Шинэ орон сууц, барилгын материалын үнэ ханшийн судалгааг сар бүр, ажил гүйцэтгэлийн үнэлгээг улирал тутамд шинэчлэж, барилгын салбартай холбоотой мэдээ мэдээлэл, мэргэжилтнүүдийн  нийтлэлийг бэлтгэн хүргэдэг Барилга МН сэтгүүлийн 4 дүгээр сарын дугаар хэвлэгдлээ. 

Энэ сарын дугаарын нүүр хуудсанд Акватерм ХХК хамтран ажиллаа. Тус компани нь Монгол Улс дахь барилгын салбарын хэрэгцээ шаардлага хангасан чанарын баталгаатай ган хэвлэмэл радиатор, цэвэр ус, гадна, дотор бохирын шугамын хоолой, холбох хэрэгсэлийн хамт, ариун цэврийн өрөөний тоноглол, плита, халуун усны бойлер, тэлэлтийн болон нөөцийн сав зэрэг сантехникийн бараа материалуудыг Герман, Итали, Польш, Турк, Испани, Франц зэрэг Европын улс орнуудаас түргэн шуурхай импортлон, дотоодын зах зээлд тогтмол нийлүүлдэг юм.

Энэ дугаарт гарсан онцлох булангуудаас танилцуулбал…

VIP ярилцлага: Улс орнуудын эдийн засгийн чухал хөдөлгүүр нь бизнесийн салбарынхан байдаг. Тиймээс энэ удаагийн VIP ярилцлагадаа энэхүү ачааг нуруундаа үүрэлцэж яваа нэгэн эрхэм болох Aquatherm ХХК - ийн ерөнхий захирал О.Батнаранг  урьж ярилцлаа. Тэрээр 2006 онд хоёрхон хүний бүрэлдэхүүнтэй бизнесээ эхлүүлсэн ч өдгөө  8 охин компанитай 100 гаруй ажилтантай, барилгын салбарын томоохон компани болон өргөжсөн байна. 

Хөндөх сэдэв: Эрт дээр үеэс өөрийн хэрэглэх бараа таваарыг бусдад өгч өөрт хэрэгтэй бараа таваараар солилцож эхэлснээс бартер гэх зүйл /арилжаа/ үүсэлтэй. 2008-2009 оны дэлхийн эдийн засгийн хямрал, тухайн үеийн Монголд үүссэн санхүүгийн хямрал зэргээс шалтгаалж бартерын тогтолцоо бага багаар барилгын салбар луу нэвтэрсэнээр одоо гүн шингэн тогтжээ. Энэ үед хямралын давлагаагаар зах зээл дахь бэлэн мөнгөний нийлүүлэлт багасаж төсөл хөтөлбөрүүд зогсох эрсдэл үүсэх үед бизнесмэнүүд ихэнхдээ төлбөрийн арга дээрээ бэлэн болон бэлэн бус бараа бүтээгдэхүүн санал болгож эхэлсэн.

Бэлэн бүтээгдэхүүний зах зээл дээр бартерын системээр аль аль талдаа сэтгэл ханамжтай харилцан нэг нэгнийхээ хэрэгцээг хангах, таваарыг таваараар солилцон тохиролцож явагдах боломжтой тул цаг хугацаа хэмнэх сайн талтай ч байж мэдэхээр юм.   

Тэгвэл бартерын арилжаа нь ДЭД БҮТЭЦ, БАРИЛГЫН САЛБАРТ хэрхэн нөлөөлж байгаа талаар нарийвчлан үзье. 

Нийтлэл: Одоогоор хамгийн их анхаарал татсан сэдэв болох 2023 оны 2-р сарын 6-нд болсон Турк-Сирийн газар хөдлөлт нь 7.8 магнитуд бөгөөд хохирол нь одоогоор нарийн тооцоологдоогүй боловч 100 тэрбум доллар давсан байх магадлалтай байна. Шууд хохирлын үнэлгээгээр 2011 оны Тохокүгийн газар хөдлөлт 220 тэрбум америк доллар бол 1995 оны Кобэгийн газар хөдлөлт 100 тэрбум доллар гэж үнэлэгдсэн байдаг байна. Эндээс үзвэл Турк-Сирийн газар хөдлөлт нь дэлхийн хамгийн их сүйрэл дагуулсан газар хөдлөлтөд дээгүүр орох нь тодорхой байна.

Харин ойр ойрхон хүчтэй газар хөдлөлтөөрөө алдартай Япон улс газар хөдлөлтийн идэвхтэй бүсэд оршдог. Үүний үр дүнд барилга, байгууламжийг газар хөдлөлтөд тэсвэртэйгээр барих Японы барилгын салбарын туршлага, ур ухаан олон жилийн туршид хөгжиж дэлхийн хамгийн дэвшилтэт газар хөдлөлтөд тэсвэртэй технологи, барилгын нормыг боловсруулж өнөөгийн өндөрлөгт хүрсэн байна. 

Амины орон сууц: Эрчим хүчний хэмнэлттэй амины сууц барихаар төлөвлөж байгаа та бүхэнд ямар барилга барих вэ?, Ер нь эрчим хүчний хэмнэлттэй барилга манайд бий юу?, байвал ямар нөхцөлүүд нь манайд биелэгдэж байна, цаашид эрчим хүчний хэмнэлттэй барилгыг нэвтрүүлэх тал дээр ямар арга хэмжээ авах вэ? зэрэгт Dulaan.mn төслийн хүрээнд хийсэн судалгааны үр дүнг орууллаа. 

Монгол уран бүтээлч: Барилгын зураг төслийн компаниудын томоохон төлөөлөл болох “Эн Эй Пи Групп” ХХК нь 16 дахь жилдээ үйл ажиллагаа явуулж байгаа бөгөөд энэ хугацаанд нийт 200 гаруй зураг төслийг гаргасан. Монголын барилгын зураг төслийн салбарт 2 - 42 жил хүртэл ажиллаж байгаа дадлага туршлага бүхий зөвлөх болон мэргэшсэн инженер, архитекторууд, төрөлжсөн мэргэжлийн инженерүүдээр багаа бүрдүүлжээ. Тус компанийн Архитектур, инженер техникийн албаны захирал Г.Ганбат болон Ахлах архитектор З.Мөнхмандах нарыг энэ удаагийн “Монгол уран бүтээлч” буландаа урьж зураг төслийн салбарын талаар ярилцаж, онцлох бүтээлүүдийг нь танилцуулж байна. 

Шинэ материал: Ирээдүйн ногоон материалын тоонд маалинган дүүргэгчтэй тоосго орж байна. Гэвч маалинган тоосго нь цоо шинэ бүтээгдэхүүн биш харин 1955 оноос хойш Шверин хотод төвтэй, экологийн барилгын материалын чиглэлээр мэргэшсэн “Натурбаухаус” компани зөвхөн олсны ургамал, шохой, эрдэс бодис, уснаас бүрдэх материалыг хөгжүүлж ирсэн байна. Тухайн материалыг гарган авахдаа түүхий эдийг тасалгааны температурт шахаж хэвлэж тоосго болгодог байна. Сул олсыг байгалийн шохой, эрдэс бодистой хослуулснаар материалыг чулуу шиг хатуу, гадны цаг агаарын нөлөөнд тэсвэртэй болгодог аж. 

Маалингыг зөвхөн хөнгөн үйлдвэрлэл, хүнс болон эмийн үйлдвэрлэл зэрэгт ашиглаад зогсохгүй шохойгоор зуураад хавтан, тоосго хэлбэрээр ирээдүйн ногоон барилгын материал болгон ашиглаж байна. 

СЭТГҮҮЛ ЗАХИАЛАХ

Онлайн унших: НОМЫН САН 

Утас: 9100-0233, 7711-3333-2