Шинэ ширээтэй болохын тулд өндөр үнээр худалдаж авах гэж байна уу? Ширээ хийх нь харьцангуй энгийн төсөл бөгөөд тавилга урлах туршлага багатай эсвэл огт туршлагагүй хүн ч хийж чадна. Эхлээд ширээ байрлуулах өрөөний талбайг хэмжиж, ширээнийхээ хэмжээг тооцоолоорой. Дараа нь мод болон бусад материал багаж хэрэгслээ бэлдэнэ. Төгсгөлд нь ширээгээ эрүүл мэндэд сөрөг нөлөөгүй будгаар будаж, чимэглэнэ. Зааврын дагуу хийсэн  таны ширээ бат бөх, тогтвортой, удаан эдэлгээтэй байх болно. 

1. Ширээ байрлуулах талбайг хэмжинэ.  

Шинэ ширээ хаанаас хаа хүртэл байрлахыг тодорхойлон төмөр метр ашиглан талбайнхаа нэг захаас нөгөө зах хүртэл сунгаж хэмжинэ. Хэмжсэн хэмжилтээ бичиж тэмдэглэх нь материалын илүү болон дутуу худалдан авалт хийхээс сэргийлнэ.

2. Ширээнийхээ хэмжээг шийдээрэй. 

Ойролцоогоор 0.46 м2 ажиллах талбай байна гэж үзвэл хангалттай зайтай байхын тулд 0.61м урт, 1.2м өргөнтэй ширээ хийж болно. Та өөрийн хүссэнээрээ ширээний хэмжээг тодорхойлох боломжтой бөгөөд ширээнийхээ хэмжээг сонгохдоо сандал тавих, бичгийн шүүгээ болон бусад хэрэгцээт талбайг тооцоолохоо бүү мартаарай. 

Ихэнхдээ ширээний стандарт нь 74–76 см өндөртэй байдаг. Дотоод хэмжээснүүд нь харилцан адилгүй боловч хамгийн нийтлэг ширээний урт нь 1,2 м, 1,5 м, 1,8 м, өргөн нь 0,61 м, 0,76 м болон 0,91 м байдаг. Бүх зүйлийг хялбар байлгахын тулд ширээний  1⁄2 буюу голд нь тэмдэглээрэй. Энэ нь бүх хэмжилт, тэмдэглэгээ хийх, огтлох ажлыг хөнгөвчлөх болно. 

3. Хавтан модоо зохистой хэмжээгээрээ зүсэж бэлдэнэ.  

Ширээний үндсэн тавцанг 2х6 эсвэл 2х4 хэмжээтэй хавтан модоор хийнэ. Хавтан модон дээрээ хэмжээсээ тэмдэглэж гар болон цахилгаан хөрөө ашиглан хэмжээсний дагаа зүснэ. 

0.61м х 1.2 м хэмжээтэй ширээ хийхийн тулд 2.4 м хэмжээтэй хавтанг уртын дагуу 4 ижил хуваан бэлдэнэ.

Компьютерын ширээний тавцанг угсрахын өмнө 4 ижил хуваан бэлдсэн хавтанг хооронд нь холбоно. Ингэхдээ дунд хэсэгт байрлах хавтангуудын ирмэгүүдийг дугуйруулан зүлгүүрдэх шаардлагатай. Энэ ажлыг хөнгөвчлөхийн тулд хөрөөндөө ирний хамгаалалт тохируулаарай. 

4. Будалтад бэлтгэхийн өмнө хавтанг сайтар зүлгүүрдэнэ. Хатуу зүлгүүрээр  хавтангийн гадаргуугийн өө сэвийг үрж цэвэрлэснээр хавтан нь будгийг илүү сайн шингээн авна. Гар зүлгүүртэй харьцуулахад автомат өнгөлгөөний зүлгүүр нь цаг хугацааг хэмнэдэг.

5. Бэлдсэн 4 хэсэг хавтангуудыг нэгтгэн наах. Хавтангуудыг нэгтгэн наахдаа цавуугаа жигд, шулуун түрхэх бөгөөд дугуйруулан зүлгэсэн ирмэгийг цэвэрхэн үлдээнэ. Энэ маягаар хавтан бүрийг зөв байрлуулан наагаарай. Цавуудсан хавтанг нягт, сайн наалдуулахын тулд модны хавчаар ашиглан 1 цагийн турш хавчиж хатаана. (танд доод тал нь 2 ширхэг хавчаар хэрэгтэй). Хавтангийн завсраар ил гарсан илүүдэл цавууг хатахаас нь өмнө арчиж цэвэрлэнэ. 

6. Компьютерын ширээгээ будах.  Цавууг бүрэн хатаж дууссаны дараа компьютерын ширээгээ хүссэн өнгө, загвараар 2-3 удаа давхарлан модны ширхгийн эсрэг чиглэлд будна. Давхарлан будахын өмнө эхний будсан будгийг сайтар хатаах хэрэгтэй. Давхарлан будах хоорондоо илүүдэл пигментийг арчиж цэвэрлэнэ. Ингээд будаж дууссан гэж үзвэл 24 цагийн турш хатаана.

7. Ширээний хөлийг бэлдэх.  

Тулгуур- Эхлээд 2х4 хэмжээтэй 3,8 см зузаантай хавтанг хөрөөдөж бэлтгэнэ. Энэ нь ширээний 2 талд 2 хөлийн хооронд байрласнаар ширээг доороос нь бэхлэх тулгуур болно. Таны компьютерын ширээ 0.61 м өргөнтэй учраас тулгуур хэсэг тус бүр нь 0.53 м байх ёстой. Энэ нь хоёр талдаа хөл тавихад хангалттай зай үлдэх юм. 

Хөл- Ширээний хөл хийх модоо 4 ижил хэмжээтэй бэлдэх бөгөөд хөлийн өндрийг та өөрийн хүслээр хийж болно. 

8. Ширээгээ илүү өнгөлөг харагдуулахын тулд бэлэн ширээний хөлийг худалдаж авах боломжтой. Та өөрийн бэлдсэн  ширээндээ бэлэн зориулалтын  хөлийг худалдан авч угсарч болох юм. Ихэнх барилгын дэлгүүр, гэр ахуйн тохижилтын төвүүд буюу тавилгын дэлгүүрүүдээс худалдан авч болно. Төрөл бүрийн материал, хэмжээстэй байдаг тул та ширээнийхээ хэв маягт тохируулан сонгоорой. Жишээлбэл, металл хөл нь бага зэрэг будсан модон ширээг гөлгөр, минималист орчин үеийн болгож чаддаг.

9. Хуучин ширээ болон бусад тавиуруудын хөлийг ашиглах боломж бас бий.  Та өөрийн гараар бүтээсэн эсвэл бэлэн үйлдвэрийн хөлөөр хязгаарлагдахгүй гэдгийг санаарай. Өөрийн бүтээсэн ширээндээ зохицуулан хуучин модон тавиуруудын хөлийг ашиглан өвөрмөц байдлаар гоёж чимэглэн, будаж өөрийн хүссэнээр дизайн гаргах боломжтой. 

10. Ширээний хөлийг тавцангийн доод хэсэгтэй холбох. Зүсэж бэлдсэн хөлийг бэхлэхийн тулд хөл бүрийн гадна талаас дотогш чиглэлтэйгээр 2 ширхэг эрэг шургаар өрөмдөж тогтооно. Дараа нь тулгуурыг 18 см тутамд боолтоор өрөмдөж бэхэлнэ. Ширээ тогтвортой байгаа эсэхийг бэхэлж дуусаад хөдөлгөн шалгаарай. Харин худалдаж авсан ширээний хөл хийх бол тэр нь угсрах явцыг хялбаршуулсан эрэг шургын нүхтэй байдаг. 

11. Компьютерын ширээгээ эмх цэгцтэй байлгахын тулд шүүгээ худалдаж авах нь цаг хугацааг хэмнэх болно.

Баримт бичиг, төхөөрөмж, ажлын бусад хэрэгсэл эд зүйлсийг хадгалахад хэд хэдэн татдаг шургуулга хэрэгтэй болдог. Ширээндээ шургуулга нэмэхийн тулд эхлээд ширээний доод талд өөрийн суух орон зайд тохируулан тусгаарлах хүрээ, төмөр зам  суурилуулан бэлдэнэ. Тавилгын дэлгүүрээс ширээний хэмжээст тохирсон шургуулга сонгоорой. 

12.  Компьютерын ширээндээ бяцхан номын тавиур хийгээрэй. 

Номын тавиур хийхэд олон материал хаалга, нугас гэх мэт зүйлсийн шаардлагагүйгээр ил тавиур бүтээх нь илүү энгийн минималист шийдэл болдог. Тавиураа хийхдээ компьютерын ширээнийхээ урттай ижил хэмжээтэй, тавиурын өндөр, өргөнийг өөрийн хүссэн хэмжээгээр дизайн шийдлийг алдагдуулахгүй байхаар хавтанг зүсэж бэлдэнэ. Хавтангийн ирмэгүүдийг хооронд нь шураг боолтоор холбоно. Дараа нь угсарсан тавиураа ширээтэйгээ холбож шураг боолтоор өрөмдөж тогтооно.

Хэрэв та хүсвэл ширээнийхээ нэг талын хөлийн оронд ширээний хөлийн өндөртэй шүүгээ эсвэл тавиур байрлуулж бас болно. Ширээний хөл, шүүгээ 2-н өндрийн хэмжээ нь ижил бус бол дээрх шийдлийг хэрэгжүүлэх хэрэггүй.

13. Цахилгааны утсыг нуухын тулд ширээний ард нүх гарга. Ширээний арын ирмэгийн дагуу нүхний хөрөө ашиглан ил харагдахгүй газар нүхэлнэ. Нүхний хөрөө нь 2.5-15 см хүртэл диаметртэй байдаг. Төрөл бүрийн төхөөрөмжүүдийнхээ бүх утсыг багтаахын тулд хамгийн тохиромжтой гэж үзсэн хэмжээгээр зүсээрэй. Гаргасан нүхэндээ хуванцар хүрээг байрлуулж түүгээрээ компьютер, гар утасны цэнэглэгч, принтер, сканер болон бусад электрон төхөөрөмжүүдийн кабелийг гарган тогонд холбоорой. Утас далдлагч нүхийг бий болгосноор ил харагдах замбараагүй утас, кабелийг эмх цэгцтэй, гэмтэж тасрахаас сэргийлэх юм. 

Бэлтгэсэн: С.ОРГИЛЦЭЦЭГ