2022 оны эдийн засгийг дүгнээд үзэхэд ковидын дараах эдийн засгийн хямрал үргэлжилж, эдийн засагт стагфляци үүссэн. Сүүлийн 14 жилд Монгол Улсад 3 удаа эдийн засгийн хямрал нүүрлэсэн бөгөөд цар тахал болон Украйны дайнтай холбоотой уналт нь хамгийн удаан үргэлжилж байгаа нь юм.

2022 оны эцсийн байдлаар эдийн засгийн өсөлт 2,6 - 3 хувь байна гэж үзэж байгаа бөгөөд 2023 онд 5 хувь болно гэсэн төсөөлөлтэй байгаа төдийгүй   инфляцын түвшинг нэг оронтой тоо буюу 8 орчим хувьд барих бодлоготой ажиллах юм. 

Хятадад авч хэрэгжүүлж буй тэг ковидын бодлоготой холбоотойгоор ачаа эргэлт удааширч магадгүй. Хөрш зэргэлдээ орнуудад үнийн өсөлт үргэлжилнэ. Энэ нь манай импортоор орж ирэх бараа бүтээгдэхүүнд нөлөөлнө. Түүхий эдийн үнэ буурна гэж тооцож байгаа ч 2019 оны үеэс илүү өндөр үнэтэй байхаар байна.

Эдийн засгийн нөлөөгөөр барилгын салбар нь байж болох түвшнөөс 24 хувиар уналттай гэсэн үзүүлэлт гарсан ч ирэх онд өсөлттэй гэж харж байна.

Валютын нөөц нь 2013 оноос хойш хамгийн доод түвшиндээ буюу 1,5 ам.долларын алдагдалтай байгаа. 2022 оны эхний байдлаар 4,4 тэрбум ам.долларын нөөц байсан бол одоогоор 2,8 тэрбум ам.долларын нөөцтэй байна. Энэ нь гадаад өр зээлийг цаг тухайд нь барагдуулахад ямар нэгэн хүндрэл учрахгүй гэж үзэж байна. Харин 2023 онд валютын нөөцийг 3.7 тэрбум ам.долларын босгыг давуулахыг зорьж байгаа бөгөөд ингэснээр 4-6 сарын хэрэгцээг хангах бодлого хэрэгжүүлж байгаа юм. 

Засгийн газрын үнэт цаасны хэмжээ унаж өгөөжийн түвшин өсөж байгаа нь цаашид өрийн зохицуулалтын арга хэмжээний хүрээнд арилжаалах гадаад үнэт цаасны үнэ өндөр тогтох эрсдэлийг бий болгож байна. Нэмж дурдахад иргэдийнх хадгаламжинд 18,4 их наяд төгрөг төвлөрч байна гэсэн судалгаа гарчээ. 

2023 оны улсын төсвийн хувьд шинэ бүтээн байгуулалт хийгдэхгүй зөвхөн дуусаагүй бүтээн байгуулалтуудыг дуусгах чиглэл баримталж ажиллахаар шийдвэрлэсэн. 

Төсвийн хөрөнгө оруулалтын эрэмбэ

Улсын төсвийн хөрөнгө оруулалт