Нийгмийн хамгаалал, хөдөлмөрийн харилцааны олон талт түншлэлийг оролцуулах ажлын хэсэг байгууллаа
Монгол Улсын Их Хурлын Нийгмийн бодлогын байнгын хорооны 2022 оны 17 дугаар тогтоолоор Монгол Улсын Их Хурлаас 2020.08.28-ны өдөр баталсан “Монгол Улсыг 2021-2025 онд хөгжүүлэх таван жилийн үндсэн чиглэлийг батлах тухай” УИХ-ын 23 дугаар тогтоолын 1 дүгээр хавсралтын 5.1.3, 5.1.4, Монгол Улсын Засгийн газрын 2020-2024 оны үйл ажиллагааны хөтөлбөр батлах тухай УИХ-ын 24 дүгээр тогтоолын хавсралтын 4.2.10 дахь заалтуудын хүрээнд эрүүл мэнд, нийгмийн хамгаалал, хөдөлмөрийн харилцааны бүх шатанд олон талт түншлэлийг оновчтой, үр дүнтэй нэвтрүүлж, гаргасан шийдвэрийн биелэлтэд хяналт тавьж оролцдог оновчтой тогтолцоог бүрдүүлсэн эсэхийг хянан шалгах, санал дүгнэлтийн төслийг боловсруулах үүрэг бүхий “Ажлын хэсэг”-ийг УИХ-ын гишүүн С.Ганбаатараар ахлуулан байгуулсан бөгөөд бүрэлдэхүүнд УИХ-ын гишүүн М.Оюунчимэг, Д.Сарангэрэл, Ц.Туваан, С.Чинзориг, Ч.Ундрам нар ажиллаж байна.
УИХ-ын гишүүн, “Ажлын хэсэг”-ийн ахлагч С.Ганбаатар 2023.01.24-ний өдөр Төрийн ордны “Их засаг” танхимд МБҮА ТББ, Ажил олгогч эздийн холбоо, Хувийн эмнэлгүүдийн холбоо, Авто замчдын холбоо, Ноос ноолуурын холбоо, Мах үйлдвэрлэгчдийн холбоо, Арьс ширний холбоо, Хоршоологчдын нэгдсэн холбоо зэрэг мэргэжлийн холбоодын төлөөллүүдийг хүлээн авч уулзсан бөгөөд МБҮА ТББ-ыг төлөөлж гүйцэтгэх захирал Л.Хулан оролцлоо.
Уулзалтын хүрээнд Монгол Улсын Их Хурлын Хяналт шалгалтын тухай хуулийн 8 дугаар зүйлд заасны дагуу ажлын хэсэгт мэргэжил, арга зүйн туслалцаа үзүүлэх ажлын дэд хэсгийг холбогдох төрийн байгууллага болон МБҮА ТББ, Ажил олгогч эздийн холбоо, Хувийн эмнэлгүүдийн холбоо, Авто замчдын холбоо, Ноос ноолуурын холбоо, Мах үйлдвэрлэгчдийн холбоо, Арьс ширний холбоо, Хоршоологчдын нэгдсэн холбоо зэрэг мэргэжлийн холбоодын төлөөллүүдийг оролцуулж байгуулахаар тогтож, төр засгаас гарч байгаа хууль, шийдвэр тогтоолуудын уялдаа холбоо, гаргаж байгаа шийдвэрүүд нь хувийн хэвшлүүдийн үйл ажиллагаанд хэрхэн нөлөөлж байгаа болон цаашид хууль эрх зүйн хүрээнд оруулах саналуудаа нэгтгэлээ.
Үүнд:
- Засгийн газрын танхим нь аливаа гаргаж буй шийдвэрийн хувьд уялдаа холбоотой байх
- Төр засгийн шийдвэр, гаргаж буй хууль эрх зүйн асуудлын төсөлд хувийн хэвшлийн дуу хоолой, саналыг заавал тусгаж байх
- Харьяа яамнуудад хувийн хэвшлийн төлөөллийг орон тооны болон орон тооны бусаар байлгах
- Засгийн газрын мөрийн хөтөлбөрт нийцүүлсэн төсөл хөтөлбөрүүдийг дэмжиж хэрэгжүүлэх
- Мэргэжлийн холбоодын тухай хууль болон Танхимын тухай хуулийн ялгаа, заагийг тодорхой болгох
- Төрийн бус байгууллагуудад гомдол шийдвэрлэх эрхийг өгөх зэрэг байв.
Тус “Ажлын хэсэг” нь байгуулагдсанаар эрүүл мэнд, нийгмийн хамгаалал, хөдөлмөрийн харилцааны бүх шатанд гаргасан шийдвэрүүд, түүний биелэлт нь нийгэмд ил тод болохоос гадна, шат шатанд үүсэж буй хүнд суртал, хүмүүсийг чирэгдүүлж буй асуудлууд арилна гэж үзэж байгаа болно.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.