“Quay Quarter Tower” бол Сидней хотын 50 Бридж гудамжинд байрладаг тэнгэр баганадсан барилга юм. Анх 1976 онд “AMP” нэрээр баригдсан уг барилга нь 2018-2021 оны хооронд дахин төлөвлөлтөд орж өндрийн хэмжээ болон 4500м2 талбайг 10000м2 болгон талбайг нэмэгдүүлж, цамхгийн хэлбэр, дизайныг бүхэлд нь шинэчилсэн байна. 

Ингээд 2022 оны эхээр “Quay Quarter Tower” нэртэйгээр холимог зориулалттай буюу оффис, дэлгүүр, баар, ресторан, музей, зочид буудал зэргийг багтаасан 54 давхар, 216 метрийн (709 фут) өндөртэй барилга дахин нээгджээ. 

Анхны барилга болох “AMP”

Тус барилгын анхны хувилбар болох “AMP” төвийг 1976 онд Peddle Thorp & Walker зохион бүтээснээр, Mainline компани 45 давхрын өндөртэй барилгыг бетон, шил, ганга зэрэг материалуудаар бүтээн байгуулсан ба тухайн үед оффисын зориулалтаар үйл ажиллагаа явуулдаг байв. Тус төв нь 1977 онд 67 давхар бүхий “MLC Center” барилгын ажил дуусах хүртэл Сидней хотын хамгийн өндөр барилга байсан юм. 

Дахин төлөвлөгдсөн “Quay Quarter Tower”

“AMP” төвийн барилгын эдэлгээний хугацаа буюу насжилт дуусаж байгаатай холбогдуулан 2013 онд тус барилгыг нураах эсвэл сэргээн засварлах гэдгийг шийдэхийн тулд “Дизайны уралдаан”-ыг зарласан. Ингээд 2014 оны 9-р сарын 24-ний өдөр 3XN архитектурын компанийн архитекторуудын загвар шалгарсан бөгөөд BVN компани  3XN-тэй хамтран “Quay Quarter Tower” барилгын дизайны концепцийг боловсруулахаар сонгогджээ.

3XN,  архитектор Kim Herforth Nielsen

Төслийн концевцийг 2015 оны 11-р сард эцэслэн, 2018 оны эхээр барилгын ажлыг эхлүүлсэн ба барилгын гүйцэтгэгчээр “Multiplex” компани ажиллан барилгын гадна талыг бүхэлд нь сэргээн засварласан бөгөөд өндрийн хэмжээг нэмэгдүүлэн нэмэлт талбайг багтааж, ерөнхий физик хэлбэр, дизайн, фасадыг шинэчилсэн байна. 

Дахин төлөвлөлтийн хүрээнд “AMP” төвийн дотоод цөм, одоо байгаа багана, дам нуруу, хавтангийн 66%, дотоод хананы 95% нь хэвээр үлджээ. Барилгын хойд хагасыг буулган оронд нь шинэ хэсгийг барьсан ба түүнтэйгээ барилгын хуучин цөм болон өмнөд хэсгийг нэгтгэн фасадыг шинэчлэн засварлажээ.

Барилгын гадна фасад нь нэг нэгнийхээ дээр давхарласан шилэн бүтэцтэй, таван цуврал шилжилтээс бүрдэнэ. Энэ нь том босоо шалны хавтанг ашигладаг кампус маягийн бүтээн байгуулалтууд дээр суурилдаг ба таван босоо хэмжээ нь нийлээд 2000м² цэвэр шалны хавтанг бүрдүүлдэг байна. 

Давхарлагдсан 5 биет хэсэг

Хуучин барилгыг буулгахын оронд дахин төлөвлөлт хийн одоо байгаа талбайг шинэчлэн тохижуулж, шинэ фасад, лифтний хонгил бүхий хотын оффисын талбайг бий болгожээ.

2022 оны 11-р сард архитекторууд “Quay Quarter Tower”-ийн олон улсын өндөр барилгын шагналыг хүртсэн бол 12-р сард уг барилга нь Дэлхийн архитектурын наадмаас “Дэлхийн оны шилдэг барилга”-ын шагналыг хүртжээ.

Тус төсөл нь одоо байгаа барилгын үндсэн бүтээцийг дахин ашиглаж, барилгын ихэнх хэсгийг хадгалснаар 7500 гаруй тонн CO2 хэмнэжээ. Энэ хэмнэлт нь уг барилгыг хоёр жил хагасын хугацаанд үйлдвэрлэх нүүрстөрөгчтэй тэнцэх аж.

• NABERS-ийн эрчим хүчний 5.5 одтой

• Барилгын бүтээцийн 50 хувийг одоо байгаа барилгаас дахин ашигласан

• Хуучин барилгын бүтээцийг ашигласанаар нийт 7500 гаруй тонн нүүрстөрөгчийн хэмнэлт гарсан

• 130 сая ам.долларын хэмнэлт гарсан

Энэ бол ашиглалтын хугацаа нь дууссан барилгыг цоо шинэ барилга болгон хувиргаж буй архитектур юм.

“Бид илүү олон орон сууц, эмнэлэг, барилга байгууламж барих хэрэгтэй, гэхдээ метр квадрат бүр нь хүлэмжийн хий үүсгэдэг. Тиймээс бидний хийж чадах нэг зүйл бол нурааж, дахин барихын өмнө сэргээн засварлах явдал юм” гэж 3XN ийн багийхан Дэлхийн шилдэг барилгаар шалгаруулалтын үеэр хэлжээ.  

“Quay Quarter Tower” нь 1976 онд бариж ашиглалтад орсон АМР төвийн барилгын гуравны хоёрыг хэвээр үлдээж дахин төлөвлөгдөж хийгдсэн дэлхийн хамгийн анхны тогтвортой хөгжлийн бодлогыг хангасан Ногоон барилга болсон юм. Аливаа Барилга байгууламж  нь хүлэмжийн хийг нэмэгдүүлдэг СО2 буюу нүүрс хүчлийн давхар ислийг нэмэгдүүлдэг ба энэхүү “Quay Quarter Tower” нь 8000 тонн СО2 хэмнэлт гаргажээ. Энэ үзүүлэлт нь Сиднейгээс Мельбурн хотруу ойролцоогоор 35,000 удаагийн нислэг хийсэнтэй тэнцэх дэг СО2 той ижил  хэмжээ юм.

Байгаль орчинд ээлтэй энэхүү барилга нь “NABERS” буюу Австралийн үндэсний хүрээлэн буй орчны үнэлгээний системийг тодорхойлдог байгууллагаас 6 ногоон од зэрэглэл хүртсэн байна. 

Гадна фасад нь өндөр чанартай ба хэт ягаан туяаны хамгаалалттай шиллэгээ нь нарны дулааныг шингээдэг. Хурц гэрлийг бууруулдаг нарны шил нь 17,205 кВт цаг хүртэлх цахилгааныг хэмнэдэг байна. (Хэт халалтыг 30% бууруулна).

Барилга дотор ажиллаж буй хүмүүсийн дулааны ая тухыг сайжруулж, хувьсах гүйдлийг бууруулдаг. Дотоод гэрэлтүүлэг өндөр үр ашигтай, эрчим хүчийг LED - 33% хүртэл хэмнэсэн ба хөргүүрийн систем нь озоны давхрыг бага задалдаг шатамхай бус хийг ашигласан. Барилгын ашиглалтын явцад нэмэлт эрчим хүчийг хэмнэхийн тулд барилгад хуванцар ашиглаагүй. 

Тус барилгыг нураалгүй сэргээн барихад хамгийн хүндрэлтэй зүйл нь тээвэр ложистикийн асуудал байжээ. 

Барилгын ажлын үеэр 5 цамхагт кран, өдрийн ачаалалтай үед 1200 ажилтан ажиллаж, гадна 9 өргүүр, дотор 5 өргөгч ашиглан материалуудыг тээврийн менежмент хийжээ. Зэргэлдээх барилгуудад барилга угсралтын ажилтай холбоотой тээвэр ложистикийн мэдээллүүдийг хүргүүлэн 7 хоног тутам мэдээлэл солилцон хамтран ажилласан байна. 

Ойролцоох барилгууд болон ойр орчмын замын хөдөлгөөний ачаалал буюу ложистикийн асуудал байв. Үүнийг тусгай төлөвлөлтийн дагуу цогц баг маш хатуу цагийн хувиар төлөвлөгөөний дагуу барилга угсралтын ажлын бүхий л цаг үед амжилттайгаар ажиллажээ.