Нийслэл хотын хүн ам өсөн нэмэгдэж байгаагаас бага насны хүүхдийг хүмүүжүүлэх цэцэрлэг, яслийн олдоц ихээхэн хурц асуудал, бэрхшээл үүсгэх болжээ. Хөдөөнөөс шилжин ирэгчдийн тоо тасрахгүй өсч, төрөлт өндөр байгаагаас шалтгаалан нийслэлд бага насны хүүхдийн тоо өссөөр байгаа тул хүүхдээ цэцэрлэгт хамааруулах нь том асуудал болоод байгаа билээ. Энэ талаар Нийслэлийн боловсролын газрын мэргэжилтэн Э.Баярмагнайгаас лавлавал "Тийм ээ. Ийм хурц асуудал үүсээд олон жил болж байна. Гэхдээ сүүлийн үест хүүхдийн цэцэрлэгийн тоо, түүний орны тоог өсгөн нэмэгдүүлэх талаар тууштай арга хэмжээ авч байгаа бөгөөд үүний нэг үр дүн бол энэ намар гэхэд шинээр 20 цэцэрлэг баригдаж ашиглалтанд орох юм. Тухайлбал, Баянзүрх дүүргийн XI хороо буюу Хонхорт 100 ортой, XIII, XXII хороодод тус бүр 100, XIX хороонд 75, IX хороонд 75 болон 50 ортой, XII хороонд шинээр цэцэрлэг, Сүхбаатар дүүрэгт л гэхэд XI хороонд 150, XVI хороонд 100, XVII хороонд 100, XVIII хороонд 100 ортой цэцэрлэг, Сонгинохайрхан дүүргийн XI хороонд 50, XXIV хороонд 100, XXV хороонд 100, XXXI хороонд 50, Чингэлтэй дүүргийн VII хороонд 100, IX хороонд хуучирсан 31-р цэцэрлэгийг буулгаж 150 ортой шинэ цэцэрлэг, XVII хороонд 50, Хан-Уул дүүргийн VI хороонд 100 гэсэн нийт 20 цэцэрлэгийг барьж ашиглалтанд өгнө. Эдгээр цэцэрлэгээс 50 ортой 4 цэцэрлэгийг нь НҮБ-ын "Хабитат" төслийн хөрөнгөөр барьж байгаа болно.
Түүнчлэн Дэлхийн банкны "Үр дүнд түргэн хүрэх санаачлагын түншлэл" хөтөлбөрийн хүрээнд канадын технологиор 19 цэцэрлэг баригдах болно. Үүнд БЗД-т 4, БГД-т 2, Багануур дүүрэгт 1, Багахангай дүүрэгт 1, Налайх дүүрэгт 1, СБД-т 4, СХД-т 4, ЧУД-т 2, ХУД-т л 1 цэцэрлэгийг ирэх 2012 онд ашиглалтанд өгөхөөр төлөвлөн ажиллаж байна.
-Нийслэлийн цэцэолэгүүдэд өдгөө хичнээн хүүхэд хүмүүжиж байна вэ?
-Өнгөрсөн 2010-2011 оны хичээлийн жилд нийслэлийн 275 цэцэрлэгт 56211 хүүхэд хамрагдсан нь өмнөх оныхтой нь харьцуулбал цэцэрлэгийн тоо 19 буюу 7,4 хувиар өсч, хүүхдийн тоо 7414 буюу 15,2 хувиар өссөн мэдээтэй. Үүнээс төрийн өмчит 174 цэцэрлэгт 48417, төрийн бус өмчит 101 цэцэрлэгт 7794 хүүхэд хүмүүжиж байгаа. Цэцэрлэгт 2-5 насны багачууд хүмүүжиж байгаагаас хамгийн олон нь 5 настнууд байгаа бөгөөд тэд нийт хүүхдийн 27,7 хувийг эзэлж байна гэсэн юм.
Хотын төвд орших Чингэлтэй дүүргийн тэргүүний "Найрамдал" 5-р цэцэрлэг, тэргүүний 39-р цэцэрлэг, С.Янжмаагийн нэрэмжит 19-р цэцэрлэгээр орлоо. Өчигдрөөс эхлэн нийт цэцэрлэгүүд хүүхдээ бүртгэж эхэлсэн нь баасан гарагт дуусах учиртай юм байна. Тиймээс эцэг эхчүүдийн урт дараалал үүссэн байх аж. 5-р цэцэрлэгийн эрхлэгч Л.Энхзаяа "Манайх 1-р хорооныхоо хүүхдүүдийг юуны өмнө бүрэн хамруулах ёстой. Одоо 14 цагийн байдлаар бүртгэл 20 хувьтай явна. Хүчин чадал маань 180 хүүхэд боловч бид 240 хүүхэд хүлээн авсаар ирлээ. Тухайлбал "G Mobail", ТЕГ, "Үндэсний үнэт цаас" ХХК зэрэг манайд ойрхон оршдог аж ахуйн нэгжүүд ажилтнуудынхаа хүүхдүүдийг бас хүмүүжүүлэхийг хүсч жилээс жилд албан бичиг ирүүлсээр ирлээ. Гэвч бид юуны өмнө харьяалах хорооныхоо хүүхдүүдийг эхлэн бүртгэнэ" гэсэн бол 39-р цэцэрлэгийн эрхлэгч Б.Оюунгэрэл "Өглөөнөөс хойш 13.50 цагийн байдлаар 69 хүүхэд бүртгүүлээд байна. Гэтэл хүчин чадал маань ердөө л 100 хүүхдээр хязгаарлагдаж байгаа. Жил болгон л 210 орчим хүүхэд бүртгүүлээд тал хувь нь цэцэрлэгт багтаж чаддаггүй" гэж байв. Харин тэндээс гарч явахад минь нэгэн настайвтар эмэгтэй "Энэ хавийн 9, 33, 39-р цэцэрлэгүүд өмнөх жилүүдэд "Mobicom" компанитай гэрээ байгуулан ажилтнуудынх нь хүүхдийг авдаг байсан. Бодвол сургуулиуд дээр байгуулагддаг "хандивын ангирхуу" юм уу даа. Цэцэрлэгтээ компьютер зэргийг хандивын журмаар авдаг юм шиг билээ. Харин энэ жил Монголбанктай гэрээ байгуулан 30 хүүхэд авахаар болсон гэсэн. Тэгэхээр үндсэн хорооны хүүхдүүд хасагдан хохирсоор байгаа юм" хэмээн аминчлан өгүүлж байсан.
Жил жилийн намар цэцэрлэг, сургууль үүдээ нээхэд хүүхдээ хамруулахтай холбоотой иймэрхүү зөрчлүүд улам олшрох хандлагатай байна. Чингэлтэй дүүрэгт л гэхэд шинээр хоёр ч цэцэрлэг ашиглалтанд орлоо ч гэсэн байдлыг цэгцлэх боломжгүй нь ойлгомжтой. Энэ хурц асуудлыг хэрхэн шийдвэрлэх вэ?