Шинэ орон сууц, барилгын материалын үнэ ханшийн судалгааг сар бүр, ажил гүйцэтгэлийн үнэлгээг улирал тутамд шинэчлэж, барилгын салбартай холбоотой мэдээ мэдээлэл, мэргэжилтнүүдийн  нийтлэлийг бэлтгэн хүргэдэг Барилга МН сэтгүүлийн №153 хэвлэгдэн гарлаа. 

Энэ сарын дугаарын нүүр хуудсанд Сайхан төмөрт ХХК хамтран ажиллаа. Тус компани нь гадаад худалдаа, төмрийн худалдаа төмөр хийц, ган бүтээцийн үйлдвэр, хөөсөнцөр хавтан үйлдвэрлэл, сэндвич хавтангийн үйлдвэр, барилга угсралт, ажлын хувцасны оёдлын үйлдвэр зэрэг чиглэлээр үйл ажиллагаа явуулж байна. 

Энэ дугаарт гарсан онцлох булангууд…

Барилгачны алдар: “Барилгачны алдар” ярилцлагын буландаа Монголын барилгын зураг төсөл зохиогчдын холбооны үүсгэн байгуулагчдын нэг, Аж үйлдвэрийн гавьяат ажилтан, “Эрчим төсөл” ХХК-ийн цахилгааны инженер, Монгол Улсын зөвлөх инженер, Хөдөлмөрийн баатар Дашзэвэгийн Нанжааг урин ярилцлаа. Тэрээр эрчим хүчний салбарт 60 гаруй жил хүчин зүтгэж яваа ахмадуудын төлөөлөл билээ. 

Барилгын маркетинг: Монголын маркетингийн холбооны ерөнхийлөгч Ш.Алтанбагана нь ХБНГУлсад стратеги менежмент, энтрепренершипийн чиглэлээр суралцсан бөгөөд өөрийгөө хөгжүүлэх, байгууллагыг удирдах, бизнесийг зөв аргаар хийх сэдвүүдээр олон байгууллага, хамт олон, мэргэжилтэн залуусд сургалт явуулж, энэ чиглэлийн тэргүүлэх экспертүүдийн нэг хэмээн хүлээн зөвшөөрөгдсөн нэгэн билээ. Барилгын компаниуддаа маркетингийн суурь ойлголт өгөх, орчин цагийн маркетингийн чиг хандлагыг хэрхэн хэрэгжүүлэх талаар түүнтэй ярилцлаа. 

Шинэ материал: Архитектурын программ хангамж, барилгын машин механизм, материал зэрэг барилгын салбарын бүхий л салбарт байнга өсөн нэмэгдэж буй инновацын нөлөөг харж болно. Гэхдээ энэ бүх инновацийн дотроос ирээдүйн барилгыг бүтээх хамгийн гайхалтай зүйл нь мэдээж барилгын материал юм. Эдгээрээс 18 материалыг ирээдүйн материалууд гэдэг бөгөөд эдгээрт тунгалаг модон материал, нэвт гэрэлтдэг бетон, өөрийгөө засдаг бетон, аэрографит, гидрокерамик, хөнгөнцагаан хөөс, ноосон тоосго, бионүүрснээс гарган авсан биопластик материал, нанокристалл, биореакторууд, хорт утаа шүүгч тоосго, 3D-графит зэрэг шинэ материалууд багтана.

Амины орон сууц: Эрчим хүчний хэмнэлт ярихаасаа илүүтэйгээр эрчим хүчийг яагаад хэмнэх шаардлагатай байгааг таниулах нь хамгийн чухал. Дэлхийн дулаарал уур амьсгалын өөрчлөлттэй холбоотойгоор дэлхийн дундаж температур 1880 оноос хойш дунджаар 1.2 температураар нэмэгдсэн нь мөстлөгийн үеэс хойших хамгийн өндөр хэм юм. Парисын хэлэлцээрээр 192 улс дэлхийн дулаарлыг 1.5 градуст барих амлалт өгсөн. Харамсалтай нь бидний дэлхий хэдийнээ 2.7 градус нэмэгдсэн байна. Энэ хэмжээний дулаарал нь олон орны хувьд гамшгийн дохио юм. Иймд хүлэмжийн хийг хамгийн ихээр ялгаруулагч Монгол Улсын барилгын салбар олон улсын дүрмээр бүтээн байгуулалтаа ногооруулах цаг болсон. 

Бид эрчим хүчний хэмнэлттэй, пассив амины орон сууцны төлөвлөлт болон төсвийг цувралаар хүргэж байгаа билээ. Энэ удаагийн дугаарт 58,92м2 сууцыг танилцуулах бөгөөд уг байшинг барихдаа хэрхэн өртгийг 50 хувь бууруулах талаар зөвлөгөөг архитектор Ч.Батцэнгэлээс тодрууллаа. 

Мэргэжлийн зөвлөгөө: Амины сууц, орон байрны  халаалтыг шийдэхэд барилгын зориулалт, төрлөөс хамааруулан сонгохоос гадна эрүүл ахуй, эдийн засаг, барилга архитектур, угсралт, ашиглалтын шаардлагыг үндэслэн төлөвлөнө. Сүүлийн жилүүдэд агаарын бохирдол ихсэж байгаатай холбогдуулан иргэд хүлэмжийн хийг ялгаруулахгүй, тав тухтай, цахилгаан  халаалтын системийн  ухаалаг, автоматжуулсан ногоон шийдлүүдийг амины орон сууцанд ашиглахыг илүүд үзэх болсон. Цахилгаан халаалтын шийдлүүд нь  усан халаалтын системийн эх үүсвэрийг цахилгаан зуухаар шийдэх, шууд тогонд залгах кабель болон плёнкон цахилгаан шалны халаалт, конвектор, хэт улаан туяаны халаагуур, шөнийн дулаан хадгалагч гэх мэт шийдлүүд  байдаг. Манай оронд өргөн ашиглаж буй цахилгаан халаагуурын шийдлүүдийг дараах зурагт үзүүлэв.

СЭТГҮҮЛ ЗАХИАЛАХ

Онлайн унших: НОМЫН САН 

Утас: 9100-0233, 7711-3333-2