Дизайн гэдэг хүний хэрэглээ болон гоо зүйн тэнцвэрт байдлыг хангаж байдаг зүйл юм. Орчны тав тухтай нөхцөлийг бүрдүүлэхийн тулд орон зайн зөв шийдэл, юмсын харьцаа, хэлбэр, гоо зүйн зохицлыг нь олж тохилог орчныг бий болгох хэрэглээний урлаг болж дэлгэрээд багагүй хугацаа өнгөрчээ. Орчин үед хүмүүс минимал хэв маягаар гэрээ тохижуулах нь элбэг болсон. Минимал урсгал нь эрх чөлөө болон тайвшрах мэдрэмжийг бий болгодог. Илүү дутуу зүйлгүй хүний хэрэгцээтэй зүйлс л багтдаг хамгийн энгийн шийдэлтэй урсгал. Орон зайг цэвэрхэн эмх цэгцтэй харуулахад олон тавилга, олон өнгөнүүдээр өрөөг дүүргэхгүй байх нь тухайн урсгалын онцлог юм. Өнгөний хувьд цагаан, саарал хар монохром өнгөнүүдийг ашиглана. Монохром нь зөвхөн хар цагаан өнгө гэсэн ойлголт биш харин төвийг сахисан өнгөний ууссан маягийг хэлнэ. Материалын хувьд модны хээ, байгалийн натурал нэхмэл, чулуу, керамик зэрэг эдгээр материалууд нь орчинд илүү дулаан уур амьсгал нэмэхэд ашигладаг. Элементийн хувьд шулуун шугаман элемент ашиглах нь орчинг цэмцгэр мэдрэмжийг өгдөг байна.

Ийнхүү амьдралын энгийн бөгөөд тансаг хэв маягийн нэг болох минимал урсгалаар гэрээ тохижуулахыг хүсвэл бидний энэ удаагийн дугаарын зургаан талт тавиурыг танд санал болгож байна. Цулгуй ханандаа нүсэр том тавиур гэхээсээ илүүтэй өнгөлөг, чамин харагдуулах жижиг декор, цэцэг гэх мэт гэрт хэрэгцээт зүйлсээ байрлуулах зургаан талт тавиурыг хийж гэрээ тохижуулаарай.

Бэлтгэх материал:  

• 18 мм зузаантай 30х200 см цул банз 
• 9 мм фанер хуудас 61x122см
• 6 мм-ийн модон углуурга
• Модны цавуу 
• Цагаан будаг, праймер
• чигжээс ба өнгөлгөөний материал

Хэрэглэгдэх зүйлс: 

• Ширээний хөрөө
• Тасдагч хөрөө
• Нарийн хөрөө
• Бэхэлгээний зориулалттай 6 мм-ийн модон өрмийн хошуу
• Бэхэлгээний цооног ба тоолуурын өрөмдлөг
• 1 цавууны хавчаар
• Будгийн хэрэгсэл
• Чигжээсний буу

15 см-ийн гүнтэй гурван ширхэг тавиур хийх болно. Эхлээд 200 x 30 см хэмжээтэй банз модыг тасдагч хөрөө ашиглан уртааш нь 2 хэсэгт хуваана. Дараа нь 15 см өндөр, 22 см урт 9 хэсэг болгон нийтдээ 18 хэсэг банз болгон  хуваана.

Тавиур нь тус бүртээ 6 ширхэг модоор хийгдсэн бөгөөд тус бүрийг хоёр талдаа 30 градус хүртэл налуу зүссэн байна. Та заавал энэ хэмжээсээр хийх шаардлагагүй бөгөөд өөрийн хүссэн хэмжээгээр тохируулан хийх боломжтой. Гол нь бүх банз адилхан өнцгийн хэмжээстэй байх нь чухал юм. Зүсэх явцад банз  хөдлөхгүй байгаа эсэхийг сайтар шалгаарай. Өнцөгтэй зүсэлт хийхэд хөрөө нь банзыг хажуу тийш нь хөдөлгөж, зүсэлтийг эвдэх эрсдэлтэй. 

Тавиурын ард байрлах банзыг байршуулахын тулд мод тус бүрт 11 мм өргөнтэй 9 мм гүнтэй нүхийг гаргах шаардлагатай. Энэ нь хамгийн багадаа арын банз шиг зузаан байх ёстой бөгөөд банзны зузаан 11 мм байна. Зүсэгдсэн тал нь дотор талдаа орно. Нүх нь банзны арын ирмэгээс 8 мм орчим зайтай байхаар тохируулагдсан.

Дараа нь хэсэг бүрийг хөрөөн дээр болгоомжтой зүснэ. 

Тавиур нь бэхэлгээний модон углуургаар бэхлэгддэг. Банз бүрт нэг талдаа 6 мм-ийн диаметртэй гурван нүх гаргана. Нүхнүүдийн хоорондын зай бүгд зэргэлдээ нэгэн жигд байлгахын тулд зурган дээрх хэрэгслийг ашиглана. 

Дараа нь тавиурын арын хэсгийг бэлдэнэ. Ар тал нь фанераар хийгдсэн байдаг. Энэ ар тал нь тавиур бат бөх хананд суурилуулахад чухал үүрэгтэй. Банзан дээр зургаан талт тавиураа байрлуулан дотор талаар нь хэмжиж харандаагаар тэмдэглэн хэлбэрийн дагуу зурна. Энэ хэлбэрийг фанераас зүсэн авч нөгөө 2 тавиурын арыг энэ хэмжээгээрээ тасалж авна.

Одоо тавиурыг угсрах болно. Цавуу таны гэрийн шалыг бохирдуулах эрсдэлтэй тул үүнээс сэргийлж шалаа хамгаалж цаас тавиарай. Зургаан ширхэг талаа сонгоод нуруугаар нь тааруулж туршина. Ингэснээр таарахгүй зөрүү үүссэн эсэхийг сайтар шалган засварлаарай. Дараа нь хэсгүүдийг задалж, дэлгэнэ.  Банзны  нэг талд нүх тус бүрт модон углуурга байрлуулан наана. Нөгөө талын нүхэнд цавуу нэмж  хоёр модыг хооронд нь байрлуулан холбоно. Энэ байдлаар 3 тал модыг хооронд нь холбоод тавиурын нэг хагас нь бий болно. Арыг  байршуулан нөгөө тал болох угсарсан 3 талаа холбоно. Бэхэлгээний олс ашиглан зай завсар үлдээхгүй сайтар хооронд нь холбож бэхлээрэй. Талуудыг хооронд нь холбоход цавууны илүүдэл завсраар гарч ирэх тул цүүц ашиглан цэвэрлэх боломжтой.

Тавиурын ард юу ч байхгүй бол нурууны мод тонгойх учир банзны жижиг хаягдал хэсгийг ашиглан тавиурын ард талын дээд хэсэгт бэлтгэсэн жижиг модоо бэхэлгээ болгон хадна. Энэ хэсгийг бэхлэхийн тулд эхлээд цавуугаар нааж дараа нь 3 боолтоор боож тогтооно. 

Тавиураа  үзэмж, өнгө нэмэн будна. Эхлээд гадаргууг зүлгүүрээр зүлгүүрдэж будахад бэлэн болгож цэвэрлэнэ. Будахын өмнө праймерийг жигд түрхэн гадаргууг өөгүй жигд толигор болгоно. Талуудын хоорондох жижиг завсрыг битүүмжлэхийн тулд чигжээс хөөс шахаж битүүлж өгнө. Чигжээс хөөсийг цэвэрхэн тарааж тэгш болгоно.

Эцэст нь тавиураа хананд тогтооно. Ингээд бидний хүссэн минимал загварын зургаан талт тавиур бий боллоо.