Туул болон Сэлбэ голын ай сав газар дахь барилга байгууламжийн улмаас Сэлбэ гол үерлэж, иргэдэд их хэмжээний хохирол учирсан билээ. Тэгвэл эл асуудалтай холбоотойгоор Хотын дарга Д.Сумъяабазар Акуа Гарден, "S'Outlets" болон "Шунхлай" ШТС-ын барилгыг албадан буух захирамжийг гаргасан юм.

Уг асуудлыг хариуцсан Ажлын хэсгийг нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн хариуцаж буй. Түүнээс одоогийн нөхцөл байдлыг лавлахад "Хуулийн хүрээнд мэдэгдэл хүргүүлэхээр ажиллаж байна" хэмээсэн юм.

Харин "Шунхлай" ХХК-ийн зүгээс "Манай талаас тухайн хэсэгт барьсан ШТС-аа нүүлгэх шийдвэр гаргасан. Хотын зүгээс нүүлгэх газрын асуудлыг шийдэж өгөхөөр болсон. Тиймээс газар бэлэн болсон цагт шууд нүүх болно. Одоогоор хэзээ, хэрхэн нүүх хугацааг эцсийн байдлаар тодорхой болоогүй байгаа. Нүүлгэлтийн зардлыг манай талаас 100 хувь гаргана" хэмээсэн билээ.

Акуа Гарден төслийн захирал А.Амарбаясгалан "Бидний хувьд шүүхээр асуудлыг шийдвэрлүүлэх болно" хэмээн хэвлэлийн хурлынхаа үеэр мэдээлсэн юм.

Эх сурвалж: https://eguur.mn/431630/