас: 9990-7815 (Хариуцсан Менежер Цэвэлсүрэн)