Чанарын шаардлага хангахгүй импортын барилгын материалд хяналт тавих асуудлаар “Импортын барилгын материалын стандарт” хэлэлцүүлэг өнөөдөр /2023.10.27/ амжилттай зохион байгуулагдлаа. Тус хэлэлцүүлэгт Монгол улсын шадар сайд С.Амарсайхан, Барилгын ханган нийлүүлэгчдийн зөвлөлийн тэргүүн Г.Батсүх, Нийгмийн эрүүл мэндийн үндэсний төвийн Хор судлал, шуурхай удирдлагын албаны дарга Б.Баттүвшин, Онцгой байдлын ерөнхий газрын Гамшиг судлалын үндэсний хүрээлэнгийн захирал, доктор, хурандаа Ж.Амгалан зэрэг удирдах албан тушаалтнууд оролцлоо. 

Монгол улсын шадар сайд С.Амарсайхан: Сүүлийн жилүүдэд барилгын салбарт бүтээн байгуулалт маш хурдацтай хөгжлөө. Гэвч чанартай барилгын материалаас илүү чанаргүй материал их болоод байна. Барилгын материалын чанар, аюулгүй байдлын хүрээнд Монгол улсад 93 нэр төрлийн шинжилгээ хийж байгаа хэдий ч сайжруулж хөгжүүлэх шаардлагатай. 155 барилгын материалын 49% нь олон улсын стандартаар хэмжигдэж явдаг юм. Барилгын норм дүрэм, стандарт зөрөх тохиолдол байдаг. Үүнийг нэг зам дээр авчрах хэрэгтэй байна хэмээсэн юм. 

Барилгын ханган нийлүүлэгчдийн зөвлөлийн тэргүүн Г.Батсүх: Монгол улс нийт барилгын материалынхаа 68%-ийг импортоор оруулж ирдэг. Тухайн барилгын материал нь эрсдэл багатай бүтээгдэхүүний ангилалд байдаг бөгөөд хилээр нэвтэрч байгаа барилгын материалын 99 хувь нь ямар нэгэн хяналт, шалгалтгүй орж ирдэг байна. Түүнчлэн импортын чанаргүй, дуураймал барилгын материалыг ганзагын худалдаачид гаальтай машинаар татвар төлөхгүй оруулж ирж байгаа нь үндэсний үйлдвэрлэгчид, чанартай бүтээгдэхүүн импортолдог албан ёсны дистрибьютерүүдийн хувьд шударга бус өрсөлдөөнийг бий болгож байна. Энэ хэлэлцүүлгээр дараах асуудлыг хэлэлцэн, гарсан зөвлөмжийг засгийн газарт танилцуулж шийдвэрт хүрнэ хэмээлээ. 

Мөн улсын төсвийн хөрөнгө оруулалтаар баригдаж байгаа барилга байгууламжийг барих тендерийн шалгаруулалт нь хамгийн бага үнийн саналтай оролцогчийг шалгаруулдаг болохоор тухайн барилга байгууламжийг хамгийн хямд, хамгийн хулхи чанар стандартын шаардлага хангахгүй барилгын материалаар барьсанаар сургууль, цэцэрлэг, эмнэлэг, конторын олон барилгууд чанаргүй баригдаж иргэдийг эрүүл аюулгүй орчинд амьдрах боломжийг хааж буй нэг хэрэг юм.

Энэхүү арга хэмжээг шадар сайдын ажлын алба болон Барилга хот байгуулалтын яам, Гаалийн ерөнхий газар, Стандарт хэмжил зүйн газар, Онцгой байдлын ерөнхий газар, Нийгмийн эрүүл мэндийн үндэсний төв, Барилгын хөгжлийн төв, Шударга өрсөлдөөн хэрэглэгчдийн төлөө газар, Төрийн худалдан авах ажиллагаа, МҮХАҮТ, Барилгын ханган нийлүүлэгчдийн зөвлөл зэрэг байгууллагууд хамтран зохион байгууллаа.

Хэлэлцүүлэгт Засгийн газрын гишүүд, холбогдох байгуулагын удирдах ажилтнууд, мэргэжлийн зөвлөхүүд болон  барилгын салбарын бизнес эрхлэгчид, ханган нийлүүлэгчид оролцож импортын барилгын материалд чанарт тулгамдаж байгаа асуудал, шийдвэрлэх арга зам, гарц шийдлийн талаар санал солилцож, хэлэлцүүлгээс гарсан зөвлөмжийг засгийн газарт танилцуулж шийдвэрлүүлэх юм. 

Цаашид барилгын материалын импортлогчдыг бүртгэлжүүлж, барилгын гол нэрийн материалуудыг эрсдэл өндөртэй бүтээгдэхүүний ангилалд оруулж, чанар стандартын шаардлага хангасан барилгын материалыг улсын хилээр нэвтрүүлэх эрх зүйн зохицуултыг гаргаж нэвтрүүлж ажиллахаар боллоо.

Ерөнхий зохион байгуулагчаар Шадар сайд С.Амарсайханы ажлын алба, Барилгын ханган нийлүүлэгчдийн зөвлөл ТББ ажиллалаа.