ХАЛААЛТЫН ЭРГЭЛТИЙН НАСОС

Халаалтын  эргэлтийн насос нь дулаан зөөвөрлөгч халаалтын усны дамжуулагчийн үүрэг гүйцэтгэнэ. Халаалтын хэлхээн дэх насос нь дулаан түгээгчээр дамжуулан дулаан үүсгүүрээс халаалтын усыг дулаан хэрэглэгчдэд жигд эргэлтээр хүргэдэг тул халаалтын  эргэлтийн насос гэж нэрлэдэг. Халаалтын эргэлтийн насос нь цахилгаан эрчим хүчээр ажиллана.

Хуучин загварын насосууд нь цахилгаан зарцуулалт өндөр байдаг бол эрчим хүчний өндөр үр ашигтай насосууд нь цахилгаан зарцуулалт харьцангуй бага тул цахилгаан эрчим хүчийг хэмнэдэг. Энэ нийтлэлээрээ бид хуучин халаалтын насосыг яагаад солих хэрэгтэй болон солих цаг болсныг илтгэх шинж тэмдэг эрчим хүчний өндөр үр ашигтай насосын давуу талууд, насосын ажиллах зарчим, ашиглалтын зардлын хэмнэлт гаргах боломжийг зөвлөж, үнийн талаар танд мэдээлэл өгөх болно.

ЖИШЭЭ БОЛГОЖ ДЭЭР ДУРДСАН НАСОСНУУДЫН ХАРЬЦУУЛАЛТЫГ:

⇨    1-2 давхар амины орон сууц (АОС)

⇨    Талбай 80-120 м2

⇨    Насос нь жилд 6000 цаг ажиллана гэж үзвэл

1.    ЭНГИЙН (ТОХИРУУЛГАГҮЙ) НАСОС

Энгийн тохируулгагүй халаалтын насосууд байнгын бүрэн хүчин чадлаар тогтмол, тасралтгүй ажилладаг. Энэ төрлийн энгийн (тохируулгагүй) насос жишээ болгож авсан АОС-ыг халаахад жилд дунджаар 800 кВт цахилгаан зарцуулна. 

*Wilo Star-RS

2.    ХУРДНЫ ТОХИРУУЛГАТАЙ НАСОС      

Хурдны тохируулгатай насосны хувьд чадлыг үе шаттайгаар, ихэвчлэн гурван хурдаар гар ажиллагаагаар тохируулж болно. Энэ төрлийн насосын дээд хурдаар ажиллах хугацааг халаалтын улирлын 40-50 хувь, дунд ба бага хурдаар үлдсэн хугацаанд ажиллана гэж тооцвол жилд дунджаар 300 кВт зарцуулна.  Хурдыг бууруулж ажиллуулах бол тодорхой хугацаанд ажиглалт хийх шаардлагатай. Ингэснээр дулаан дамжуулалт ба хамаарах цахилгаан зарцуулалтыг эрэлтэд нийцүүлэн тохируулах боломжтой.

3.    ЭЛЕКТРОН УДИРДЛАГАТАЙ НАСОС

Электрон удирдлагатай насосууд нь халаалтын термостат нээлттэй эсвэл хаалттай эсэхээс хамааран хурдыг  тохируулж, улмаар цахилгаан эрчим хүчний зарцуулалтыг шаардлагатай хэмжээнд хүргэдэг. Энэ төрлийн халаалтын эргэлтийн насосын нүүрэн талд цахилгаан эрчим хүчний зарцуулалтыг үзүүлэлтийн хамт харуулсан нь хэрэглэгчид үнэн зөв мэдээлэл өгнө. Электрон удирдлагатай насосны эрчим хүчний хэрэглээ жилд 150 кВт байна.

4.    ЭРЧИМ ХҮЧНИЙ ӨНДӨР ҮР АШИГТАЙ НАСОС 

Эрчим хүчний өндөр үр ашигтай насос нь электроноор өдөөгдөж ажилладаг ба тусгай хөдөлгүүртэй болсноор бодит эрэлттэй нийцэж ажилладаг болсон. Жишээлбэл тогтмол соронзонт синхрон хөдөлгүүр буюу ECM- electronic commutated motor. 

Энэ насосын цахилгааны хэрэглээ энгийн тохируулгагүй насосын ажилласантай харьцуулбал жилд 17 дахин бага буюу ердөө 46,5 кВт байна. 

 Wilo Yonos PICO                                                                 Wilo Stratos PICO

Шинэ төрлийн эрчим хүчний өндөр үр ашигтай насос нь хэрэглэгч насосны мэдээллийг онлайнаар ухаалаг утсаар дамжуулан авах, удирдах мөн оношилгооны программтай болсон. Зарим тохиолдолд гидравлик тэнцүүлэлтийг харьцангуй хялбар хийгдэх хүртэл боломж бий болсон. 

ЭРЧИМ ХҮЧНИЙ ӨНДӨР ҮР АШИГТАЙ НАСОСЫН АЖИЛЛАХ ЗАРЧИМ

Эрчим хүчний өндөр үр ашигтай насосоор нэг айлын амины орон сууцны халаалт, хэрэглээний халуун усны эргэлт цаашлаад нийтийн орон сууц, сургууль, эмнэлэг, оффисын барилгын халаалтын системийг үр ашигтай тохируулах, дулаан хэмжих буюу тоолох боломжтой.

Эрчим хүчний өндөр үр ашигтай насос халаалтыг шаардлагад нийцэж ажиллах бөгөөд шаардлагагүй тохиолдолд зогсох горимтой. Шугам хоолой дахь усны өөрчлөлтийг автоматаар мэдэрснээр даралтын харьцааг тогтмол хэмжээнд барина.

Хэсэгчлэн ачаалах хэсэгт буюу насос бүрэн хүчин чадлаар ажиллах шаардлагагүй үед насосын чадлыг тогтмол хурдаар бууруулж эрчим хүч хэмнэнэ. Үр дүнд цахилгааны хэрэглээг 70% хүртэл бууруулах боломжтой. 

Халаалтын сүлжээн дэх халаах хэрэгцээ нэмэгдэх үед эрчим хүчний өндөр үр ашигтай насос өөрийн ажиллах чадлаа автоматаар хуваарилж нэмэгдүүлнэ. Хариу үйлдэл үзүүлэх хугацаа богино тул дулаан хангамжийг дутуу болон илүү нийлүүлэхээс сэргийлдэг. 

Wilo Stratos MAXO 

ЗӨВЛӨМЖ:

●    Халаалтын системийг төлөвлөхдөө мэргэжлийн сайн тооцоололд тулгуурлан шугам хоолойн хөндлөн огтлолыг бага байхаар хэрэгцээнд суурилах, насосын ухаалаг электрон удирдлагын тусламжтайгаар халаалтыг бүхэлд нь үр ашигтай ажиллуулах боломжтой.

●    Шугам хоолойд усны хэмжээ урсгалын эсэргүүцлээс хамааран зөвхөн насосын даралт бага үед үр дүнтэй байна.

●    Цахилгаан ажиллагаатай халаалтын эргэлтийн насос ажилласнаар цахилгааны зардал гарна тиймээс насосыг аль болох бага чадлаар ажиллуулснаар уг зардлыг хэмнэнэ. 

Wilo Stratos MAXO-D

Халаалтын эргэлтийн насосыг хэт том сонгосон эсэх нь ихэнх тохиолдолд шугам хоолойд урсгалын дуу шуугиан гарах, халаах хэрэгслүүд, халаалтын винтельд мөн дуу шуугиан сонсогдох байдлаар илэрдэг. 

Урсгалын дуу шуугианы гол шалтгаан нь систем дэх усны урсах даралт хэт өндөр байгааг илтгэнэ. Системийн даралт хэт өндөр байх нь том насос суурилуулсан эсвэл тохиргоо хийгдээгүйгээс шалтгаална. 

ЭРЧИМ ХҮЧНИЙ ӨНДӨР ҮР АШИГТАЙ ХОС НАСОС:

Wilo Stratos MAXO-D загвартай эрчим хүчний өндөр үр ашигтай хос насос дараах бусад давуу талуудтай:

●    Суурилуулах хугацаа хоёр дахин багасна

●    Материалын зардал 70% хүртэл буурна

●    Ажлын насос доголдоход нөөц насос автоматаар идэвхэжнэ

●    Найдвартай ажиллагаа сайжирна

Хэрвээ эрчим хүчний өндөр үр ашигтай насос сонгохдоо эргэлзэж байвал мэргэжилтний зөвлөгөөг авах шаардлагатай. 

Эх сурвалж

1.    www.test.de Stiftung Warentest: Heizungspumpen, Sonderdruck Nr.9 September 2007

2.    Grundlagen der Pumpentechnik, Pumpenfibel, Wilo SE

3.    https://cms.media.wilo.com/cdndoc/wilo430443/4689125/wilo430443.pdf

Энэхүү нийтлэлийг “Мэргэжилтнийг чадавхжуулснаар дулаан хангамжийн үр ашиг дээшилж, хэмнэлтийг бий болгох нь” төслийн хүрээнд бэлтгэн хэвлэв.