“Монгол Улсын Шадар сайдын 2023 оны 51 дүгээр тушаалаар баталсан удирдамж, Онцгой байдлын ерөнхий газрын даргын тушаалаар баталсан “Гамшгаас хамгаалах бэлэн байдлын үзлэг зохион байгуулах, үнэлэх журам”-ын хүрээнд Онцгой байдлын ерөнхий газраас Барилга, хот байгуулалтын Улсын албанд “Бэлэн байдлын үзлэг”-ийг “БАРИЛГЫН САЛБАР ГАМШГИЙН ЭСРЭГ ХАМТДАА” уриа дор зохион байгуулж байна. 

Нэгдүгээр ээлжийн үзлэгийг 09 дүгээр сарын 08-ны өдөр Барилга, хот байгуулалтын Улсын албаны дэргэдэх мэргэжлийн анги, техник хэрэгслийн бэлэн байдлыг шалгасан бол хоёрдугаар ээлжийн үзлэг өнөөдөр /2023.09.20/-ны 05:30 цагт “ЯАРАЛТАЙ ЦУГЛАРАХ ДОХИО”-гоор эхэлсэн юм. Томилгоот бүрэлдэхүүн өгөгдсөн цагийн байдлын дагуу штабын дадлагыг хийж гүйцэтгэлээ. Тус байгууллагуудын гамшиг, аюулт үзэгдэл, ослын үед хариу арга хэмжээг шуурхай зохион байгуулах төлөвлөлт, гамшгийн үеийн удирдлага зохион байгуулалт, гамшгийн үед үүрэг гүйцэтгэх хүн, техник, багаж хэрэгсэл, бараа, материалын нөөц, шаардлагатай хөрөнгө зардал, бэрхшээлийг хэрхэн тодорхойлсон зэрэг байдлыг үнэлэн, зааварчилгаа өгч ажиллалаа. 

Онцгой байдлын ерөнхий газраас Барилга, хот байгуулалтын Улсын албанд явуулж буй “Бэлэн байдлын үзлэг”-ийн сүүлийн шат 2023.09.21-ний өдөр болж өндөрлөлөө. Тус үзлэгийн хүрээнд Барилга, хот байгуулалтын яамны Улсын албаны Шуурхай штаб, мэргэжлийн ангийн бүрэлдэхүүнд газар хөдлөлтийн гамшгийн нөхцөл байдал сэдвээр “ЦАГИЙН БАЙДАЛ” өгч Улсын алба гамшгаас хамгаалах төлөвлөгөөгөө хэрэгжүүлэх буй байдал, хүч нэмэгдүүлэх болон холбоо мэдээллийн үйл ажиллагааг хэрхэн зохион байгуулж байгааг хянаж, мэргэжлийн заавар, зөвлөгөө өгч ажиллалаа. 

Барилга, хот байгуулалтын Улсын алба гамшгаас сэргийлэх бэлэн байдлын үзлэгээр сайн үр дүн үзүүлж ажиллалаа гэдгийг ажлын хэсгийн ахлагч, Онцгой байдлын ерөнхий газрын Ажиллагааны удирдлагын хэлтсийн дарга, хурандаа Б.Мягмардорж онцлосон юм. 

Мөн Барилга, хот байгуулалтын Улсын алба нь “БАРИЛГЫН САЛБАР ГАМШГИЙН ЭСРЭГ ХАМТДАА” уриаг дэвшүүлж, үзлэгт бэлтгэл сайн хангаж, идэвхи санаачлагатай, зохион байгуулалт сайтай оролцсонд талархал илэрхийлж, цаашид анхаарч сайжруулах ажиллагаануудын хүрээнд мэргэжлийн байгууллагын зөвлөмжийг өгөв. Түүнчлэн ОБЕГ гамшгийн эрсдэлээс хамгаалах үйл ажиллагаанд БХБУА-тай хамтран ажиллахад бэлэн гэдгээ илэрхийлэв.