Барилга угсралт, их засварын ажлын гүйцэтгэл 2023 оны эхний хагас жилд 3037.8 тэрбум төгрөг болж, 2999.5 (98.7%) тэрбум төгрөгийн ажлыг дотоодын барилгын байгууллага, 38.3 (1.3%) тэрбум төгрөгийн ажлыг гадаадын барилгын байгууллага гүйцэтгэсэн байна. Барилга угсралт, их засварын ажлын урьдчилсан гүйцэтгэл 2023 оны эхний хагас жилд өмнөх оны мөн үеэс 626.9 (26.0%) тэрбум төгрөгөөр өсөхөд дотоодын байгууллагын барилгын гүйцэтгэсэн барилга угсралт, их засварын ажил 645.5 (27.4%) тэрбум төгрөгөөр өссөн нь голлон нөлөөлөв.

Дотоодын барилгын байгууллагаас хувийн байгууллагын гүйцэтгэсэн барилга угсралт, их засварын ажил 2.9 их наяд төгрөг болж, өмнөх оны мөн үеэс 662.7 (29.0%) тэрбум төгрөгөөр, гадаадтай хамтарсан байгууллагынх 28.7 тэрбум төгрөг болж, 12.3 (74.5%) тэрбум төгрөгөөр тус тус өссөн байна. Харин төрийн байгууллагын гүйцэтгэсэн барилга угсралт, их засварын ажил 24.6 тэрбум төгрөг болж, өмнөх оны мөн үеэс 29.5 (54.5%) тэрбум төгрөгөөр буурсан байна.

Энэ оны эхний хагас жилд барилга угсралт, их засварын ажлын 41.2 хувийг орон сууцны барилга, 34.8 хувийг орон сууцны бус барилга, 21.4 хувийг инженерийн барилга, байгууламж, 2.6 хувийг их засварын ажил эзэлж, өмнөх оны мөн үеэс орон сууцны бус барилгын ажлын эзлэх хувь 6.0 нэгж хувиар, их засварын ажил 0.1 нэгж хувиар өссөн бол инженерийн барилга, байгууламжийнх 5.2 нэгж хувиар, орон сууцны барилгынх 0.8 нэгж хувиар тус тус буурсан байна.

Орон сууцны бус барилгын ажил 2023 оны эхний хагас жилд 1057.1 тэрбум төгрөг болж, өмнөх оны мөн үеэс 362.4 (52.2%) тэрбум төгрөгөөр өссөн байна. Үүнд үйлдвэрийн барилгын ажил 139.2 (46.9%) тэрбум төгрөгөөр, сургууль соёлын барилгын ажил 95.6 (62.7%) тэрбум төгрөгөөр, бусад орон сууцны бус барилгынх 76.8 (56.6%) тэрбум төгрөгөөр, эмнэлгийн барилгынх 27.2 (2.0 дахин) тэрбум төгрөгөөр, худалдаа, үйлчилгээний барилгын ажил 23.6 (28.4%) тэрбум төгрөгөөр тус тус өссөн байна.

Улаанбаатар хотод 2023 оны эхний хагас жилд 1.4 их наяд төгрөгийн барилга угсралт, их засварын ажил хийгдсэн нь улсын дүнд 46.9 хувийг эзэлж, өмнөх оны мөн үеэс 0.8 нэгж хувиар өссөн байна.

Дотоодын барилгын байгууллагын гүйцэтгэсэн барилга угсралт, их засварын ажил 2023 оны эхний хагас жилийн гүйцэтгэлээр Өмнөговь аймагт 730.6 тэрбум төгрөг, Хэнтий аймагт 118.8 тэрбум төгрөг болж, эдгээр аймгуудад хийгдэж, барилга угсралтын ажлын дүнд 53.4 хувийг эзэлж байна. Өмнөговь аймгийн нутаг дэвсгэрт Оюу толгойн далд уурхайн бүтээн байгуулалтын ажил төмөр зам болон автозамын ажлууд, Хэнтий аймагт дулааны станц, дулаан дамжуулах үйлдвэрийн барилга, угсралтын ажил, Орхон аймагт Эрдэнэт үйлдвэрийн барилгын өргөтгөлийн ажил, орон сууцны барилгын ажлууд эрчимтэй явагдсан байна.