Барилгын салбартай холбоотой мэдээ мэдээлэл,судалгаа, салбартаа нэр хүндтэй зочдын ярилцлага, мэргэжилтний зөвлөгөө, шинэ орон сууц, барилгын материалын үнэ ханшийн судалгаа сар бүр, ажил гүйцэтгэлийн үнэлгээ улирал бүр шинэчлэн гаргадаг Барилга МН сэтгүүлийн 11-р сарын шинэ дугаар уншигчдадаа хүрч эхэллээ. 

Энэ удаагийн нүүр хуудсанд "Май Мон Соорс ХХК" хамтран ажиллаа. 

Шинэ дугаарт гарсан онцлох булангуудаас товч танилцуулбал,

VIP ЯРИЛЦЛАГА: Бид энэ удаагийн VIP зочноор "Бульдорс Мон" ХХК-ийн захирал Д.Атарбаясгаланг урин ярилцлаа. Тэрээр эдийн засагч мэргэжилтэй бөгөөд чөлөөт зах зээлийн үед холбоо дохиоллын чиглэлээр бизнесийн гараагаа эхэлж, 2017 онд одоогийн "Бульдорс Мон" ХХК-ийг үүсгэн байгуулжээ. 

МЭРГЭЖИЛТНИЙ ҮГ: Улаанбаатар хотын 2002 оноос өмнө баригдсан барилга байгууламжид газар хөдлөлтөд тэсвэрлэх чадварын үнэлгээ хийж, паспортжуулах барилга байгууламжийн 940 орчим барилгад мэргэжлийн байгууллага чанар байдалд дүгнэлт гаргасан байдгаас 80% орчим нь газар хөдлөлтөд тэсвэргүй 195 барилга нь хүчитгэх шаардлагатай 540 барилгыг буулган дахин төлөвлөх шаардлагатай гэсэн байдаг. Иймээс бид энэ удаагийн дугаартаа барилга байгууламжийг буулгах процессын ажил гүйцэтгэх аргачлалыг танилцуулж байна. 

ШИНЭ МАТЕРИАЛ: Бетонон эдлэл, хөнгөн бетон, тоосго бусад барилгын материалын технологи үйлдвэрлэл жигдэрсэн гэсэн ч бүтээгдэхүүний чанарыг сайжруулах, байгаль орчинд ээлтэй болгох чиглэлээр ажиллах шаардлага эн тэргүүнд тавигдаж байна. Иймээс энэ удаагийн нийтлэлээрээ бид ХБНГУ-ын Фрауэнхофын институтын хийж буй судалгааны зарим нэг ажлыг жишээ авч танилцуулахыг зорилоо. 

ТОДРУУЛГА: Ипотекийн зээл олголтын хүрээнд арилжааны банкууд зээл авч буй иргэдээс зээл судалсны нэг хувийн шимтгэл авдаг. Энэ нь хууль бус үйлдэл бөгөөд иргэдийн данс руу нэг хувийн шимтгэлийг банкууд буцаан хийх ёстой гэж улсын дээд шүүх тогтоолоо гэсэн мэдээллийг хуульч О.Батхүү өөрийн цахим хуудсаар дамжуулан олон нийтэд мэдэгдсэн. Энэ мэдэгдлийн дагуу иргэд ипотекийн зээлийн нэг хувийн шимтгэл буцаан олгогдоно гэсэн ойлголттой байсан юм. Гэтэл Монголын банкны холбооноос тус ойлголтыг няцаасан мэдэгдэл гаргасан. Иймд бид тус асуудлаар аль талын зөв болохыг тодрууллаа. 

ТА ЧАДНА: Аливаа интерьерийн чухал шинж чанаруудын нэг бол агуулахын зохион байгуулалт байдаг. Угаалгын өрөөнд хэрэгцээтэй зүйлс багтахгүй байх үе тохиолддог учраас зай талбайгаа зөв ашиглаж чадсанаар эмх цэгцтэй байхад тань туслах болно. Энэ удаад угаалтуурын доорх зайг ашиглан жижиг эд зүйлсээ хадгалах зориулалтайгаар шүүгээ хийх заавар хүргэж байна. Угаалтуурын дор шүүгээ хийснээр орон зайн хувьд сул зайг хэмнэх, интерьер заслын хувьд тав тухтай орчинг бүрдүүлэх юм. 

Эдгээр булангуудаас гадна хууль эрх зүй, амины орон сууц, дуулгах сонин, залуу инженер  гэх зэрэг булангууд маань шинэ мэдээ мэдээллээр дүүрэн байгаа.  

СЭТГҮҮЛ ЗАХИАЛАХ 

Онлайн унших: Номын сан

Утас: 9100-0233, 7711-3333-2