Зуслангийн байшингийнхаа дотор болон гадна зай талбайдаа хүүхдүүддээ болон өөртөө зориулан 250 кг хүртэлх даацтай дугуй савлуурыг хийгээрэй. 

Дугуй хэлбэрт дүүжин савлуур нь бусад савлууруудаас илүү загварлаг мөн содон сонирхолтой бөгөөд савлуурыг гадаа саравчинд эсвэл гэрийнхээ таазанд суурилуулах боломжтой. Хурц өнцөг булангүй, бат бөх даавуугаар хийгдэх учраас хүүхэд гэмтэх эрсдэлгүй, цаг агаарын ямар ч нөхцөлд тохирсон, зэвэрдэггүй, цэвэрлэхэд хялбар. Мөн суух, хэвтэх, зогсох, үсрэх зэрэг олон үйлдэл хийх боломжтой тул дүүжин савлуурт сул тал бараг байдаггүй.  

ХИЙХ АРГАЧЛАЛ 

Хавтан модоор хүрээг бэлдэнэ. Хавтан модны голыг тодорхойлон тэмдэглэж чиг мод тавин хагас тойрог хэлбэрээр харандаагаар тэмдэглэнэ. Тэмдэглэсэн хэсгийг хөрөөдөж авна. Энэ маягаар 6 ширхэг 10 см өргөнтэй хагас дугуй ижил хавтан бэлдэнэ. 

Бэлдсэн хавтангуудыг бүтэн дугуй хэлбэрт оруулан хооронд нь модны цавуугаар наан бэхэлнэ. Цавуугаар бэхлэхдээ хавтангуудын 2 талд цавуугаа сайтар түрхээрэй. Дугуй хэлбэртэй болсны дараа дотор талд нь тойргийн хэмжээтэй адил модоор доторлоно. Энэ нь давхарласан моднуудыг хөдөлгөөнгүй барих үүрэгтэй юм. Дараа нь цавууны хавчаараар чангалан хавчиж 1 өдрийн турш байлгана. Цавуу сайтар хатсан эсэхийг шалган илүүдэл өө сэвийг зүлгүүрдэж хавтанг гялгар болгоно.

Дүүжин савлуурын гол зүйл болох даавууг бэлтгэнэ. Бэлтгэхдээ ойролцоогоор 2 метр даавуу байх бөгөөд даавууны бүтэц нь нэлээд нягт байх ёстой.  Жинсэн эсвэл зузаан хөвөн даавуун байхад тохиромжтой ба өнгө нь ямар ч байж болно. Даавууг тэгш газар дэлгэн 150 см радиустай дугуй зурж, дугуйруулан хайчилна. Хайчилж бэлдсэн даавууны зах хэсэгт 5 см хоорондын зайтай 3 см радиусаар хагас дугуй хэлбэртэй хайчилж авснаар их биетэй холбоход бэлэн болно.

Даавууг хүрээтэй холбохын тулд хүрээн дээр зурсны дагуу нүх гаргах ба нүхнүүдийн хоорондын зай нь ойролцоогоор 3 см зайтай хос нүх байна. 

Хүрээ даавуу хоёрыг холбохын тулд бэлдсэн нүхээр зориулалтын олс оруулан хооронд нь бэхэлнэ. 

Тааз савлуур хоёрыг холбохдоо хүрээний ижил хэмжээтэй зайд 4 ширхэг нүх гаргана. Мөн олсыг хүрээнд сайтар бэхлээд дараа нь 4 ширхэг олсны нөгөө үзүүрүүдийг нэгтгэн цагирганд бэхэлнэ. Таазандаа дэгээ өлгүүр бэхэлж тогтоогоод савлуурын цагиргаа өлгөнө. Ингээд таны дугуй хэлбэрт дүүжин савлуур бэлэн боллоо.  

Бэлтгэсэн: С.Оргилцэцэг