Архитектор, дэд профессор Б.Адъяагийн үндэсний дурсгалт уран барилгын талаарх “Монголын үндэсний архитектурын дурсгал судлал” номын нээлт өнөөдөр /2024.01.12/ Монголын Архитекторуудын Эвлэлд боллоо. 

Нээлтэд, Соёлын дэд сайд М.Батбаяр, ШУА- ын Түүх археологийн хүрээлэнгийн Дундад зууны судлалын салбарын эрхлэгч, доктор, дэд профессор А.Энхтөр, “Барилга архитектур” корпорацийн ерөнхий захирал, архитектурын ухааны доктор, академич Д.Хайсамбуу, МУ- ын гавьяат барилгачин, МАЭ - ийн хүндэт ерөнхийлөгч, зөвлөх архитектор Г.Мягмар нар болон МУ- ын гавьяат барилгачид, ахмад архитекторууд, залуу үеийн төлөөллүүд хүрэлцэн ирсэн юм. Соёлын дэд сайд М.Батбаяр, Архитектор, дэд профессор Б.Адъяа "Номын баринтаг зудалж, товч танилцуулга хийв"

Зохиолч уг номдоо түүхийн эх сурвалж, археологийн олдвор, эрдэмтэн судлаачдын бүтээл зэрэгт тулгуурлан өөрийн олон жилийн шинжилгээ, судалгаанд үндэслэн Монголын архитектурын үүсэл, хөгжил, түүхийн үечлэл, нэр томьёог цэгцтэй ойлгомжтой болгон улмаар Монголын Үндэсний Архитектурыг онолын түвшинд тодорхойлсон байна. Нүүдэлчдийн гэх тодотголтой эртний уран барилгын дурсгалууд, инженерийн байгууламжуудыг нүүдэлчид өөрдсийн ахуйн соёл, шашин шүтлэг, зан үйл, хэрэглээндээ тохируулан төлөвлөж, барьж бүтээж байсан төдийгүй эдгээр нь зуун зуун дамжин улам боловсронгуй болж хөгжиж байсныг тодруулан таниулахад энэхүү номын нэгэн зорилго оршиж байгаа юм. 

Мөн анх удаа “Монголын дурсгалт уран барилгын суурь судалгааны төрөлжсөн бүдүүвч”  - ийг цэгцлэн боловсруулсан ба энэхүү бүдүүвч /схем/ зураглал нь Монгол Үндэсний архитектурын хөгжил, түүхийг гүнзгийрүүлэн судлахад чиг баримжаа болох, цаашлаад судалгаа шинжилгээний тулгуур үндэслэл болж өгөх ач холбогдолтой юм. 

Энэхүү бүтээлийн эдгээр ач холбогдол, шинэлэг байдлыг үнэлэн Монголын Архитекторуудын эвлэлийн захиалгаар Монгол Улсын Соёлын яамнаас уг номыг эрхлэн хэвлүүлсэн байна. 

Архитектор, дэд профессор Б.Адъяа уг номыг бүтээхэд үнэтэй хувь нэмэр оруулсан хүндэт зочдод номын дээжээс дурсгав