Засгийн газрын ээлжит хуралдаан 2023 оны аравдугаар сарын 18-нд болж өндөрлөлөө.Тус хуралдаанаар хотын шинэ дарга Х.Нямбаатар "Төлөвлөлтгүй барилга барих ажлыг хязгаарлах зохицуулалт оруулж ирж байна. Бид 2000-аад оноос хойш гэр хорооллыг барилгажуулах чиглэлээр тодорхой ажлууд хийгдсэн. Тухайлбал, СБД-ийн нутаг дэвсгэр, БЗД-ийн нутаг дэвсгэрийг дагаж байрладаг Сэлбэ голын орчим Натур худалдааны төвийн орчмын орон сууцны барилгажилтын асуудлууд хамгийн төлөвлөлтгүй бетонон ширэнгэн хорооллыг үүсгэсэн. Яармагийн дэнж орчмын орон сууцны хороолол мөн ерөнхий төлөвлөгөө, хотын стандартгүйгээр бетонон ширэнгийг үүсгэлээ. Бид одоо Сүхбаатарын талбайгаас 800м зайтай байгаа Дөлгөөн нуур орчмыг мөн л бетонон ширэнгэ болгоод алдаж байна. Цаашлаад дэнжийн мянга руу энэ төлөвлөлтгүй бетонон ширэнгийн барилгажилт үргэжилнэ. 

Ийм учраас бид цаг алдалгүй Улаанбаатар хотын барилгажилт ерөнхий төлөвлөгөө түүнд нийцсэн орон сууцны стандарт, нормуудыг тогтоож архитектур төлөвлөлтийн даалгавар болон барилга эхлүүлэх зөвшөөрөл олгогдоод байгаа 1500 нэгж талбар бүхий барилгажилтын ажлыг хязгаарлан царцаах цаашлаад нэгэнт төрөөс олгогдсон зөвшөөрөл бүхий газруудыг өөр хотын ерөнхий төлөвлөлт бүхий газруудад хотын стандартын дагуу шилжүүлэх байдлаар хоёр дахь хүндрэлтэй асуудлаа бид нар тогтоон барих ийм зохицуулалтыг энэ анхдагч хуулийн төсөл болон дагаж байгаа хуулийн төслүүдээр оруулж ирж байна" хэмээлээ.