Энэ удаагийн VIP ярилцлагадаа Росторг ХХК - ийн гүйцэтгэх захирал, хөрөнгө оруулагчдын нэг Э.Амгаланг урилаа. Гадаад хэлний боловсрол өндөртэй тэрээр бага залуугаасаа олон улсын түвшинд ажиллаж эхэлсэн бөгөөд өдгөө барилгын салбартаа нэр хүндтэй, амжилттай бизнесмэн болжээ.

Монголын урлагийн алдарт гэр бүлийн хүү, бизнесийн салбарт амжилттай яваа тантай уулзаж байгаадаа баяртай байна? 

Миний аав МУСГЗ Р.Энхбазар сансарт Монголын анхны хүн нисэхэд зориулсан дууны тэмцээнд –“Сансрын нисгэгч ахаа сайн яваад ирэв үү”... гэсэн  “Угтагчийн дуу” дуугаараа түрүүлсэн ба “Дэлхий ээж” “Эр хүн” гэх зэрэг олон дуунуудын хөгжмийн зохиолыг бичсэн хүн байсан. Харин ээж маань Монголын анхны балетын бүжигчдийн нэг МУГЖ Т.Туул. Ийм гайхалтай урлагийн гэр бүлд өсөж хүмүүжсэн дээ. 

Та бизнесмений замыг сонгожээ. Урлагт татагдаагүй юу? 

Би бага байхдаа пионерын зусланд дуулж бүжиглэж  урлагийн тоглолтод оролцдог байлаа. Би аавынхаа хэдэн зохиолыг төгөлдөр хуур дээр тоглохоос цаашлахгүй дээ. Багадаа урлаг гэхээсээ илүү хөл бөмбөг, сагс тоглодог, спортоор хичээллэх дуртай хүүхэд байсан. 1993 онд Австрид Моцартын төрсөн хот гэж ярьдаг Зальцбург /Salzburg/ хотод аялал жуулчлалын чиглэлээр суралцаж байхдаа сагсан бөмбөгийн Bulls багт тоглодог байсан. Магадгүй гаднын улсад тоглосон анхны Монгол тоглогч байсан болов уу. /инээв/ Бид багаараа олон хотуудаар явж тоглоно. Сардаа 100 долларын цалин авдаг байлаа. Тухайн үеийн 100 доллар одоогийн 100 доллартай харьцуулшгүй их мөнгө байсан. 

Таныг багш байсан гэж сонссон. Салбараа яагаад өөрчлөх болсон бэ? 

Тийм ээ, би багш мэргэжилтэй. Багшийн дээд сургуулийг төгсөөд томилолтоор Шарын гол суманд нэг сайхан сургуульд ажиллаж эхэлсэн. Хөдөө орон  нутаг гэхэд маш сайхан тохижилттой газар байсан. Би дунд сургуульд орос, англи хэл заадаг байв. 

1990 оноос Улаанбаатарт их сургуульд гадаад харилцааны хэлтэст мөн Энхтайваны корпус хэмээх Америкийн байгууллагад давхар ажилладаг болсон. Амьдралын хэрэгцээ шаардлагаар бизнесийн саналууд орж ирснээр багшийн ажлаа орхисон. 

Таны удирдах арга барилд багш хүний ур чадвар нөлөөлсөн үү? 

Багш байх уг нь сайхан л даа... Цаашдын ажилд маань их туршлага болсон юм.  Ангийнхаа хүүхдүүдтэй харьцах, ажлын хамт олонтойгоо ойлголцдог байсан нь цаашдын удирдах ажилд нөлөөлсөн гэж боддог. Аялал жуулчлал, барилга ер нь бизнесийн аль ч  салбарт ажилласан ч хүмүүстэй эв дүйтэй ажиллах л хэрэгтэй байдаг.

Одоо  хэчнээн компани удирдаж байна? 

1996 оноос хойш аялал жуулчлалын чиглэлээр компани байгуулж, одоог хүртэл тогтвортой үйл ажиллагаа явуулж байгаа. 2012 оноос “Росторг” ХХК - ийг үүсгэн байгуулж, 11 дэх жилийнхээ нүүрийг үзэж байна. Одоо энэ компани маань өргөжөөд хүнсний чиглэлийн Branch , сантехникийн чиглэлийн “Aqua Росторг” компани ажиллуулж байна. 

Шинэ бизнес эхлэхэд Монголын зах зээлийн суурь судалгаа хангалттай байна уу? 

Росторг ХХК үйл ажиллагаагаа эхлүүлэхдээ 2010 оноос хойш Монголын зах зээлийг судалсан. Тухайн үед Хятадын чанаргүй бараа материал 100 айлаар дүүрчихсэн байсан. Айл болгон дээврээ жил бүр сольдог байсан учраас үүнийг өөрчилье гэсэн зорилготой бизнесээ эхлүүлсэн. Эхний ээлжид чанартай материал үнэтэй гэдэг утгаараа зах зээл шууд хүлээж авахад хэцүү байв. 2012 оноос рублийн ханш унаж чанартай сайн материалууд маань хямд үнэтэй болсон нь бидний хувьд аз тохиосон гэж хэлж болох юм. Боломжийн үнээр чанартай материал авах зах зээлийн эрэлт ч их байсан учраас хүмүүст санал болгож, борлуулалт эхэлсэн өдрөөс л гүйлгээ маш эрчимтэй явж эхэлсэн. Бид судалгааны үндсэн дээр  Монголд байхгүй шинэ материал нэвтрүүлдэг нь манай онцлог юм. Мөн Росторг олон жил ажиллахдаа ганцаараа хөгжиж дэвшээгүй. Дилерийн сүлжээ буюу бизнес эрхэлдэг хувь хүн болон компаниудын 150 гаруй сүлжээг бий болгосон. Энэ сүлжээний 90 хувь нь Улаанбаатар хотод, 10 гаруй хувь хөдөө орон нутагт байдаг. Өөрөөр хэлбэл, худалдаа эрхлэх хүсэлтэй хүмүүс маань манай байгууллагаас явуулж байгаа сургалтад хамрагдаад, бараа бүтээгдэхүүнээ авч борлуулдаг гэсэн үг. Дархан, Эрдэнэт хотод салбараа нээгээд 8 жил болж байна. Ингэснээр харилцагчид маань вагоноор шууд Дархан, Эрдэнэт хотод бараагаа буулгаж аваад, Улаанбаатар хотын үнээр борлуулах боломжийг олгож байгаа юм. Үүнийг бусад аймгуудад хэрэгжүүлэхэд зам тээврийн асуудлаас болоод хэцүү байна. 

Энэ бизнес амжилттай болсны нэг гол түлхүүр бол боловсон хүчин гэж боддог. Тухайн үед зах зээл дээр мэргэжлийн боловсон хүчин үгүйлэгдэж эхэлсэн. Өнөөдөр ч энэ асуудал байсаар байна. Тиймээс бид өнгөрсөн хугацаанд мэргэжилтнүүдээ үргэлж сургаж, бэлтгэж ирсэн юм. 

Хэчнээн төрлийн бүтээгдэхүүнийг зах зээл дээр санал болгож байгаа вэ? 

2500 орчим төрлийн бүтээгдэхүүнийг зах зээл дээр санал болгож байгаа. Жил болгон шинэ судалгаан дээр үндэслээд 5-6 бүтээгдэхүүнийг оруулж ирдэг. Хамгийн сүүлд гэхэд 2022 онд Aqua Росторг буюу сантехникийн цогц шийдлийг санал болгож эхэлсэн. Энэ нь зөвхөн зарж борлуулахаас гадна бараа бүтээгдэхүүнээ угсарч суурилуулах, эргээд засварлах, сольж өгөх гээд бүрэн үйлчилгээ үзүүлдэг юм. 

Ханган нийлүүлэгчдийн гол асуудал бол чанар. Тиймээс чанар стандартыг барих ёстой хэмжээнд нь байлгаж, үнийн уян хатан бодлоготой ажиллахыг зорьдог юм. Манайхан ямар ч төлөвлөгөөгүй шууд л худалдан авалт хийх сонирхолтой учраас судалгаан дээр суурилаад эрэлттэй байгаа бүтээгдэхүүнээ агуулахдаа бэлэн байлгахыг хичээдэг.  

Судалгаанаас үзвэл барилгын материалын зах зээлд ирээдүйд ямар материал илүү эрэлттэй байна гэж харж байна вэ? 

Хүмүүсийн эрэлт хэрэгцээ бол байнга өөрчлөгдөж байдаг. Одоо цагт байгальд ээлтэй, эко, ногоон бүтээгдэхүүнүүд хэрэгцээтэй болж байна. Энэ ч ирээдүй гэдэг нь тодорхой. Тиймээс энэ чиглэлийн материалуудын эрэлт илүү нэмэгдэнэ гэж харж байгаа. 

Үүнтэй холбоотойгоор дэлхийн банкны “Цэвэр агаар аян” -д эко дулаалгын болон бусад материалаар оролцож ажилласан. Манай байгууллага уг төслийн материал нийлүүлэлтийг 90 хувийг хангасан. Энэ төсөл 2016 оноос эхэлсэн бөгөөд гол нь Улаанбаатар хотын агаарын бохирдлыг бууруулахад үр дүнтэй арга хэмжээ болсон юм. Стандартын дагуу дулаалгын материал ашиглаж, үйлдвэрлэсэн дулааныг  алдагдуулахгүй, эрчим хүчийг хэмнэлттэй болгоход гол зорилго нь оршиж байгаа юм. 

Гаальтай машинаар их хэмжээний материал татваргүй орж ирж байна. Албан ёсоор, татвараа төлдөг компанийн хувьд шударга өрсөлдөөн талаасаа хэрхэн харж байна вэ? 

Татвар бол улс хөгжин тогтноход маш чухал үүрэгтэй . Манай компани барилгын материал их хэмжээгээр оруулж ирэхийн зэрэгцээ сертификат, шинжилгээ, татвар гээд л бүх зүйл нь “шилэн” байдаг. Гар доорх материалаас харахад 2016 оноос хойш улсад 24,5 тэрбум ба энэ оны эхний хагас жилд гэхэд л 3,6 тэрбум төгрөгийн татвар төлсөн байна. Гаальтай машины хувьд бол  бараа бүтээгдэхүүн татваргүйгээр орж ирдэг нь түр зуур амиа аргацаасан юм шиг санагддаг.  Иээдүйгүй зүйл. Тиймээс ганц нэг удаагийн асуудалд анхаарал хандуулахаас илүүтэй  тогтвортой хангамж, чанар, орлуулах боломж, дэлхийд шинэ гарсан инновац юу байна гэдэгт анхаарч ажиллах нь зөв гэж боддог

Хэн нэг нь албан ёсны сайн материал оруулж ирээд борлуулалт сайтай байвал өөр хэн нэгэн Хятадаас дуураймлыг нь авчирдаг нь нийтлэг үзэгдэл. Ингэснээр албан ёсны чанартай бүтээгдэхүүнийхээ нэр хүндийг унагааж, үнэ цэнийг нь бууруулж, хэрэглэгчдэд ташаа ойлголт төрүүлдэг нь хүндрэлтэй. Тиймээс үүнийг засаж, зөв бодлогод оруулах ёстой улсын байгууллагууд ажлаа сайн хийгээсэй гэж бодож байна. 

Барилгын салбарынхан маань маркетингаа хийхдээ их маруухан санагддаг. Таны хувьд маркетингаа хэрхэн хийдэг вэ? 

Хэрэглэгчдэд зөвхөн материал нийлүүлэх бус мэдлэг түгээх нь чухал гэдгийг маш сайн ойлгосон. Тийм ч учраас маркетингийн хэлтэс маань “Росторг Медиа” гэж нээгээд бараг жижигхэн студийн хэмжээнд ажилладаг юм. Маркетингийн баг маань сайн ажилладаг гэж би боддог.  Гаднаас ирж байгаа шинэ бараа бүтээгдэхүүний химийн орц, найрлага, хэрхэн ашиглах, угсрах гэх мэт талаар зааварчилгаа бүхий  5-10 минутын бичлэг хийж, хэрэглэгчдэдээ Олон улсаас мэргэжилтэн урьж сургалт ордог. Жишээ нь дээвэр худалдаж авсан хүн видеогоо үзээд зааврын дагуу зөв барих боломжтой болсон гэсэн үг. Зарчихсан л бол боллоо гэж суух биш хэрэглэгч маань зөв хийгээд, олон жил ашиглаасай гэж хүсдэг учраас үүнийг хийдэг. 

Бид хэрэглэгчдээсээ судалгаа авахад манайхаас бараа худалдан авсан хүн мэргэжлийн бус “Би чадна” - уудад хандаж угсралтаа хийлгэдэг юм билээ. Тэд дураараа угсраад, өнөөх нь жилийн насгүй хийгддэг. Тиймээс манай байгууллага тэдгээр хүмүүст мэдлэг, туршлага олгох үнэ төлбөргүй сургалт явуулж байгаа төдийгүй эдгээр хүмүүс манайхаас бүтээгдэхүүнээ авч хамтран ажиллах үндэс бий болсон. Мөн хамтрагч байгууллагууддаа хэрхэн зөв угсарч, ашиглах талаар сургалт ч ордог. Томоохон компаниуд  энэ сургалтад бас хамрагддаг юм. 

Гаднын байгууллагын хэчнээн хамтрагчтай вэ? 

Орос, Солонгос, Япон, Герман, Испани гэх зэрэг орнуудтай  хамтарч ажилладаг. Жил болгон ажлаа өргөжүүлэхийг  эрмэлздэг.

ОХУ-ын дайны нөхцөл байдал ямар байгаа вэ? Тээврийн асуудал гарч байна уу? 

ОХУ-д дайн болж байгаа нь ажлаа урьдчилан төлөвлөж цэгцтэй явуулахад хүндрэлтэй байна. Үүнээс болоод хил гааль хаагдвал эрсдэл гарч болзошгүй. Тээврийн асуудлууд гарч хамгийн гол нь төлбөр тооцоо хийхэд бэрхшээлтэй болно. Мөн рублийн бүх данс, шилжүүлэг хаагдсан учраас мөнгөө шилжүүлэх гэдэг маш том асуудал болж байгаа. 

Зарим банк юаниар шилжүүлэх боломж гаргаж байгаа ч тухайн мөнгө алга болсон тохиолдолд “банк хариуцлага хүлээхгүй” гэсэн гарын үсэг зуруулсны үндсэн дээр шилжүүлэг хийж байна. Энэ нь өөрөө маш өндөр эрсдэлтэй. 

Дайн гэдэг хугацаатай. Тодорхой хугацааны дараа дуусах байх. 

Гаднын компанитай хэлэлцээр хийхдээ өөрийнхөө талд ашигтай, давуу байдлыг хэрхэн бий болгодог вэ? 

Миний хувьд 1990 оноос хойш гаднын байгууллагатай харилцах ажлыг хийж ирсэн. Гадаад харилцааны хэлтэст гадаад эксперант оюутнуудыг хариуцсан ажилтан, аялал жуулчлалын чиглэлээр “Жуулчин” компанид Европын зах зээл хариуцсан менежерээр ажиллаж байсан. Австрид сургуулиа төгсөж ирээд өөрийн компаниа нээсэн. Өөрөөр хэлбэл, бараг ажлын гараанаасаа эхлээд гадаад хүмүүстэй харилцаж, гэрээ хэлэлцээр хийж ажилласан гэсэн үг. Миний хувьд энэ тал дээр баримталдаг зарчим, онол, ямар нэгэн дүрэм, нууц гэх зүйл байхгүй. Ганцхан хүний итгэлийг дааж, үнэн шударга байж, түүнийхээ үнэ цэн дээр олон жил ажиллах зорилготой. Би банк, гоо сайхан, аялал жуулчлал олон салбарт ажилласан ч бүх цаг үед ийм л зарчмаар ажилласан. 

2016 оноос хойш эксклюзив буюу зөвхөн манайхаар дамжуулан Монголын зах зээл дээр бүтээгдэхүүнээ борлуулах эрхийг гэрээн дээрээ тусгаж ажиллах болсон. Ийм гэрээгээр ажиллаж буй компаниуд маань ч харамсдаггүй. Энэ нь өөрийн тань хэлснээр давуу талыг өөрийн талд бий болгож буй нэг жишээ байх. Шинэ бүтээгдэхүүн нэвтрүүлэн зах зээлээ өөрчилж, түүнийг хүлээж авч буй хэрэглэгчдээ хараад маш их ажиллах урам авдаг. 

Монгол бизнесийн орчин бусад улсуудыг бодвол хэр вэ? Татварын бодлогын хувьд? 

Бизнест ээлгүй нөхцөл ихтэй, хэцүүхэн санагддаг. Монголд шинэ материал нэвтрүүлэхэд захиргааны арга хэмжээгээр хорьдог. Захиргааны арга хэмжээ нь сарын дараа хариугаа аваарай гэнэ. Уг нь бизнест цаг хугацаа, өдөр бүр үнэ цэнтэй шүү дээ. Мэдээж шинэ бүтээгдэхүүн ямар ч эрсдэл дагуулж болох учраас нэг бодлын зөв. Гэхдээ богино хугацаанд лабораториор шинжлүүлээд хариуг нь гаргах хэрэгтэй байгаа юм.  Бүх баримтууд эхнээсээ цахимжаад өөрчлөгдөж л байгаа учраас ирээдүйд илүү сайхан болно гэдэгт найдаж байгаа. 

Харин татварын хувьд орлогын 10 хувь гэдэг боломжийн санагддаг. Гэвч төлсөн татварыг маань яаж ашиглаж байгаа нь хамгийн том асуудал. Энэ олон хүний хүч хөдөлмөөр төлөгдөж буй татварыг зөв зүйлд, нийгмийн сайн сайхны төлөө зарцуулж байгаа цагт харамсах зүйлгүй, сэтгэл дүүрэн байна шүү дээ. 

Мөн энд нэг зүйл дурдахад улсаас гаргаж буй бодлогууд маш ерөнхий байгаагаас шалтгаалан аж ахуй нэгжүүд хохирч байна. Жишээ нь манай компанийн импортолдог гол бүтээгдэхүүний нэг бол өнгөлгөөний тоосго юм. Энэ нь цагаан улаан өнгийн шавраар хийгддэг бөгөөд манай улсад огт үйлдвэрлэгддэггүй. Гэтэл Монголд дотоодын үйлдвэрлэлээ дэмжих зорилгоор ижил төстэй материалыг татварыг нэмсэн. Манай улс тоосго гэдэг ерөнхий нэршилдээ энэхүү өнгөлгөөний тоосгыг оруулаад 20 хувийн татвар  авдаг болсноор энэ төрлийн тоосгоны үнэ 32 хувийн нэмэгдэл орж ирж байна. Энэ шийдвэрийн үр дүнд байшингаа барьж буй энгийн хүмүүс л ачааг нь үүрч байгаа. Бизнест хэрхэн нөлөө үзүүлж байгаа нь  тодорхой шүү дээ. 

Зах зээлд шинэ материал нутагшуулахад анхаарах зүйл юу вэ? 

Судалгаа хамгийн чухал. Зах зээлээ судлаад ямар бүтээгдэхүүн оруулж ирэхээ шийдэх хэрэгтэй. Тухайн материал нь өөрчлөлт авчрах, хүмүүст хэрэгтэй зүйл мөн үү гэдгийг бодож үзэх ёстой. Жишээ нь дулаалгын материал оруулж ирлээ гэхэд одоогийн зах зээл дээр байгаа материалуудаас юугаараа давуу талтай, юугаараа хэмнэлттэй гэдгийг оруулж ирэхээсээ өмнө судлах нь чухал. Хэрвээ бүтээгдэхүүнээ таниулах түгээх зэрэг зөв менежмент хийж чадвал бүтээгдэхүүн чинь өөрөө зах зээл дээр байр сууриа эзэлчихдэг.  

Таны ярьснаас харахад залуудаа их завгүй ажилладаг байсан бололтой. Одоо цагийн менежмент хэр вэ? 

Одоо цагт нэг хүнээс шалтгаалах бизнес гэж байхгүй болжээ. Хамтын ажиллагаа маш чухал. Залуу байхдаа олон ажил хийгээд гүйдэг байлаа. Гэхдээ үүнийхээ үр дүнд ажлын туршлага хуримтлуулсан бөгөөд одоо энэ нь үр бүтээлтэй ажиллахад хэрэг болж байна. Би ажлаа ерөнхийд нь гаднаас нь харж дүгнэж зохицуулахыг эрмэлздэг.

Өөрийн хамт олон, ажиллах багаа хэрхэн бүрдүүлдэг вэ? Өөрийгөө хүн танихдаа хэр гэж боддог вэ? 

Хүнийг танина гэдэг их хэцүү. Зөв хүнээ зөв ажилд тавина гэдэг шийдвэрийн эхний зөв алхам. Шинэ ажилтнаа зөвхөн мэргэжлийн талаас нь төдийгүй бусадтай хэр нийцтэй хамтарч ажиллаж чадаж байгааг нь анхаардаг. Мөн өөрийнхөө орчныг яаж бүрдүүлж буйг ажигладаг. Хэчнээн мэргэжлийн ур чадвартай байлаа гээд хамт олонтойгоо нийцэхгүй, харилцааны асуудалтай байвал ажил явахгүй шүү дээ. Орчин үед багаар нэг зорилгод нэгдэн ажиллаж байж амжилтад хүрэх болсон. 

Улсын байгууллага, хувийн компани гэж тусгаарлахгүй байх нь зөв гэж боддог. БХБЯ 10 жилийн өмнөхөө ирээдүйгээ харж, бодлогоо тодорхойлдог. Өнөөдрийн нөхцөл байдлаа сайжруулах, засахгүй бол ямар ч сайхан ирээдүйг төлөвлөөд нэмэргүй санагддаг. Тиймээс төр хувийн хэвшлийн хамтын ажиллагаа маш чухал. 

Манай төр 4 жилийн хугацаатай учраас нам нь ч хүн нь ч өөрчлөгдөөд нэг намынхаа хийж байгаа ажлыг нөгөө нам нь унагаадаг. Энэ нь богино хугацаанд ашиг хонжоо хайж буй хүмүүст хамаагүй, нөлөө ч үгүй. Харин урт хугацаанд тогтвортой бизнес эрхэлж байгаа хүмүүстээ халгайтай санагддаг. Уг нь засгийн газрын бодлого чиглэлтэй уялдуулж, ирээдүйгээ харж, төлөвлөж ажиллана. Гэвч 4 жил болоод л өөрчлөгддөг. Бүтээн байгуулалт гэдэг ийм богино хугацаанд бий болдог зүйл биш шүү дээ. 

Та бизнесээ босгохын тулд хэр их өөрийгөө дайчилсан бэ? Илүү ажиллахад ямар хүчин зүйл нөлөөлсөн бэ? 

Би багаасаа л сайн хүн болох юмсан  эцэг эхдээ тустай, улс орондоо ч хэрэгтэй хүн болох юмсан гэж мөрөөддөг байсан. Энэ бол миний зорилго байсан учраас би их хичээдэг байлаа. Ер нь энэ зорилгоо хэрэгжүүлсэн гэж учраас өөрийгөө азтай хүн гэж боддог. 

Таны баримталдаг зарчим юу вэ? 

Олон улс орноор явлаа, олон ч хүнтэй танилцлаа. Энэ олон жилүүдэд өөрөөрөө байж, хэлсэн үгэндээ эзэн болж, үнэн бодит мэдээллийг өгөх зарчмыг баримталж ирсэн бөгөөд бизнес ч намайг шударга зарчимд сургасан гэж боддог

Та одоо ч спортоор хичээллэдэг хэвээрээ юу? 

Завгүй ажиллаад спортоосоо хөндийрсөн. Гэхдээ одоо өөртөө зориуд цаг гаргаж эргээд спорт руугаа орж байгаа. 7 хоног бүр сагс, хөл бөмбөг тоглож байна. Эргээд дуртай зүйл рүүгээ татагдаж байна. Би Барилга МН - ээс зохион байгуулдаг биллярдны тэмцээнд жил болгон оролцдог.

Та залуугаасаа олон улстай харьцаж байсан болохоор бизнес болон аяллаар олон орноор аялсан уу?

Аялах их дуртай. 50 гаруй орноор аялсан. Ихэнх нь бизнесийн шугамаар явдаг учраас зарим улсад 10-20 удаа очсон тохиолдол ч байна. Ялангуяа Европын орон руу бизнесийн чиглэлээр жил болгон л явдаг. 

Ирээдүйд та барилгын салбартаа хийх томоохон ажил, өөрийн зүгээс оруулах хөрөнгө оруулалт юу байх вэ? 

Ер нь барилга гэдэг бол хүний амьдралын нэг салшгүй хэсэг болохоор чанартай , хүнд аюулгүй , тохь тухтай байх ёстой. Иймээс ирээдүйд барилгын салбарыг иж бүрэн хөгжүүлэхэд хувь нэмрээ оруулахын төлөө ажиллана.

Бидэнтэй өөрийн үзэл бодол, ололт амжилтаа хуваалцсан танд маш их баярлалаа. Цаашдын ажил хөдөлмөрт тань илүү их амжилтыг хүсэн ерөөе.