Улс орнуудын эдийн засгийн чухал хөдөлгүүр нь бизнесийн салбарынхан байдаг. Тиймээс энэ удаагийн VIP ярилцлагадаа энэхүү ачааг нуруундаа үүрэлцэж яваа нэгэн эрхэм болох Aquatherm ХХК - ийн ерөнхий захирал О.Батнаранг урьж ярилцлаа. Тэрээр 2006 онд хоёрхон хүний бүрэлдэхүүнтэй бизнесээ эхлүүлсэн ч өдгөө  8 охин компанитай 100 гаруй ажилтантай, барилгын салбарын томоохон компани болон өргөжсөн байна. 

Та ямар мэргэжилтэй вэ? Хэрхэн барилгын салбартай холбогдож байв?

Би 1999 онд Техникийн их сургуулийг цахилгааны инженер мэргэжлээр төгссөн юм. Хамгийн анх “Зуун найман суварга” ХХК - ийн Ч.Мягмарсүрэн захирлын удирдлаган доор ажиллаад маш их зүйл сурч, цахилгааны инженерийн ур чадварыг эзэмшсэн гэж хэлж болно. 1990 он хүртэл Орос стандартын сантхникийн материал хэрэглэдэг байсан. Энэ ойлголтыг халж Герман, Дани, Финлянд зэрэг европын шинэ, дэвшилтэт технологиудыг Монголд нэвтрүүлж байсан хүн. Миний хувьд Олон барилгад  шалны халаалтын кабель, цэвэр бохирын системийг хөлдөхөөс хамгаалсан халдаг кабелиудын цахилгааны холболтыг хийж, туршлагажиж байлаа. Барилгын сантехникийг чанартай бүтээгдэхүүнээр хийх ёстой гэдгийг энэ хүнээс ойлгож авсан. 

Үүний дараа 2004 оноос эхлэн Монгол глобал ХХК - ийн захирал Б.Ганбаяр захиралтай  Евростандарт барилгын материалын дэлгүүрийг үүсгэн байгуулалцаж, Польш улсаас Sanitec Kolo, Poliplast, Valvex зэрэг компаниас бараа материал импортлон оруулж ирж байлаа. Энэ хүнээс бизнеийн удирдагч хүн ямар байх ёстой гэдгийг маш сайн сурсан. 

Хувийн бизнесээ хэрхэн эхлүүлж байв? Ажилласан газар, сурсан зүйлс тань танд ихээхэн нөлөө үзүүлсэн байх.  

2006 онд “Клаймакс Интернэшнл” ХХКомпаниа байгуулж, Польш улсаас сантехникийн материалыг импортоор оруулж ирэн бизнесийн гараагаа эхэлж байлаа. Дэлгүүрийн нээрээ өгөхдөө Aqua буюу усыг цэнхэр өнгөөр, Thermo буюу халаалтыг улаан өнгөөр илэрхийлэн логогоо бүтээж, үүд хаалгаа нээсэн юм. Анх Польш elvsy Plastimex Sanibud  гэдэг хоёр компаниас дотор бохирын хуванцар хоолой, PVC холбох хэрэгсэл, Aquer компаниас хомут бэхэлгээ, уян хоолой гэх мэт төрөл бүрийн дагалдах хэрэгсэл оруулж ирж байсан. 

Анх бизнесээ хэдүүлээ эхэлж байв? Одоо хэр өргөжин тэлсэн бэ? 

Анх Б.Мөнхбат дүүтэйгээ хоёулаа ажиллаж эхэлсэн бол одоо Клаймакс Интернэйшнл компани 30 гаруй ажилтантай үүнээс салбарласан 8 охин компанийн 100 гаруй ажилтантай болсон байна. Aquatherm барилгын материалын дэлгүүр, “Монгол Ньюпластик” ХХК хуванцар хоолойны үйлдвэр, Акватерм барилгын материалын дэлгүүр, “Боржин суварга” ХХК чулууны үйлдвэр, барилга угсралт, сантехникийн угсралт, тээвэр логистик, хүнс гэх мэт салбарт үйл ажиллагаа явуулж байна. 

Хуванцар хоолойны үйлдвэрийг яагаад нээх болсон бэ? 

Бохирын хуванцар хоолой холбох хэрэгсэл хийдэг үйлдвэрээ 2011 онд байгуулж, одоогоор  35 ажилтантай  гурван ээлжээр 24 цаг тасралтгүй ажиллаж байна. Хуванцрын хоолой үйлдвэрлэлтийн технологийн онцлог нь нэг зогсвол хаягдал ихээр гардаг, эргээд халаагаад хэвийн ажиллагаанд орохдоо тун удаан байдаг. Анх үйлдвэрийн шугамаа жигдрүүлтлээ их хаягдал гаргадаг л байлаа. Бид хаягдал бүтээгдэхүүнээ бутлан дахин ашигладаг. Одоо тасралтгүй ажилладаг болсон. 

Харин үйлдвэрээ нээх болсны тухайд гэвэл бид урьд нь Польш, Герман, Итали улсуудаас хуванцар хоолой оруулж ирдэг байхад тээвэрлэлтийн зардал маш өндөр гардаг байлаа. 40 тоннын кантенерт ердөө 4-5 тоннын жинтэй бохирын хуванцар хоолойнууд ирдэг байв. 10 мянган долларын бараа авахад 80-90 хувь нь тээврийн зардалдаа зарцуулагддаг гэхээр нэг ёсондоо агаар зөөгөөд байна гэсэн үг. Тиймээс энэ тээврийн зардлыг эх орондоо үлдээх боломжийг эрэлхийлж, Германы технологийг нутагшуулан Монголдоо анх үйлдвэрлэж эхэлсэн. Одоо дотор бохирын PP хоолой гадна бохирын PVC шугам цэвэр усны PPR тэдгээрийн дагалдах холбох хэрэгслүүдийг иж бүрдлээр нь үйлдвэрлэж байгаа төдийгүй жилээс жилд бүтээгдэхүүний нэр төрлөө олон болгохыг зорьж, барилгын заслын шпатель, нэг удаагийн халбага сэрээ, шанага, өлгүүр гэх мэт хуванцраар хийж болох бүтээгдэхүүнийг үйлдвэрлэж байгаа. 

Дотоодын хуванцар хоолойны хичнээн үйлдвэр байгаа вэ? Танайх зах зээлийнхээ хэдэн хувийг хангаж ажилладаг вэ? 

Одоогийн байдлаар Монгол Улсад Солонгосын болон дотоодын хөрөнгө оруулалттай хуванцарын 5 үйлдвэр үйл ажиллагаа явуулж байгаа. Бид дотоодын зах зээлийнхээ 30-40 хувийг үйлдвэрлэдэг. Дотоодын үйлдвэрлэгчдээс гадна Турк, Орос, Чех, Польш, Хятадаас импортлодог олон компаниуд бий. 

Манай компанийн хувьд Герман, Польш улсуудаас импортоор оруулж ирдэг. Учир нь зарим төслүүд Европын бүтээгдэхүүн хэрэглэхийг хүсдэг учраас хэдийгээр дотооддоо үйлдвэрлэж байгаа ч захиалагчийн хүсэлтээр бага хэмжээгээр импортлодог. 

Үйлдвэрийн хүчин чадлын хувьд цэвэр болон бохирын хоолой, PVC үйлдвэрлэдэг 3 өөр тоног төхөөрөмж 3 өөр хүчин чадалтайгаа ажилладаг. Хэрвээ үйлдвэр маань бүрэн хүчин чадлаараа ажиллавал Монгол Улсын нийт хуванцар хоолойны 50 хувийг үйлдвэрлэх боломжтой. Хамгийн сүүлд үйлдвэрийнхээ технологийг шинэчлээд Итали улсын Italian Plastic Machinery  компаниас  бурзан гаргадаг тоног төхөөрөмжийг оруулж ирсэн. 

Түүхий эдээ хаанаас авдаг вэ? Дотоодод байгаа хуванцрыг дахин боловсруулан ийм үйлдвэрлэлд ашиглах боломжтой юу? 

Түүхий эд нь бүтээгдэхүүний чанарт нөлөөлдөг, мөн эрүүл ахуйн шаардлагыг бүрэн хангасан байх ёстой учраас чанартай бүтээгдэхүүн үйлдвэрлэхийн тулд Солонгос Улсын Hyosung , LG Chem  компаниас, резинээ Германы MOL компаниас авчирч үйлдвэрлэдэг. 

Хаягдал хуванцар буюу ус ундааны савнууд нь PLC материал учраас хуванцар хоолой үйлдвэрлэхэд тохиромжгүй. Бөглөө нь полиполембрен PP - д тохирдог боловч үүнийг цуглуулаад дахин боловсруулаад хомут, тогтоогч хадаас зэргийг л үйлдвэрлэх боломжтой.

Хуванцрын үйлдвэрлэл шинжлэх ухааны түвшинд явагддаг учраас энэ чиглэлийн мэргэжилтнүүд хомстолтой гэж сонсож байсан. Мэргэжилтнүүдээ хэрхэн бэлтгэдэг вэ? 

Монголд хуванцрын салбар үүсээд 20 гаруй жил болж байна. Тиймээс мэргэжилтэн тун ховор. Техникийн их сургууль, мэргэжлийн коллеж төгссөн хүүхдүүдийг ажилд аваад Герман болон Итали улсруу сургалтад явуулж өөрсдийн боловсон хүчнээ бэлтгэдэг.  

Чулууны үйлдвэрийн тухайд? 

Хуванцрын үйлдвэрээс гадна чулууны үйлдвэртэй. 2012 онд МУ-ын урлагын гавьяат зүтгэлтэн Ж.Түвшинжаргал /манай үеэл/ чулууны үйлдвэр байгуулах санал тавьж, “Боржин суварга”  ХХК байгуулсан. Боржин болон гантиг чулуугаар явган замын хавтан, цонхны тавцан, чулуун шат гэх мэт барилгын бүтээгдэхүүнүүд,  мөн урлагын бүтээл буюу баримал, усан оргилуур, чулуун сандал, суврага, бурхан гэх мэт зүйлсийг чулуугаар урладаг. Түүхий эдээ 100% дотоодоосоо  авдаг. 

“Үйлдвэрлэгч орноос манай агуулахад материал хүргэгдэж ирдэг болсон байна”

Олон улсад тээвэр логистик хэрхэн хөгжиж байна? Тээврийн логистикийн асуудал нэг үеэ бодвол цэгцэрч байна уу? 

Анх гадаад худалдааны чиглэлээр бизнесийн үйл ажиллагаагаа эхэлсэн учраас аль болох өртөг багатай, богино хугацаанд тээвэрлэхийн тулд логистикийн асуудал тулгарч байсан. Өнөөдрийн байдлаар Польш, Герман , Чех, Словак, Турк, Итали, Франц, Орос, Хятад, Солонгос гэх мэт 10 гаруй улсаас 30 гаруй бэлтгэн нийлүүлэгчтэй харьцаж байна. Бүтээгдэхүүнүүдийн овор хэмжээ өөр өөр учраас тэр бүгдийг зохицуулахад асуудал их гарна. Тиймээс энэ чиглэлийн охин компани нээж ажиллах болсон. 

Дэлхий даяарчлагдсан учраас дэлхийн асуудал Монголд нөлөөлдөг болсон байна. Ковидоос өмнө Хятадын Тянжинь боомтоос дамжин ирдэг ачаа 14-20 хоногт ирдэг байсан бол сүүлийн 2 жилд 4-5 сарын хугацаа шаарддаг болсон. Гэхдээ одоо гацаа нь гараад хугацаа нь богиноссоор л байгаа.  

Европоос чингэлэгээр гарсан ачаа 30 хоногт ирдэг байсан бол Орос Украйны дайны асуудлаас болоод 45-50 хонодог боллоо. Сүүлийн 2 жилд тээврийн асуудалд тун хүнд үүнийгээ дагаад үнэ өртөг ч 100% нэмэгдсэн гэхэд хэлстэхгүй. 

Гэхдээ тээврийн асуудал хүндрэлтэй байсан ч сүүлийн үед өрсөлдөөн улам ширүүн болж болно. Тиймээс үйлчилгээ нь улам бүр хялбар болж ихэнх компаниас “хаалганаас хаалганд, гараас гарт” гэсэн үйлчилгээ нэвтэрч байгаа. Урд нь бараа бүтээгдэхүүнээ ачуулахын тулд өөрийн биеэр тухайн улс руу очиж, бүтээгдэхүүнээ сонгоод, өөрөө ачих нь холгүй ажилладаг байлаа. Одоо үйлдвэрлэгчтэйгээ гэрээ байгуулаад, гэрээний нөхцөлийн дагуу тээвэр зуучийн компани нь манай бүтээгдэхүүнийг ачиж, дамжин өнгөрөх улс орнууд болон Монголын хилээр нэвтрээд  ачаагаа манай агуулахад буулгах жишээтэй. Олон улсын тээвэр зуучийн үйлчилгээ маш сайжирч байгаа. 

Зохицуулалтын хувьд олон улсад Incotherms гээд олон улсын тээвэр логистикийн байгууллага нь худалдан авагч, худалдагч талуудын хариуцлагыг тодорхойлсон журмын дагуу ажилладаг. Өөрөөр хэлбэл зардал болон эрсдэлийг талуудад хэрхэн хуваарилахыг тодорхойлох эрх бүхий дүрэм журмаар зохицуулагддаг гэсэн үг. Манай тээвэр зуучийн компани ч олон улсын тээвэр зуучийн холбооны гишүүн болоод дагаж мөрддөг дүрмийн дагуу Орос, Герман, Польш, Солонгос, Хятадын тээвэр зуучийн агентуудаар дамжуулан ачаагаа авдаг. Улаанбаатар төмөр зам эсвэл өөрсдийн ачааны машинаар тээвэрлэж хотод авчирдаг.

Таны хувьд гаалийнхантайгаа олон жилийн турш харилцах шаардлага гарсан байх. Хүнд суртал, үйлчилгээ ямар байна вэ? 

16 жил гаалиар материал оруулж ирлээ. Одоо хүнд суртал, гааль дээр удаах асуудал багасаж, хариуцлагатай ажилладаг болсон гэж харж байгаа. Гадагшаа мөнгө шилжүүлсэн баримт, гэрээ зэргээ үзүүлээд гаалийн бүрдүүлэлт хийх боломжтой болсон. Ногоон барааг шалгахгүй оруулдаг бол улбар шар болон улаан барааг эрсдэлийг тооцоод заавал шалгадаг. Ялангуяа хуванцрын түүхий эд нь химийн найрлагатай учраас дээжийг нь лабораторид шинжилсний дараа хилээр нэвтрүүлдэг. 

Бусад бүтээгдэхүүний хувьд жилдээ олон контайнер тогтмол ирдэг учраас гаалийн хүнд суртал сүүлийн үед багассан. 

Таны хувьд олон орны олон компаниудтай гэрээ хэлэлцээр хийх шаардлага тулгардаг. Тиймээс өөрийн талд ашигтай, давуу талаа хэрхэн бий болгодог вэ? 

Бизнесийн уулзалт, хэлэлцээр хийхэд биеийн хэлэмжээс л эхэлдэг. Биеэ авч яваа байдал, нөгөө талтайгаа хүндэтгэлтэй харьцах, нөхцөл байдлаа мэдрэх, тухайн улс орны соёл, хүмүүсийн хандлагыг анзаарах шаардлагатай болдог.  Жишээ нь Германчууд цаг маш сайн баримталдаг, зарчимч, хэлсэн үгэндээ хүрдэг учраас уулзалт төвлөхдөө хоцрохгүй байх, хариуцлагатай хандах ёстой. Харин Италичууд албаны байдалтай суухаасаа илүү чөлөөт байдлаар ярилцах дуртай. Туркууд гэхэд Монголуудыг ахан дүүс гэсэн хандлагаар харьцдаг учраас тэр талын түүх ярьж эхлэхэд таатай байдаг. 

Гадны үзэсгэлэнг байнга үзэж сонирхдог уу? Сүүлийн үед ямар шинэ технологиуд нэвтэрч байна вэ? 

Компаниа байгуулсан цагаасаа эхлээд Орос, Польш, Герман, Итали, Франц зэрэг улсуудад зохиогддог барилгын болон сантехникийн үзэсгэлэнгүүдэд байнга оролцож ирсэн. Тэр дундаа хоёр жилд нэг удаа Германы Франкфурт, Итали улсын Милан хотод зохиогддог сантехникийн үзэсгэлэнг тогтмол очиж үздэг.

Сүүлийн гурван жил хил хаалттай байсан учраас энэ жил өргөн бүрэлдэхүүнтэй яваад ирлээ. Үзэсгэлэнгийн оролцогч компаниуд ч нүсэр, үзэгчид ч маш олноороо цугларсан байсан. Энэ жилийн хувьд байгаль орчноо хамгаалах, ногоон технологи руу чиглэсэн усны дэвшилтэт технологиуд их гарсан байна. Жишээ нь Германы ГРОХ компани шүршүүр холигч шинээр гаргасан бөгөөд усны хэрэглээг 80-90 хувь бууруулсан  байна. Хүн усанд орохдоо 50 литр ус ашигладаг байсан бол даралтыг нь зөв, маш бага болгосноор 10 литр ус  ашиглах хэмжээнд хүргэсэн байна. Нарны энерги ашигласан хэрэглээний халуун усны бойлуур, халаалтын систем зэргийг түлхүү танилцуулсан. Мөн 00 усыг татахад 6/3 литр ус урсдаг байсан бол одоо нэг даралтаар 4/2 литр гоожихоор болгосон гэх мэт олон шинэ технологиуд гарсан байна. 

Өөрсдийн үйл ажиллагаандаа ногоон технологи нэвтрүүлж байгаа юу? 

Энэ жилээс оффиссынхоо хэрэглээний халуун усыг нарны системээр халаах технологи суурилуулж байгаа. Мөн өөрсдийн хэрэгжүүлж буй хоёр  болох Verde resort дээр Ультрасоник компанийн Герман улсад үйлдвэрлэсэн цэвэрлэх байгууламжийг суурилуулж, саарал усаа 98 хувь хүртэл цэвэршүүлэн зүлэг, ногоон байгууламжаа услах технологийг нэвтрүүлж байна.

Барилга угсралтын салбарт хэдэн оноос хойш ажиллаж эхэлсэн бэ?

2017 оноос барилга угсралтын салбар руу орж, хамгийн анх Төв аймгийн Батсүмбэр суманд 120 хүүхдийн дотуур байр дараа нь 920 хүүхдийн сургуулийг ашиглалтад оруулсан. Мөн Сонгинохайрхан дүүрэгт  Verde apartment 192 айлын орон сууцны төслийг барьсан.  Энэ жил 31 айлын Verde resort хаус хотхоны төсөл дээр ажиллаж байна. Барилга угсралтын ажил 90 хувьтай явагдаж байгаа. 

Гадны компаниуд Монголын барилгын салбарын зах зээлийг ихээхэн сонирхож байна. Та барилгын салбарын зах зээлийг хэрхэн харж байна вэ? 

Манай хамтрагч Итали компанийн экспорт хариуцсан захирал Монголд ирэхдээ “Танай улс хөгжиж байна. Хаа сайгүй кран, бүтээн босголтын ажлууд явагдаж байна даа” гээд дуу алдаж билээ. Хөгшин европод бол ганц нэгхэн кран харагддаг шүү дээ. 

Улаанбаатарын ихэнх хувийг гэр хороолол эзэлж байна. Мөн утааны асуудалтай учраас барилгын салбар эрчимтэйгээр хөжих нь тодорхой гэж боддог. Бусад өндөр хөгжилтэй орнууд ч утааны асуудалтай тэмцэж л ирсэн. Лондон хот утаатай бүсээ цахилгаанаар халааж, барилгажилтыг эрчимтэй явуулж асуудлаа шийдэж байсан шүү дээ. Тиймээс манайх ч энэ жишгээр барилгажилт эрчимтэй явагдана. Эхний удаад хямд өртөгтэй, залуу гэр бүлүүдэд зориулсан барилгаа олноор барих хэрэгтэй гэж боддог.

Томоохон  төслүүдэд өөрийн бараа материалыг нийлүүлэхийн тулд юун дээр анхаарч ажилладаг вэ? 

Төслүүдтэй хамтран ажиллахад нэгдүгээрт үнэ, хоёдугаарт бүтээгдэхүүнйи чанар чухал байдаг. Манай хувьд Европоос оруулж ирж байгаа чанартай бүтээгдэхүүнээ хамгийн хямд үнээр борлуулах бодлого баримталдаг. Манайх жил болгон каталогио гаргахдаа үнээ өмнөх жилээс нь хямдруулдаг байсан нь олон хэрэглэгчдэд маань таатай байсан. Уг нь үнэ өсдөг байхад манайх хямдруулахыг зоридог. 

Сүүлийн 2-3 жил валютын өсөлт, түүхий эдийн үнийн өсөлттэй холбоотойгоор үнээ буулгаж чадаагүй. Гэхдээ өмнөх оны мөн үеэс үнээ нэмэлгүй тогтвортой байлгаж, ижил төстэй бүтээгдэхүүнээс бага үнийг санал болгодог. 

Үнээ буулгах, тогтвортой байлгахын тулд ямар арга хэмжээ авдаг вэ?

Нэгдүгээрт нийлүүлэгчтэйгээ үнийн хувьд тохиролцоно, хоёрдугаарт тээврийн зардлаа багасгах тал дээр судалгаа хийдэг. Шууд машинаар авчирхад зардал өндөр, төмөр замаар арай бага, далайгаар авчирвал хамгийн хямд тусдаг. Тиймээс ямар бүтээгдэхүүнээ ямар тээврээр авчирхаа хүртэл тооцож, аль болох үнээ буулгахыг зорьдог. 

Сүүлийн үед барилгын салбарт “бартер” ихэссэн. Танд бартерын  олон санал ирдэг болов уу? Бартерийн балгийн талаар таны бодол? 

Бартерийн санал их ирнэ. Аль болох татгалздаг хэдий ч зарим тохиолдолд хамтардаг. Сүүлийн жилүүдэд барилгын салбар бартер руу шилжсэн нь санхүүжилттэй салшгүй холбоотой. Мөнгөгүй учраас туслан гүйцэтгэгч нартаа төслөөсөө санал болгодог систем рүү шилжээд энэ үйл ажиллагаа нь сүүлдээ төгсөрч байх шиг байна. Хэтрүүлэгтэй хэлэхэд материал борлуулдаг компани бартераар худалдаа хийсээр эцэстээ байр, машины борлуулагч болоод юуны худалдаа эрхлээд байгаагаа ойлгохгүй хэмжээнд хүрэхээр байна. /инээв/

Бартер сайн зүйл биш. Чанар, барилгын үнэ өртөгт ихээхэн нөлөөлнө. Бэлэн мөнгөөр чанартай бүтээгдэхүүн худалдаж авах боломжтой. Харин бартераар бол чанаргүй бүтээгдэхүүнээ шахах магадлалтай. Гүйцэтгэгч компаниуд бартераар авсан байраа хямд зарснаар тухайн барилгын үнийг унагах гэх мэт бартерийн балаг их бий гэж бодож байна. 

Бизнесийн салбарын шинэ удирдагч залуучууддаа ямар номыг санал болгох вэ?

Зохиолч Жим Коллинз “Сайнаас агууд дэвшихүй” гэдэг номыг зөвлөмөөр байна. Босс байх уу, лидер байх уу, бизнесээ яаж удирдах уу, хүмүүсийг яаж манлайлах уу эндээс ойлгож болно. 10 жилийн өмнө бизнесийн удирдлагаар суралцаж байхдаа энэ номыг анх уншиж байсан. Одоо ч миний ширээний ном хэвээр байна. 

Мөн Израйлын ерөнхий сайдын тухай бас зөвлөмөөр байна. Намайг бага байхад номоо солилцоод л уншдаг байлаа. Одоо технологийн дэвшлээ дагаад интернээс хязгааргүй мэдээлэл авдаг болсон байна. 

Ажлын онцлогоос шалтгаалаад их олон орноор аяласан болов уу?  

Аялах их дуртай. Өнөөдрийн байдлаар нийт 60 гаруй улсаар аялсан байна. Эхэндээ бизнес уулзалтаар явдаг байсан бол сүүдээ үзээгүй улсаа зорьж аяладаг болсон. Гэр бүл, найз нөхөд, ажлын хамт олонтойгоо хамт аялах дуртай.  Манай компанид нэг тогтсон жишиг бий. Хоёр жилд нэг удаа хамт олноороо гадаадад 7 хоног аялж шинэ жилээ тэмдэглэдэг юм. Урьд нь бид нар Хайннаь Бээжин, Тайланд, Вьетнам зэрэг улсуудаар аяласан бол энэ оны 1 сард Турк улсаар хамт олноорооо аялаад ирсэн. 

Аялахад хөгшин Европын орнууд их онцлогтой эртний барилга байгууламж ихтэй. Гэхдээ яагаад ч юм бизнесийн гараагаа эхэлж байсан болохоор Польш улсын нийслэл Варшав хотод их дуртай. 

Цаашдаа ямар зорилготой ажиллаж байна вэ? 

Ойрын хугацаанд оруулж ирж байгаа ногоон технологиудаа танилцуулах шинэ оффис, агуулах барих төлөвлөгөөтэй байгаа. Алсдаа импортыг орлох барилгын материалыг үйлдвэрлэх үйлдвэр барихыг зорьж байна. Одоогийн байдлаар 2-3 төсөл судалгааны шатандаа явж байгаа .

Өөрийн бизнесийн ололт амжилтын талаар бидэнтэй хуваалцсан танд маш их баярлалаа. Таны цаашдын ажил хөдөлмөрт илүү их амжилтыг хүсье!