Бид энэ удаагийн VIP зочноор "Бульдорс Мон" ХХК-ийн захирал Д.Атарбаясгаланг урин ярилцлаа. Тэрээр эдийн засагч мэргэжилтэй бөгөөд чөлөөт зах зээлийн үед холбоо дохиоллын чиглэлээр бизнесийн гараагаа эхэлж, 2017 онд одоогийн "Бульдорс Мон" ХХК-ийг үүсгэн байгуулжээ. 

Таныг эдийн засагч хүн болохоор Монголын эдийн засгийн өнөөгийн байдал, барилгын салбар дахь нөлөөллийг хэрхэн харж байна. Эдийн засаг 6,3 хувийн өсөлттэй гарсан ч барилгын салбар уналттай байна уу?

Эдийн засаг бол хүлээлтээс давсан өндөр үзүүлттэй гарсан. Энэ нь  түүхий эдээ экспортлоод өссөн үзүүлэлт юм. Харин дотоодын нийт бүтээгдэхүүн өсөөгүй бөгөөд гадаад худалдааны экспорт тэр чигтээ давамгайлчихсан харагдаж байгаа. Дараа жилийн эдийн засгийн төсвийн тодотгол саяхан гараад урьдчилсан хэлэлцүүлэгт орсон. 

Хүмүүсийн нийтлэг шүүмжилж байгаа зүйл бол төсвийн тодотголын ихэнх нь халамжруу тавигдсан буюу зарлага нь хамгийн өндөр хувьтай харагдсан. Уг нь үйлдвэрлэл, дотоодын бүтээгдэхүүндээ өндөр зардал тусгаж өгөх хэрэгтэй. 

Эдийн засгийн өсөлт бууралтаас гадна барилгын салбарт нөлөөлж байгаа гол хүчин зүйл бол моргейжийн зээл юм. Олон улсад ч моргейжийн зээлээр барилгын салбар санхүүждэг. Гэтэл манай улсад цар тахлын үеэр эргэн төлөлтийг зогсоож, Монгол банк болон Барилга, хот байгуулалт яамны хэн нь хариуцах нь тодорхойгүй байсаар эх үүсвэргүй болж зогссон. Энэ нь барилгын салбарыг маш хүнд байдалд оруулсан. 

Олон улсад хүү, хугацаа, нөхцөл зэрэг нь өөр байдаг хэдий ч энэ зээлийн систем хэрэгждэг. 2023 онд хэчнээн хүн моргейжийн зээл хүссэнийг банкууд дээр өгсөн хүсэлтийг харахад гарч ирнэ. Хамгийн эргэн төлөлт сайтай зээл учраас эрэлтийг хангах хэрэгтэй гэж хардаг.

Хөрөнгийн зах зээл дээр ажилладаг уу? Улаанбаатар бонд гарсантай холбогдуулан бонд авах эсэх тал дээр олон хүмүүс эргэлзэж байна. 

Миний хувьд Хонгконгийн хөрөнгө оруулалтын бирж дээр ажилладаг.  Харин бондны хувьд засгийн газраас ихэвчлэн гаргаж байгаа учраас ямар нэгэн эрсдэлгүй бөгөөд баталгаатай зах зээл дээр гарсан өрийн бичиг гэж үздэг. Бонд болон хувьцааны хамгийн гол, давуу тал нь үнийн дүн бага хязгаар заадаггүй учраас амар байдаг. 100 мянган төгрөгтэй байсан ч авч болдог гэсэн үг.

Улаанбаатар бондын хувьд эрх зүйн орчин бүрдээгүй байгаа учраас тайлбар хэлж болохгүй. 

Хадгаламжинд мөнгөө хадгалах, хувьцаа авах хоёрын аль нь үр ашигтай вэ? 

Бодохгүйгээр хувьцаа гэж хэлнэ.  Хадгаламжийн хүү гэдэг ямар ч эрсдэлгүй. Хувьцаа бол эрсдэлтэй, нэрлэсэн хүү гэдэг боломжит зүйл л дээ.

Хөрөнгө оруулалт гэхээр заавал мөнгө яригдахгүй шүү дээ. Таны хувьд өөртөө оруулсан хамгийн зөв хөрөнгө оруулалт юу байсан бэ? 

Хөдөлмөр гэж боддог. Тэрбумын хөрөнгө оруулалт хийгээд алдаагүй хожсон нь мөнгөний арилжаа болно. Үүнтэй адил би 23 жилийн турш бүх ажилтнуудаас эрт ирж, хамгийн сүүлд тардаг байлаа. Хичээл зүтгэл, хөдөлмөрийн үр дүнд л өнөөдрийг бий болгосон. Тиймээс ингэж ажилласан маань өөрөө өөртөө хийсэн хамгийн том хөрөнгө оруулалт юм. 

Buldoors буюу хаалганууд дундаа хамгийн хамгийн гэсэн утгыг агуулдаг энэхүү хаалганы технологийн шийдлээс хуваалцвал? 

Хаалга үйлдвэрлэгдэж байгаа явцыг харах их сайхан. Эхлээд Европын ган хуйлаас эсгүүрэнд орж ган листүүд өлгөгдөн гарч ирнэ. Үүний дараа будгаа шүршиж 200C - ээс дээш хэмд барьцалдуулдаг. Ингэснээр будгыг түрхдэг гэдэг ойлголтыг халж, гандах, ховхрох асуудал үүсэхгүй болсон. Үүний дараа схем бүтэц хийгдэнэ.  Хаалганд шахмал полистрол хөөсийг зай засваргүй тархааж өгснөөр шороо тоос орохгүй, битүү болгосон байдаг. Мөн дуу дулаан, халуун хүйтэн тусгаарлах 5-6 давхарга нэмэгддэг. Ингэснээр термо нөхцөл нь гадаа -35   хүрч байхад дотор 25 хэмд тусгаарлаж чаддаг.  Өнгөрсөн жил нэг настай хүн манайхаар үйлчлүүлэхдээ “Манайх 2 давхар хаалгатай өвөлжсөн ч дулаан их алдсан. Харин хажуу айл маань дан хаалгатай ч дулаан өвөлжлөө. Хөршөөсөө танайхыг сураглаад ирлээ” гээд хаалга авч байсан юм. Бодит байдал дээр батлагдаж, үйлчлүүлэгчид сэтгэл ханамжтай байдаг. 

Мөн дуу тусгаарлалт маш өндөр. Гудамжны машины дуу чимээ, коридор дахь яриа шуугиан, гэрийн тэжээвэр амьтны чимээ, чанга инээд, дуу авиа гэх мэт шуугиан сонсогддог асуудалтай хэрэглэгчид тулгардаг. Энэ чимээ нь  28-32 дицебил байдаг. Тиймээс Бульдорс загварын хаалганууд нь дуу чимээ шингээх чадвартай чулуун хөвөн, пенополиуретан, пенополистирол гэх мэт материалаар хаалганы хавтсыг дүүргэж, автомашинд хэрэглэгддэг нягтаршуулагч резин короб хэсгийн периметрээр оруулснаар  28 – 43 ДБ хооронд дуу чимээ тусгаарладаг. Өөрөөр хэлбэл, 45 дицебилээс тусгаарладаг  буудлагын спортын чихэвч шиг гэж хэлж болох юм.  

Технологийн шийдэлд цоож их чухал байх. Сүүлийн үед ухаалаг цоож ихээр дэлгэрч байна. Таны туршлагаас харахад ухаалаг цоож, түгждэг цоожны ялгаа, давуу болон сул тал нь юу вэ? 

Цоож нь зэрэглэлээрээ хамгаалах чадвар нь өөр өөр байна. 2 дугаар зэргийн цоож гэхэд  мэргэжлийн хулгайч 15 минутын дотор онгойлгох боломжтой гэж үздэг. Харин 3 дугаар зэрэг нь 20 минутын турш, 4 дүгээр зэрэг нь   сейфны цоож буюу 30 минут эсвэл онгойлгох боломжгүй ч байж болно гэж үздэг. Энэ цоож манай хаалга бүрийн дээд талд нь байдаг. 4 дүгээр зэрэглэлийн цоожийг банкинд санал болгодог юм. Мөн Бульдорс брэндийн бас нэг онцлог бол үйлчлэгчийн худалдан авсан хаалга нь тухайн хүний  хувийн нууц болдог. Бидний зүгээс үйлчлүүлэгч түлхүүрээ гээсэн тохиолдолд тэдэнд туслах зорилгоор тухайн түлхүүрний кодыг авах саналыг үйлдвэрлэгчдээ тавьсан боловч хүний нууцад халдаж буй хэрэг болох тул “Аврах баг” дуудаарай гэж хэлсэн юм. /инээв/

Харин ухаалаг цоожны тухайд эсрэг байр суурьтай, нэг бодлын хуучны хүн юм болов уу. /инээв/ Сүүлийн үед олон төслүүд хаалгаа смарт цоожтой үйлдвэрлэж өгөхийг хүсэх болсон. Бид үйлдвэрлэгч талтайгаа үйлчлүүлэгчийн тавьсан шаардлага, хүссэн загвар хийцээр хаалгыг хийнэ гэж тохиролцсон учраас энэ өөрчлөлт  асуудалгүй л дээ.  Хятад болон Солонгосоос смарт цоожийг авчраад үйлдвэрлэгч рүүгээ хэмжээгээ явуулахад тохирсон цоожны ухалтыг хийж, угсраад бэлэн болдог. Гэвч үүнд нэг асуудал бий. Хятад, Солонгосын 20-30кг жинтэй хөнгөн хаалган дээр сурилуулдаг жижиг хэлтэй ухаалаг цоожны механизм нь манай 100-120 кг даацтай хаалгыг даадаггүй юм.   Даасан ч 1 жилийн дараа гэхэд цоожны хэл хугарах, гацах тохиолдол гарна. Тиймээс би төсөл хэрэгжүүлэгч нараасаа смарт цоож хийлгэсэн ч уламжлалт цоожны аль нэгийг нь үлдээгээч гэж “гуйдаг” юм. Гэхдээ харилцагч нар маань бүгд  цоожоо давхар үлдээж байгаад их баяртай байгаа. 

Манай хувьд энэ цоожны асуудлыг шийдэхийн тулд Guardan - ны цоожийг суулгахаар болсон. Ингэснээр цоожны түлхдэг хэсэг нь Хятадынх,  бусад   механиз нь хадгалагдаж үлдэх боломжтой болсон. 

Гаалиар орж ирж байгаа хаалганы тоо хэмжээ, дотоодод хэрэгжиж байгаа төслийн тоотой харьцуулахад алд дэлэм зөрдөг. Албан ёсны эрхтэйгээр хаалга оруулж ирдэг хичнээн компани байдаг  вэ? Зах зээлийнхээ хэдэн хувийг эзэлдэг вэ? 

Албан ёсны дистрибьютер бүхий хаалганы компани гарын 5 хуруунд багтана. Бусад нь гаальтай машинаар орж ирж байна даа. Энэ 5 компани нийлээд одоогийн зах зээлийнхээ  15-20 хувийг хангаж ажилладаг. Уг нь төслүүд харьцуулсан үнийн санал их авдаг ч төсөв нь хүрдэггүй. Тэд чанартай бүтээгдэхүүн ашиглахыг хүсдэг боловч хаалганы төсвийг 100 айлын үнээр төсөвлөдөг. Одоо ихэвчлэн 800 мянга орчим төгрөгийн хаалганы төсөв тавьдаг. Манай хаалга 900- 1,2 сая орчим үнэтэй байхад л кармандаа захирагдах шаардлага зарим төслүүдэд тулгарч байна шүү дээ. Уг нь хог хаягдлаар дулаалгаа хийдэг Хятадын хаалганаас   чанартай Орос хаалгыг аль болох   ижил үнээр санал болгохыг зорьдог юм. Тийм ч учраас Монголын  зах зээлд чанарыг таниулахын тулд үйлдвэрийн үнээр оруулж ирдэг. Үйлдвэрлэгч тал маань зардлыг бидэнд бүрэн олгох зарчмаар ажилладаг юм. 

Хэдэн улстай хамтын ажиллагаатай ажилладаг вэ?

Одоогийн байдлаар бол 4-5 улстай хамтран ажилладаг. Эхлээд зөвхөн ОХУ-тай хамтран ажиллаж байсан бол өргөжин тэлж Беларусь, Герман, Хятад улсуудтай хамтран ажиллаж эхэлсэн. Хамгийн сүүлд Итали улстай хамтрах хүсэлт тавьж, судалгааны түвшинд ажиллаж байна. 

Германы хаалганы үйлдвэрүүдтэй танилцаад явж байхад нэг төрлийн материалаар хийчихсэн хаалга зөвхөн Европтоо л борлуулна гэсэн байдаг. Хэрвээ танай компани экспорт хийх гэж байгаа бол яг манай стандартаар хийгддэг Хятадын үйлдвэрээс хаалга авчих гэдэг. Гэтэл Хятадын хаалганы үйлдвэр дээр нь очоод үзэхээр хэв загвар, технологи нь яг адилхан хэрнээ материал нь өөр байдаг. Жишээ нь модыг PVC-ээр орлуулчихсан байсан. Ингэхээр яг герман хаалга гэж хэлж болох уу гэдэг хэцүү юм. Хятад, Европ хаалганы материал нь өөр байгаа нь улсдаа байгаа материалаа ашиглаж байна гэсэн үг. Эндээс маш том гаргалгаа гарч ирж байгаа нь монголд хаягдал PVC, ундааны лааз, мод, үртэс ашиглаад яг европын технологиор хаалга хийж болно. Бид нарт материал нь байгаа учир технологи нь хэрэгтэй байгаа гэсэн үг. 

Монголдоо үйлдвэр байгуулах талаар ярьж байна уу? 

Хамгийн анх хаалганы үйлдвэр байгуулах нь миний зорилго байсан юм. Гэтэл үйлдвэрлэлийн массыг харахад маш бага байсан учраас үйлдвэр байгуулах зорилго маань хэсэг сарничихсан байлаа. Гэхдээ одоо зорилго маань эргээд сэргэж эхэлсэн байна. Манай компани өрхийн хэмжээнд эсвэл хотхоныг хангах хэмжээний бүтээгдэхүүнийг үйлдвэрлэх боломж байна. Үйлдвэрийн түүхий эдийг дотоодоосоо хангах боломжтой гэж харж байгаа. Жишээлбэл, үртсэн хавтан, хаягдал PVC, шахмал PVC гэх зэрэг боломжит бүх түүхий эд байна гэж харж байна. Энэ ажилтай холбоотой гадагшаа яваад ирсэн. Эхлээд бид нар бүтээгдэхүүн гэж харж байсан бол одоо үйлдвэрлэлийн тоног төхөөрөмжийн судалгаан дээр суурилан аль материалаар, ямар бүтээгдэхүүнийг, ямар орц найрлагатайгаар хийх вэ гэдэг судалгааны ажил дээр илүү төвлөрөн ажиллаж байна. Үйлдвэрлэл бий болгосноор нийт Монголчуудын амьдралд хэрэгцээтэй зүйл болох тогтмол ажлын байр буюу тогтмол орлого юм. Иймээс нийт хүн амын 0,001 хувь болох 10-15 хүн  үйлдвэрийн процесст оролцож түүнээсээ тогтмол орлогоо олдог болно гэсэн үг. Цаашлаад улсынхаа нөхцөлд тохирсон бараа бүтээгдэхүүнийг хэрэглэгчидтэйгээ хамтарч сайжруулаад ажиллах боломжтой гэсэн шинэ гэгээлэг өнцөг харж байна. 

Та одоо юун дээр илүү төвлөрч ажиллаж байна вэ? 

Хуучин бол үйлдвэрлэл, борлуулалтын үйл явц гэсэн зарчмаар явж байлаа. Одоо нийт эдийн засагт хэрэгцээтэй байгаа зүйл рүү орох нь илүү үр дүнтэй гэж үзэж байна. Эхний ээлжинд чанартай бүтээгдэхүүн хэрэглэх нь зөв гэдгийг тодорхой хэмжээнд барилгын салбарынхандаа ойлгуулж байна гэж бодож байгаа. Бидний ойлголт бүгд нэг тал руу болоод ирсэн учраас үүндээ үндэслээд дараагийн хийх зүйлс нь үйлдвэрийн процессийг оруулж ирэн бүтээгдэхүүнийг өртөг багатай болгоно гэсэн үг юм. Ийнхүү бүтээгдэхүүн өртөг багатай болохоор хамрах хүрээ олон болох боломжтой. Өнөөдөр бид нар 10 мянган айлын орон сууцад материал нийлүүлнэ гэсэн бол дараагийн ээлжинд 15 мянга болж түүнийг дагаад өрхийн орлого, хувь хүний хөгжил нэмэгдэнэ гэж үзэж байна. Учир нь бид өөрсдөө хийнэ гэдэг нь манай улсын инженерүүдийн судалгаа, материалдаа таарсан зүйлийг технологи нэвтрүүлэх явдал юм. 

Хамгийн эртний танил болох ОХУ-ын эдийн засгийн нөхцөл байдал ямар байгаа вэ? ОХУ-ын эдийн засгийн хүч нь дэлхийн болон монголын эдийн засагт хэрхэн нөлөөлж байна вэ? 

Эдийн засгийн анализ өгөх хэмжээний мэдээлэл бол байхгүй байна. Эдийн засаг үсрэнгүй хөгжиж буй үе, буурай үе, дайн байлдаантай үе гэх мэт бүх нөхцөлд эдийн засгийн ашигтай ажиллаж болох боломж гардаг. Энэний нэг жишээ болох ОХУ нь хоригоос хамаарч зарим нэг үйлдвэрлэлийн бүтээгдэхүүн илүү сайн, олон зах зээлтэй болсон байна. Гадаадын улсаас хамааралтай бүтээгдэхүүн нийлүүлэх, гадаад технологи ашиглах материалын хувьд бол хэцүү байгаа. Бид нартай яг адилхан дамжуулан худалдан авалт нь хэвийн үргэжилж байгаа. Би үүнийг дайн, хориг хаалт, геополетик гэж харахаасаа илүү бүх зүйлийг эдийн засгийн нүдээр харахыг хичээдэг. Материалын худалдан авалт хаана илүү ашигтай байна тэнд хоёр тал харилцан ашигтай бизнесээ явуулж байна гэж харж байна. 

Оросууд Хятад руу хийгээ өгөхийн тулд манайхаар дамжуулах гээд байгаа. Хятадууд бол манайхыг тойруулж барих хүсэлтэй. Энэ хоёрын дунд манайх юу хожих вэ?

Би өөрийн байр сууриа илэрхийлье. Хоёр хөршийн бодлогын хувьд манай улсад хязгаарлагдмал, одоогийн төмөр зам шиг зүйл болохвий гэсэн айдастай байна. Бусад салбар чөлөөт эдийн засагтай болж ашиг өгөөжөөр явах зорилттой ажиллаж байхад төмөр зам хаагдмал, хязгаарлагдмал байдаг. Үүн дээрээс ахиад хаалттай зүйл ороод ирэхээр нөгөө л нэг боомилсон, хязгаарласан, хараат шийдвэр нь ОХУ-аас гарч чөлөөт зүйлгүй болохвий гэсэн айдас хувь хүний хувьд төрж байна. Гааз авах хэрэглээ, тэндээс авах хураамжны хувьд тодорхой хэмжээний орлого манайд орж ирж магадгүй л байх. Гэхдээ тэрнээсээ илүү бидний эрхийг хязгаарласан асуудал үүсэхвий л гэж бодож байна. Уг нь чөлөөт эдийн засгийнхаа хэмжээнд явбал сайхан боломж. 

Ачаа тээвэрлэлтийн хувьд маш олон зам шаардлагатай байхад ганцхан төмөр замтай, ганцхан царигтай, ганцхан эгнээ замтай воган явуулж чадахгүй зогсоод байдаг. Гэтэл тэрийг хийж чадахгүйгээс болж Оросоос хамааралтай болчихсон шигээ таагүй нөхцөл үүсэхвий л гэж бодож байна. Бид дундаас нь гааз авч чадахгүй бол ямар үр өгөөж байх юм бэ? Тэрийг анхны хэлцэл дээрээ тусгаж өгөх хэрэгтэй. Монголын талын оролцоо байгаа юу, зөвхөн газар нутаг ашиглах уу, татварын хувьд ямар байх уу, дамжуулагч уу, хэрэглэгч байх уу гэдгээ шийдэх ёстой. Бидний шаардах зүйлийг зөвшөөрөхгүй бол бид түүнийг нь байлгах шаардлагагүй. 

Нөлөөллөөс гаргахын тулд бид тухайн салбарыг эдийн засгийн хараат бус байдалд оруулах хэрэгтэй болж байгаа юм. Сэргээгдэх эрчим хүчийг оруулаад айл өрх бүрд танайх өөрийн өрхийн хэрэгцээгээ хангачих юм бол урамшуулал өгье гэвэл хангачихна шүү дээ. Тэгээд цаашлаад ойр хавийн айл өрх гээд түгээгдээд явна. Тиймээс бодлогоо зөв механизмаар явуулах хэрэгтэй. Ийм жишээ бусад олон улсад бий.

Импортын барилгын материалын ихэнх хувь нь Хятадаас орж ирж байна. Өөр улсаас авъя гэхээр ачаа тээвэр, үнэ өртөг өндөр учраас Хятадтайгаа нөхөрлөх нь гарцаагүй болж байна?

Би эсрэг байр суурьтай байна. Жишээ нь, Манай улс төмрийн болон хаягдал төмөр хайлуулах үйлдвэртэй. Мөн хэрэглэгчид чанарт маш их анхаардаг болсон учраас айх зүйлгүй.  

Миний хувьд бол эрэлтээ хангаж чадвал стандартын шаардлага хангасан сайн бүтээгдэхүүн үйлдвэрлэж болно гэж үздэг. Бид биеийн амрыг харж хялбархан муу материал импортоор оруулж ирэхээс илүүтэй  технологиудыг уялдуулж чанартай барилгын материал дотооддоо үйлдвэрлэх  хэрэгтэй. 

Та компаниа хувьцаат компани болгоё гэж бодож байна уу?  

Бодолгүй яахав. Миний хамгийн том бодол болоод байна. Хувьцаат компани болсны үр дүнд нээлттэй зах зээл рүү орно.  Одоо манай компанийн хэрэгжүүлж буй худалдааны системийн чиглэлд хувьцаат компани болох шаардлага байхгүй. Худалдааны систем хамгийн хялбар бөгөөд ямар нэгэн технологи, үнэт зүйл байдаггүй. Үйлдвэрлэлийн хэмжээнд өргөжин тэлсний үндсэнд манай компани хувьцаат компани болон тэлж, олонд нээлттэй болох ёстой, мөн олон хүмүүсийн хяналт бий болдог.  Хяналт гэдэг нь өөрөө засаглалыг эрүүл болгодог. 

Таны бизнестээ баримталдаг зарчим юу вэ?

Бусдын өмнө хэлсэн ярьсандаа байх, даалгавраа биелүүлэх, хэлцлийн түвшинд яригдсан гэрээнийхээ үүргийг биелүүлэх гэсэн зарчимтай ажиллахыг зорьдог. Товчхондоо хэлсэн амандаа хүрэх юм. Үүний ард мөнгө санхүү, өр зээл, хүн хүч, технологи гэх мэт олон хэцүү хүчин зүйлүүд байгаа. Гэхдээ тухайн хэлцлийг хийх явцдаа хамтрагч талдаа хүлээсэн үүргээ биелүүлдэг. Би үүнээс ашиг ч олж, эрсдэл ч хүлээж байсан. Жишээ нь гэрээн дээр давагдашгүй хүчин зүйлс буюу газар хөдлөлт, дайн байлдаан гэх мэт үгсийг бүх гэрээндээ оруулдаг. Гэтэл өнгөрсөн оны 2-р сард дайн байлдаан гэх зүйл албан ёсоор эхэлж ханш тэнгэрт хадсаны улмаас би алдагдлаа өөртөө үүрээд гэрээ хийсэн байгууллагадаа материалаа нийлүүлсэн. Гэхдээ өөрийн нөхцөл байдлаа тайлагнаад бүх тооцооллоо хийгээд уулзахад хүн хүнийг ойлгохыг хүсдэггүй юм билээ. Хүн бүрийн бизнесийн зарчим өөр өөр.

Та гэрээ хэлэлцээр хийхдээ хүнийг нь чухалчилдаг уу? Харилцааг чухалчилдаг уу? 

Хэрвээ би 25-тай байсан бол хүнийг нь бодож магадгүй. Одоо бол гэрээ хэлэлцээр, гэрээний үүргийн дагуу ажилладаг. Би ажилтнууддаа ч хэлдэг. Бид нар ажлаа хийж байгаа учраас үндсэн харилцаа, хэлэлцлээ л хий гэдэг. 

Цаашдаа 10-20 жилийн хугацаанд ямар өөрчлөлт шинэчлэлтийг хийхээр төлөвлөж байна вэ? 

Дотооддоо олон улсын техник технологийг нэвтрүүлэн үйлдвэр бий болгохыг зорьж байна. Ер нь цаашдаа хийх их зүйл байна.  Залуучуудын эрч хүчээр өөрийн туршлага, хөдөлмөрт тулгуурлан олон зүйлийг хийж бүтээхийг зорьж байна. 

Бидний урилгыг хүлээж авсан танд баярлалаа. Таны цаашдын ажил хөдөлмөр, бүтээн байгуулалтад амжилт хүсье.