2024 онд барилгын салбарын чиг хандлагыг CMS /construction Management Software/, BIM /Building information modeling/, дрон,  0 дулаан алдагдалтай барилга, “3D print” -ын технологи, Роботууд ба автоматжуулалт, сэргээгдэх эрчим хүч, аюулгүй ажиллагааны техниологиуд тодорхойлж байгаа бөгөөд эдгээр чиг хандлагууд улам боловсронгуй болж хөгжсөөр байна. 

Ялангуяа 3D print - ийн технологи нь зөвхөн амины орон сууцаас гадна гүүр, тэр байтугай өндөр барилгын төслүүдийг барихад ашиглах хэмжээнд хөгжсөөр байгаа юм. 

3D  принтер гэдэг нь  нано технологийн тусламжтайгаар эд зүйлийг  гурван хэмжээст буюу бодит  болгон хувилагч төхөөрөмж юм. Cудлаачид энэ аргаар маш олон зүйлийг хувилсан  бөгөөд үүнд  байшин, гар буу, гитар, машин, өөрийнхөө жижигхэн хувилбар, хувцас, хүнсний бүтээгдэхүүн, тэр байтугай хүний чихийг ч хувилж амжжээ. 

Grand View их сургуулиас хийсэн судалгаанд дурдсанаар 3D принтээр баригдсан барилгын эрэлт ирэх жил 28 хувиар өсөх хандлагатай байгааг нийтэлжээ. Энэхүү технологийг ашиглан бага зардалтай жижиг байшин, өндөр өртөгтэй тансаг зэрэглэлийн хаусыг ч барьж эхлээд байна. Уг технологи нь барилгын хог хаягдал маш багатай, байгальд задрах боломжтой барилгын материалын шийдэлд хүрэх гарц гэж олон мэргэжилтнүүд үзэж байгаа бөгөөд жил ирэх тусам улам боловсронгуй төгс болж хөгжсөөр байгаа юм. Тийм ч учраас энэ нь дэлхийн нийтийн тогтвортой байдлын үзэл баримтлалд бүрэн нийцэж, барилгын салбарын ирээдүй гэж тодорхойлогдож байна. 

Энэхүү технологийн ачаар барилгыг маш богино хугацаанд барих боломжтой болсон билээ. Business Insider - д  мэдээлснээр 3D хэвлэмэл барилгын гүйцэтгэгч ICON компани нь 24 цагийн дотор 55,7м2- 74,3м2 /600-800 square -foot/ талбайтай барилгыг барьж дуусгасан бөгөөд ердөө 12 цагийн дотор нүүж орох боломжтой  юм. 

3D хэвлэмэл барилгыг барихдаа компютер дэх дижитал зураг төслийн дагуу давхарга үүсгэх маягаар зуурмагийг тараадаг. 

Мэдээж тоног төхөөрөмжийн тохиргоо, эвдрэл, техникийн саатал гаргахгүйн тулд хүний хяналт зайлшгүй шаардлагатай. Мөн сантехник, цахилгааны утас, хаалга, цонхыг шийдэхийн тулд мөн л хүний оролцоо чухал хэвээр байгаа юм. 

Харин үнийн хувьд төсөл болгонд харилцан адилгүй байх бөгөөд гүйцэтгэгч компанийн цалин, ашигласан материал, газарзүйн байршил, хэмжээ, тав тухтай байдал, дизайны нарийн төвөгтэй шийдэл зэргийг харгалзан үзэж үнийн дүнг тооцоолдог байна. Жишээлбэл, дэлхийн хамгийн анхны хэвлэмэл байшин 2021 оны эхээр АНУ - д танилцуулагдсан бөгөөд Нью-Йоркийн Риверхед хотод байрлах гурван унтлагын өрөө, хоёр угаалгын өрөө, хоёр машины гарааштай байшин Zillow.com сайтад 299,999 доллараар зарагдаж байсан. Үүнээс хойш хэвлэмэл байшингийн хамгийн тансаг загварууд нь 1 сая долларыг давдаг бөгөөд цорын ганц онцгой шийдэлтэй хаус бариулбал түүний үнэ нь 7 оронтой  тоонд ч хүрэх боломжтой байна. Зах зээл нь ч тэлж, үүнийг дагаад технологи нь ч хөгжсөөр байгаа юм. 

Гэхдээ дээр хэлсэнчлэн үнийн хувьд адилгүй бөгөөд маш бага зардлаар, богино хугацаанд амьдрах байшингаа барих боломжтой. 

BIO HOME 3D хэвлэмэл байшин 

100% байгальд задрах боломжтой материалаар хийгдсэн 3D хэвлэмэл байшин 

Мэйн их сургууль /The University of Maine/ болон "Нийлмэл материалын төв" хамтран барилгын салбарын ажиллах хүчний хомсдолтой тэмцэх, бага зардлаар орон сууцны хүртээмжийг нэмэгдүүлэх зорилгоор давирхай болон модон утас  /wood fibers/ ашиглан хэвлэмэл байшин барьжээ. Тус байшин нь 55,7 м2 /600 square-foot/ талбайтай бөгөөд шалнаас дээвэр хүртэл 3D хэвлэх технологийг ашигласан байна. Уг байшин нь нэг өрөө, 2 угаалгын өрөөтэй бөгөөд 100 хувь дахин боловсруулах боломжтой төдийгүй 100 хувь биологийн задралд орох материалаар хийгдсэн юм. 

EAST 17TH STREET RESIDENCES

Минимал хэв маягийн хэвлэмэл байшин 

Техасын 3D хэвлэмэл барилгын гүйцэтгэгч компани болох ICON  нь минимал хэв маягаар, хувийн гадна талбайтай байшинг барьсан байна. Уг байшин нь 2-4 өрөөтэй, 92,9-185,2м2 /1000 - 2000 square- foot/ талбайтай. Байшингийн доод давхрыг цементээр, дээд давхрыг төмөр болон мод ашиглан барьсан.  

 0 эрчим хүчний хэмнэлттэй барилга 

Тансаг зэрэглэлийн эрчим хүчний хэмнэлттэй хэвлэмэл барилга 

Дээр дурдсан ICON компани болон Lake|Flato архитектурын фирм хамтран халуун усны газрыг 3D хэвлэмэл технологийг ашиглан барьсан байна.Энэхүү барилгын муруй хана, бөөрөнхий булангуудыг цементээр тусгаарлаж, гангаар бэхжүүлсэн. Дундад зууны модернист хэв маягаар загварчилсан бөгөөд 218,2 м2  талбайтай уг барилгыг 10 гаруй хоногийн дотор ашиглалтад оруулсан байна. 0 эрчим хүч зарцуулдаг гэдгээрээ онцлог уг байшинг TIME сэтгүүлээс 2022 оны шилдэг бүтээлээр зарласан.  

Kamp C 

Нэг цутгалтаар 2 давхар баригдсан хэвлэмэл байшин 

Энэхүү хаус нь 3 долоо хоногийн дотор бүрэн баригдсан. Уг барилгын гүйцэтгэгч компани нь 3D хэвлэх технологийг илүү сайжруулан хөгжүүлснээр ердийн тоосгоноос 3 дахин их шахалттай, бат бэх материалын гарган авч, нэвтрүүлсэн байна. 

Гөлгөр гадаргуу, зузаан давхарга нь энэхүү загварыг илүү чанартай, урт насжилттай болгож өгсөн. Барилгын өндөр нь 8,2 метр /27 feet/, нийт 89,8 м2 / 967 square feet/ бүхий талбайтай. Нарны халаагуур болон дулааны насосоос халаалт болон цахилгааны асуудлаа  шийддэг  тогтвортой барилга юм. 

MIGHTY HOUSE QUATRO

Калифорниа мужийн өмнөд хэсэгт байрлах 20 айлын  уг амины орон сууцууд нь 0 эрчим хүчний хэмнэлттэй бөгөөд 4 сарын хугацаанд баригдсан. 

107,8 м2 талбайтай бөгөөд 2 унтлагын өрөө, 2 угаалгын өрөөтэй. Орчин үеийн бүхий л шийдлийг бий болгосон. Тухайлбал, шалнаас тааз хүрсэн цонх, халуун ус, усан сан гэх мэт. Энэ төслийг хэрэгжүүлэгч нь уламжлалт барилгаас 2 дахин хурдтай барьж, 99 хувиар бага хог хаягдал гаргасан талаар онцгойлон дурдсан байдаг. 

3D хэвлэмэл барилгын технологи дэлхийн олон улс орнуудад нэвтэрч байгаа бөгөөд зарим тэргүүлэгч орнуудын хувьд технологийн өрсөлдөөн явагдаж, жил бүр инновацууд нээгдэж байна.