Барилгын салбартай холбоотой мэдээ мэдээлэл, судалгаа, салбартаа нэр хүндтэй зочдын ярилцлага, мэргэжилтний зөвлөгөө, шинэ орон сууц, барилгын материалын үнэ ханшийн судалгаа сар бүр, ажил гүйцэтгэлийн үнэлгээ улирал бүр шинэчлэн гаргадаг Барилга МН сэтгүүлийн 2024 оны хоёрдугаар сарын дугаар уншигчдадаа хүрч эхэллээ. 

Энэ удаагийн нүүр хуудсанд РЕМИКОН ХК хамтран ажиллаа. 

Шинэ дугаарт гарсан онцлох булангуудаас товч танилцуулбал,

ЗАЛУУ ИНЖЕНЕР:   Монгол улс 2030 он гэхэд хүлэмжийн хийн ялгарлаа 22,7 хувиар буруулах зорилтыг тавьж ажиллаж байгаа бөгөөд үүний 4,9 хувь нь барилгын салбарт хамаарагдаж байна. Иймд барилгын материалын үйлдвэрлэгчид, гүйцэтгэгчид гэх мэт салбарын бүхий л шатанд хүлэмжийн хийн ялгарал багатай, эрчим хүчний хэмнэлттэй, дулаан алдагдалгүй ногоон барилгын технологийг үе шаттайгаар нэвтрүүлэхийг зорьж байгаа билээ. Энэ удаагийн ЗАЛУУ ИНЖЕНЕР буландаа энэхүү үйл хэрэгт түүчээлж буй нэгэн инженерийг урилаа. Түүнийг Б.Батпүрэв гэдэг бөгөөд МБИХ-ны сэргээгдэх эрчим хүчний шилдэг инженер, Професионалстрой ХХК-ийн ерөнхий инженер юм. 

АМИНЫ ОРОН СУУЦ: Сүүлийн жилүүдэд Монгол орны газар хөдлөлтийн идэвхжил ихээр нэмэгдэж олон удаагийн давтамжтай газар хөдлөлт бүртгэгдэж байна. Иймд Гамшигт тэсвэртэй, эрчим хүчний хэмнэлттэй, норм, дүрэм, стандартын шаардлага хангасан, орчин үеийн амьдралын тав тухыг хангасан нэг маягийн загвар зургийг боловсруулан шинээр амины орон сууц барьж байгаа игэн, хуулийн этгээдэд үнэ төлбөргүй ашиглуулж, барилгын чанар, аюулгүй байдлыг хангуулахаар Өрөгт бүтээц болон Төмөрбетон бүтээцтэй 1 давхар 40.0м2, 60.0м2, 80.0м2, 2 давхар 100.0м2, 120.0м2  талбайтай ажлын зургийг танилцуулж байна. Бид онцлох загваруудыг Амины орон сууц-ны булангаар дамжуулан цувралаар хүргэж байгаа бөгөөд дэлгэрэнгүй зураг төслийг barilga.mn платформын Номын сан цэснээс харах боломжтой. 

АРХИТЕКТУР ДИЗАЙН: Товчхондоо хэмжээ нь дээшээ багасч нарийсах буюу тэнгэр өөд тэмүүлсэн чулуун нүсэр байгууламжийг бид пирамид хэмээсээр ирсэн ба хэлбэр нь шатласан, шулуун, дугуй янз бүр байна. Африк, Өмнөд Америк болон Азийн зарим оронд сүсэг биширлийн, зан үйлийн, бунханы зориулалтаар манай эриний өмнөх цаг үеэс манай эрин хүртэл баригдсан олон тооны пирамидууд байна. Эдгээрээс дараах онцлох пирамидуудыг товч танилцуулж байна.

МЭРГЭЖИЛТНИЙ ҮГ: Монгол орон Азийн эх газрын төв хэсэгт, гадаад далайн чийглэг агаарын урсгалыг хаасан өндөр уулсаар хүрээлэгдсэн учир эх газрын эрс тэс уур амьсгалтай байдаг. Энэ нь барилгын модон бүтээцийн ашиглалтын хугацаанд нөлөөлдөг байна. Тухайлбал, манай урд, хойд хоёр хөрш модон бүтээцэд өмхрөлийн эсрэг арга хэмжээ авдаг бол манайд эсрэгээрээ хагсалтын эсрэг арга хэмжээ авах шаардлагатай болдог.

СУДАЛГАА: Эрчим хүчний нэгдсэн системд одоогоор 3 салхин цахилгаан станц, 8 нарны цахилгаан станц, 7 усан цахилгаан станц тус тус эрчим хүч үйлдвэрлэж байна гэсэн мэдээлэл байгаа юм. Гэвч 2030 он гэхэд Монгол Улс эрчим хүчний суурилагдсан хүчин чадлаа 2 дахин нэмэгдүүлэх шаардлагатай байна. Учир нь эрчим хүч эдийн засгийн өсөлтөд болоод аж үйлдвэр, уул уурхай, барилгын салбарын өсөлтийг хязгаарлаж байгаа гол хүчин зүйл юм. Түүнчлэн эрчим хүчний салбарын алдагдал жил ирэх тусам нэмэгдсээр байгаа нь шинэчлэлийн боломжийг мөн хязгаарлаж байна.

Эдгээр булангуудаас гадна хууль эрх зүй, шинэ материал, дуулгах сонин, та чадна гэх зэрэг булангууд маань шинэ мэдээ мэдээллээр дүүрэн байгаа.  

СЭТГҮҮЛ ЗАХИАЛАХ 

Онлайн унших: Номын сан

Утас: 9100-0233, 7711-3333-2