Барилгын материалын үйлдвэрлэгчид, ханган нийлүүлэгчид, худалдаа, үйлчилгээ эрхлэгчдэд зориулан “Барилгын ханган нийлүүлэгчдийн чуулган” 2023  04-р сарын 06-ны өдөр МҮХАҮТанхимд амжилттай зохион байгуулагдлаа. Чуулганыг нээж БХБЯ - ны ББМҮБХЗГазрын дарга Д. Гантулга, Барилгын хөгжлийн төвийн дэд дарга Д.Алтанхуяг, Барилгачин группийн үүсгэн байгуулагч Г.Батсүх, МБМҮХ - ны гүйцэтгэх захирал Г. Цэрмаа, МҮХАҮТ- ын орлогч дарга Б.Намжилсүрэн нар үг хэллээ. 

Барилгын ханган нийлүүлэгчдийн чуулганд 180 орчим салбарын бизнес эрхлэгч аж ахуйн нэгж байгууллагуудын удирдлагууд оролцож, Салбарын зах зээлийн судалгаа мэдээлэл, төрийн  төслийн худалдан авалт санхүүжилт, үйлдвэрлэлийн боломж, орчин үеийн ханган нийлүүлэлт, логистикийн туршлага хэрэгжүүлэх боломжийн тухай мэдээлэл авч, тулгамдсан асуудлаа хэлэлцэж шийдвэрлэх арга замыг ярилцлаа.

Эхний хэлэлцүүлэг “Дотоодын барилгын материалын үйлдвэрлэлийг хөгжүүлэх боломж” сэдвийн хүрээнд өрнөж, тодорхой асуудлуудыг хөндөн ярилцлаа. 

Ганзагын хэлбэрээр гаальтай машинаар татвар төлөлгүй чанаргүй, хулхи материал импортоор их хэмжээгээр  орж ирдэгээс чанаргүй барилга баригдаж, иргэдийн эрүүл мэнд амь нас, эд хөрөнгө эрсдэлд орж байна. Хятадын дотоодын зах зээлээс гологдсон бусад орнуудад гаргах боломжгүй муу материалуудыг Монгол улсын барилгын зах зээлд шахаж байна. Гаалийн мэдээ, бодоит зах зээлийн мэдээлэл судалгаа алд дэлэм зөрдөг.  Жишээ нь: Паркетан шал гэхэд хилээр 200 мянга орчим м2 орж ирсэн гаалийн мэдээлэл байхад, бодит зах зээл дээр 1 сая гаруй м2 хэрэглэсэн байдаг. 

Барилгын материал нь хүнс, эмийн бүтээгдэхүүнтэй ижил эрсдэл өндөртэй бүтээгдэхүүн тул хилээр орж ирэхээс нь өмнө стандартын шаардлага хангаж байгаа, тохирлын гэрчилгээтэй эсэхийг эхлээд шалгаж импортлохыг зөвшөөрч байх нь зүйтэй байна. Хилээр орж ирсэн  хойно нь шалгаад шинжлээд оруулна гэвэл бөөн асуудалтай тул бусад орны жишгээр орж ирэхээс өмнө зохих зөвшөөрлийг олгож байх нь зөв юм.

БХБЯам бодлогоо гаргаж барилгын материалын импортлоход чанар стандартын шаардлага хангасан материал импортлох, чанаргүй хулхи бүтээгдэхүүн борлуулж байгаа этгээдэд хуулийн хариуцлага хүлээлгэх хууль эрх зүйн орчныг бүрдүүлэх хүсэлтийг хүргүүлж байна.

Хоёр дахь хэлэлцүүлэг “Орчин үеийн ханган нийлүүлэлтийн тогтолцоо” сэдвийн хүрээнд ярилцсан бөгөөд дараах саналуудыг гаргасан юм. 

• Барилга хот байгуулалтын салбарын үйлдвэрлэлийн нэгдсэн төлөвлөгөөг орон нутаг, бүс нутгийн хөгжилтэй уялдуулан төлөвлөх; 
• Судалгаагаар тогтоосон Үндэсний логистикийн сүлжээг цаашид нарийвчлан ТЭЗУС болон ТЭЗҮ боловсруулах, барьж байгуулах, үүнд мэргэжлийн холбоод, хувийн хэвшилтэй хамтрах шаардлагатай байна. 
• Барилгын материалын хангамжийн логистикийн төвийг төр хувийн хэвшлийн түншлэлээр байгуулах, 
• Барилгын материалын физик, химийн төлөв байдал, барилгын материалын чанарыг алдагдуулахгүйгээр технологийн тээвэрлэлт хийх, агуулах, нөөцийн удирдлагыг зохистойгоор удирдахад мэргэжлийн холбоодтой хамтрах 
• Барилгын материалын хангамжийн логистикийн нэгдсэн мэдээллийн системийг бий болгоход мэргэжлийн холбоодтой хамтран ажиллах 
• Барилгын ханган нийлүүлэлтийг тогтолцоо, мэдээллийн баазыг төр хувийн хэвшлийн түншлэлийн хүрээнд хэрэгжүүлэн барилгын материалаар тасралтгүй хангах, үнэ ханшийг тогтвортой байлгахад хамтран ажиллах хүсэлтэй байна.

Ханган нийлүүлэгчид төр засагтаа дуу хоолойгоо хүргэх, салбарын эрх зүйн болон бизнесийн орчныг сайжруулахаар “Барилгын ханган нийлүүлэгчдийн зөвлөл” ТББ-д нэгдэн хамтран ажиллахаар боллоо.