Барилгын салбартай холбоотой мэдээ мэдээлэл,судалгаа, салбартаа нэр хүндтэй зочдын ярилцлага, мэргэжилтний зөвлөгөө, шинэ орон сууц, барилгын материалын үнэ ханшийн судалгаа сар бүр, ажил гүйцэтгэлийн үнэлгээ улирал бүр шинэчлэн гаргадаг Барилга МН сэтгүүлийн 10-р сарын шинэ дугаар уншигчдадаа хүрч эхэллээ. 

Энэ удаагийн нүүр хуудсанд Балданс ХХК хамтран ажиллаа.

Шинэ дугаарт гарсан онцлох булангуудаас товч танилцуулбал,

VIP ЯРИЛЦЛАГА: Үндэсний үйлдвэрлэгч, баялаг бүтээгчид бол улс эх орны хөгжлийн хөдөлгүүр билээ. Монгол Улсын үйлдвэрлэлийн салбарт түүх бичиж, хөгжилд түүчээлж буй анхдагчийн нэг бол “Монгол базальт” ХК юм. Тиймээс энэ удаагийн зочин хоймортоо тус компанийн ТУЗ-ийн дарга, Уралын холбооны хүндэт доктор, Аж үйлдвэрийн гавьяат ажилтан Л.Ариунболдыг урин ярилцлаа. 

МЭРГЭЖИЛТНИЙ ҮГ: 2023 оны байдлаар 940 барилгад мэргэжлийн байгууллага чанар байдалд дүгнэлт гаргасан байдгаас 80% орчим нь газар хөдлөлтөд тэсвэргүй 195 барилга нь хүчитгэх шаардлагатай 540 барилгыг буулган дахин төлөвлөх шаардлагатай гэсэн байдаг. Эдгээр барилгууд ихэнх нь бага төвөгшилтэй барилгад хамаарах 1-ээс 3 давхар чулуу, тоосго, модон хийцтэй барилгууд байсан. Бага төвөгшилтэй барилга байгууламжийг буулгах явцад процессын алдаа гаргаснаар машин механизм нь нурангид дарагдах тохиолдол, ажилчид болон иргэн эрүүл мэндээр хохирох эрсдэл тодорхой тоогоор гардаг байна. Иймээс Барилга байгууламжийн буулгалтын процессыг төлөвлөх сэдвээр энэ удаагийн мэргэжилтний үг булангаа онцоллоо. 

НИЙТЛЭЛ: Барилгын ханган нийлүүлэгчдийн зөвлөлөөс “Эдийн засаг ба барилгын салбар” сэдэвт уулзалт арга хэмжээг зохион байгуулсан. Тус уулзалтад Барилгын салбарын бизнес эрхлэгчид, Эдийн засагч судлаачид, төрийн болон төрийн бус байгууллагын төлөөллүүд оролцож Эдийн засгийн нөхцөл байдал барилгын салбарт хэрхэн нөлөөлж байгаа, гадаад ба дотоод нөлөөлөл, барилгын материал болон орон сууцны зах зээлийн нөхцөл байдал цаашдын чиг хандлагын талаар ярилцаж хэлэлцсэн юм. 

ХӨНДӨХ СЭДЭВ: Үерийн хамгийн их үерийн халилт Маршалын гүүрнээс дээш хэсгийн Туул голын далангаар өнгөрч байна. Өөрөөр хэлбэл Туул голын үер нь Гачууртын тохой, Баянзүрхийн гүүрний орчмоос эхлэн Улаанбаатар хот руу хальж орох төлөвтэй байна. Иймд Туулын үерийн даланг өндөрлөхөөс гадна үерийн эрсдэлээс сэргийлэх урсац тохируулгын усан санг байгуулах шаардлагатай байна.

СУДАЛГАА:Барилгын салбарын хөгжил эрчимжиж, бүтээн байгуулалтын ажлууд нэмэгдэхийн хэрээр үндсэн түүхий эд болох арматурын хэрэглээ ч жил бүр өссөөр  байна. Дотооддоо жилд 85 мянган тонн арматур үйлдвэрлэх хүчин чадалтай 16 үйлдвэр дотоодын зах зээлийн 20 гаруй хувийг ханган үйл ажиллагаа явуулж байгаа бөгөөд, үлдсэн 80 орчим хувийг импортоор хангаж байна.

АМИНЫ ОРОН СУУЦ: Бид энэ удаад “ХАУС ДИЗАЙН” каталогийн шилдэг хаус загварын хамгийн жижиг м.кв хаусыг дэлгэрэнгүй танилцуулах гэж байна. Энэхүү загвар 42,7м2 дуплекс хаусны төрөл бөгөөд эрчим хүчний хэмнэлтийн тооцоо хийлгүүлэхэд 38% хувийн эрчим хүчний хэмнэлтийг хангаж байсан. Харин 2023 оны байдлаар тухайн хаусны бүтээцийн технологиудыг илүү дэвшилтэт болгож, А+ төрлийн барилга болсон бөгөөд эрчим хүчний өндөр хэмнэлттэй 61% хувийг хангасан барилга болсон.

Эдгээр булангуудаас гадна хууль эрх зүйн мэдээлэл, ипотекийн өнөөгийн нөхцөл байдалтай холбоотой тодруулга ярилцлага, миний хэрэгсэл гэх зэрэг булангууд шинэ мэдээ мэдээллээр дүүрэн байгаа. 

СЭТГҮҮЛ ЗАХИАЛАХ 

Онлайн унших: Номын сан

Утас: 9100-0233, 7711-3333-2