Өмнөх дугаарт /№155/ “Эн Эй Пи Групп” ХХК-ийн  Архитектур, инженер техникийн албаны захирал Г.Ганбат болон Ахлах архитектор З.Мөнхмандах нарыг урин зураг төслийн салбар болон архитекторын үзэл баримтлалын талаар ярилцсан бол энэ удаад GERLUG VISTA төслийн онцлогийг танилцуулж байна. 

“Эн Эй Пи Групп” ХХК-ийн Ахлах архитектор З.Мөнхмандах 

GERLUG VISTA төслийн тухай танилцуулаач?

“ТАВАН БОГД ПРОПЕРТИ” ХХК-ийн захиалгаар “MGL E&C” ХХК-ийн гаргасан барилгын хэлбэр, концепц дээр тулгуурлан 2020 оноос эхлэн эх загвар зураг, ажлын зураг төслийг боловсруулан, зохиогчийн хяналт тавин одоог хүртэл хамтран ажиллаж байна. 

Энэхүү төсөл маань 23 давхар, орон сууцны 8 блокоос бүрдэх нийт 836 айлын бизнес зэрэглэлийн орон сууц юм.  GERLUG VISTA төслийн барилга угсралтын ажил нь 1-р ээлж нь 100%, 2-р ээлж нь 70%-н гүйцэтгэлтэй, 2023 оны 3-р улиралд хүлээлгэж өгөхөөр ажиллаж байна. Миний хувьд орон сууцны хэсгийн төлөвлөлт, гадна экстерьер дизайн дээр голчлон ажилласан. Мөн барилгын үндсэн концепц болон эх загвар зураг, ажлын зураг мөн зохиогчийн хяналт гээд барилгын бүх үе шатанд оролцон ажиллаж байна. Цаасан дээр зурагдсан зураг одоо бодитоор боссон байгааг харахад маш их бахархдаг.  

Тухайн төслийн архитектурын онцгой шийдэл нь юу вэ? 

GERLUG VISTA төсөл нь орон сууц, худалдаа үйлчилгээний төв, цэцэрлэг, өвлийн цэцэрлэг, нэгдсэн дулаан зогсоол бүхий барилгаас бүрдэх бөгөөд хүний хэрэгцээний бүх зүйлийг нэг дор төлөвлөсөн гэдгээрээ давуу талтай ба ерөнхий төлөвлөгөөний хувьд амралт болон хүүхдийн тоглоомын талбай нь авто машины хөдөлгөөнгүй бүсэд байрлуулан гүйлтийн зам, дасгал хөдөлгөөн хийх, хүмүүс нарлах, сууж амрах олон төрлийн задгай орон зайг төлөвлөсөн. Хүүхдийн тоглоомын талбайг хүүхдийн насны хөгжлөөс хамааруулан өөр өөрийн онцлогтойгоор төлөвлөсөн. Мөн Монголдоо анхдагч зургаан тал бүхий “Hexagon” хэлбэртэй, айл болгон нарны шууд тусгал үзэх боломжтой, нэг нэгнийхээ харагдцыг халхлахгүй төлөвлөлттэй. Нүүр талын үндсэн концепц нь байгалийн сүрлэг мэдрэмжийг төрүүлэхийн тулд “Алтай Таван Богд” уулнаас санаа аван дүрслэн харуулсан.

“Hexagon” буюу 6 талт хэлбэртэй байхын давуу тал нь юу вэ? 

Барилгын хэлбэр нь барилга баригдах эдэлбэр газар болон орчин, түүний нөлөөлөл, функц, хэрэгцээ шаардлагаас шалтгаалан хэлбэр нь тодорхойлогддог. Ийм ч учраас GERLUG VISTA төсөлд орон сууцны блок болгон нэг нэгнийхээ харагдцыг халхлахгүй байх, айл болгон нарны шууд тусгал үзэх шаардлагын дагуу “Hexagon” буюу 6 талт хэлбэрийг ашигласан. Төлөвлөлтийн хувьд орон сууцны талбайг зөв төлөвлөж, айл болгон хоёр талын харууцтай ба ашигтай талбайг нэмэгдүүлсэн. Мөн ерөнхий төлөвлөгөөнд байгалийн буюу дөлгөөн хэлбэрийг ашиглан барилгын хурц өнцөг бүхий хэлбэрийг илүү зөөллөж хүнд эерэг сэтгэгдэл төрүүлэхээр бодолцон төлөвлөсөн.

“Алтай Таван Богд” уулыг дүрслэх болсон нь сонирхолтой санагдаж байна. Энэ талаар тайлбарлавал?

“Таван Богд Групп”-ийн лого Алтай Таван Богд уулыг дүрсэлсэн байдаг. Мөн  Монголын хамгийн өндөр оргил, тэр ч утгаараа барилгын нүүрэн талд уулын дүрслэлийг оруулсан. Тухайн дүрслэлийг оруулахдаа хязгааргүй шулуунуудыг огтлолцуулан Алтай Таван Богд уулыг дүрслэн, өнгийг газар, уул, тэнгэрийн өнгөнүүдээс санаа авч бараан өнгөнөөс цайвар өнгө рүү уусган харуулсан. Мөн аль ч өнцгөөс харсан бүх блокууд нэг ансамбль мэт дүрслэл үүсгэх юм.

Архитектурын өвөрмөц шийдэлтэй барилга бүтээн байгуулахын давуу юу вэ? Яагаад өвөрмөц шийдлийг бий болгох, бүтээн байгуулах шаардлагатай вэ? 

Тухайн төслийн байршил, түүнд үзүүлэх орчны нөлөөлөл, суурь судалгаа, захиалагч болон хэрэглэгчийн  хүсэл сонирхол, хэрэгцээнд үндэслэн архитектурын концепцийг бий болгож цор ганц байх архитектурыг бүтээдэг. 

Архитектурын хувьд өвөрмөц шийдэлтэй барилга нь нэгд барилгыг хэрэглэгчдэд онцгой сэтгэгдэл төрүүлж сэтгэл ханамжийг мэдрүүлэхээс гадна,  орон зайн хувьд хэд хэдэн давуу талыг бий болгодог. Үүнд олон тал руу харууцтай, байгалийн гэрэл_ нарны тусгалыг шууд үзэх, мөн доторх өрөө тасалгааны төлөвлөлтийн хувьд үр ашигтай төлөвлөгддөг. Хоёрт өвөрмөц шийдэлтэйгээс гадна хүнээ бодсон төлөвлөлттэй учраас зах зээл дээр өрсөлдөөн, нөгөөтээгүүр зураг төслийн салбарт бас нэгэн өнгө төрхийг бий болгож байна.