Шинэ үеийн барилгын салбар үүсэж хөгжсөний түүхт 97 жилийн ойн баярыг тохиолдуулан Барилгын ханган нийлүүлэгчдийн зөвлөлөөс “Эдийн засаг ба Барилгын салбар” сэдэвт уулзалт арга хэмжээг өнөөдөр зохион байгууллаа. 

Арга хэмжээг нээж Барилгын ханган нийлүүлэгчдийн зөвлөлийн тэргүүн Г.Батсүх үг хэллээ. Тэрээр "Монгол улсын эдийн засаг өсөлттэй байгаа ч 2023 онд барилгын салбар төдийлөн сайнгүй байна. Мөн төсвийн хөрөнгө оруулалтаар эхэлж байгаа барилга байгууламж багассан төдийгүй барилгын салбарт зээл олгохгүй байгаа юм. Салбарын борлуулалт өмнөх оноос эрс буурснаас барилгын төсөл хэрэгжүүлэгчид, гүйцэтгэгчид, ханган нийлүүлэгчдийн хооронд бартерын харилцаанд улам гүнзгий оруулж, бэлэн мөнгөний хомсдолоос болж цусны эргэлтгүй болоход хүрч байна" хэмээн ярьсан юм. 

Зочин илтгэгч СЭЗИСургуулийн багш, Доктор, профессор Ж.Дэлгэрсайхан оролцож “Эдийн засгийн өнөөгийн нөхцөл байдал барилгын салбарт нөлөөлөх нь” сэдвээр илтгэл тавьж, оролцогчдын асуултад хариулж хэлэлцүүлэг өрнөсөн юм. 

Тус уулзалт арга хэмжээнд барилгын салбарын бизнес эрхлэгчид, эдийн засагч судлаачид, төрийн бус байгууллагын төлөөллүүд оролцож эдийн засгийн нөхцөл байдал барилгын салбарт хэрхэн нөлөөлж байгаа талаар болон барилгын материал, орон сууцны зах зээлийн өнөөгийн нөхцөл байдал цаашдын чиг хандлагын талаар ярилцаж хэлэлцлээ. Мөн Барилгын ханган нийлүүлэгчдийн зөвлөлийн гишүүн байгууллага болон элсэж байгаа компаниудад сертификат олголоо.