Барилга, хот байгуулалтын сайдын 2023 оны 07 дугаар сарын 31-ны өдрийн 178 тоот тушаалаар барилгын материалын чанар, аюулгүй байдлыг хангуулах хүрээнд барилгын материал үйлдвэрлэгч, импортлогч, ханган нийлүүлэгч аж ахуйн нэгж, байгууллагуудад улирал тутам хяналт шалгалт хийх ажлын хэсгийг байгууллаа. 

Тус ажлын хэсгийн бүрэлдэхүүнд "Барилгын ханган нийлүүлэгчдийн зөвлөл”-ийн төлөөлөл ажиллаж байна. 

Тухайн ажлын хэсгийн хяналт шалгалтын чиглэл, үйл ажиллагааг дурдвал: 

• Элс, хайрга, дайрга болон импортоор оруулж ирж борлуулж буй арматур болон төмөр хийц эдлэлд аж ахуйн нэгж, байгууллагуудын бүтээгдэхүүн нь чанар стандартын шаардлага хангаж байгаа эсэхэд лабораторийн болон биет хяналт шалгалтыг хийх; 

• Барилгын материал болох Элс, хайрга, дайрганы үйлдвэрүүдийн үйл ажиллагаа болон түүхий эдийн чанар стандартыг хангаж буй эсэхэд хяналт шалгалт хийх; 

• Арматур болон төмөр хийц эдлэлд чанар аюулгүй байдлын хяналт шалгалт хийх; 

• Үйлдвэрлэгчийн хувьд тусгай зөвшөөрөлтэй үйл ажиллагаа явуулж буй эсэх

• Барилгын тухай хуулийн 20.3.5-д "барилгын материал үйлдвэрлэгч хуулийн этгээдийн тухайд тохирлын гэрчилгээ.” Мөн хуулийн 40.1.20-д "гарал үүсэл, тохирлын гэрчилгээтэй барилгын материал хэрэглэх" гэж заасны дагуу үйлдвэрлэгч, импортлогч нарыг тохирлын гэрчилгээтэй бүтээгдэхүүн үйлдвэрлэж, нийлүүлж буй эсэхэд хяналт, шалгалт хийх; 

• Барилгын тухай хуулийн 37.1.-д 43.1.5-д "үйлдвэрлэсэн барилгын материал, бүтээгдэхүүнийхээ чанарын үндсэн үзүүлэлтийг тодорхойлох лабораторитой байх, хяналт тавих” гэж тус тус заасны дагуу барилгын ажлын үе шат бүрд хөндлөнгийн лабораторийн шинжилгээгээр материал, хийц, бүтээц, эдлэхүүний чанар, аюулгүй байдлын техникийн үзүүлэлтүүдийг тодорхойлуулж ажиллаж байгаа эсэхэд хяналт, шалгалт хийх; 

• Барилгын материал, хийц бүтээц, эдлэхүүний үйлдвэр, аж ахуйн нэгж байгууллагын үйлдвэрлэлийн технологи, бүтээгдэхүүний чанар, гүйцэтгэлд хяналт тавих. 

Ажлын хэсгийн үйл ажиллагааг шуурхай зохион байгуулж, үр дүнг тухай бүр сайдын шуурхай хуралдаанд танилцуулж, арга хэмжээг авч ажиллахыг холбогдох ажлын хэсэгт даалгасан бөгөөд ажлын хэсэг 2023 оны 08 дугаар сарын 02 ны өдрөөс эхлэн шалгалтын ажлыг эхлүүлээд байна.