2000 он гарсаар барилгын салбар маш эрчимтэйгээр хөгжиж эхэлсэн ч салбарт түрэн гарч буй аж ахуй нэгжүүд, тэдний гайхамшигтай бүтээн байгуулалт, үйл ажиллагааг олон нийтэд түгээх, дагнасан хэвлэл мэдээллийн суваг үгүйлэгдэж эхэлсэн юм. Тийм ч учраас тэрхүү орон зайг нөхөн барилгын салбарынхны нэгдэх уулзвар, дуу хоолой нь болон ажиллахыг зорилго болгон, та бүхнийхээ нэгдлийн уулзвар дээр “БАРИЛГА МН” хэмээх айл өрхөө татсан түүхтэй билээ. 

• 2007 оны 3 сар - “BARILGA.MN” сайт нээлтээ хийж, одоогоор 1200 гаруй барилгын салбарын ААН компани, 15000 гаруй барилгын материал, үл хөдлөх хөрөнгө, олон талын мэдээллийг агуулсан томоохон хэмжээний платформ болон хөгжсөн байна. 

• 2007 оны хавар - “BARILGA EXPO” анхны үзэсгэлэн, яармаг нээлтээ хийж, жил бүр уламжлал болон олон улсын хэмжээнд зохион байгуулагддаг салбарын хамгийн том арга хэмжээ болоод  байна. 

• 2009 он -  “BARILGA AWARDS” барилгын салбарын шилдгүүдийг шалгаруулах арга хэмжээг зохион байгуулж эхлэв.

• 2010 оны 3 сар - “БАРИЛГА МН” сэтгүүлийн анхны дугаар олон нийтэд хүрч, сар бүр тасралтгүй хэвлэгдсээр өдгөө 150 дахь дугаараа уншигчдадаа хүргэж байна.

• 2011 оны 3 сар - “BARILGA BASKETBALL” анхдугаар тэмцээн болж, жил бүр зохион байгуулагддаг барилгын салбарын уламжлалт спортын арга хэмжээ болжээ.

• 2011 оны 11 сар- “BARILGA BILLIARD” анхдугаар тэмцээн зохион байгуулагдаж, жил бүр барилгын салбарын удирдах ажилтнуудын оролцдог уламжлалт үйл ажиллагаа болсон. 

• 2012 он- “ИНТЕРЬЕР ДИЗАЙН” катологийн анхны дугаар гарав.

• 2013 оны хавар -  “АМИНЫ ОРОН СУУЦНЫ ШИЛДЭГ 100 ЗАГВАР” каталог анхны дугаараа гаргаж, 2 жил тутамд шинэчлэгдсэн гарсаар байна. 

• 2014 он - БАРИЛГА МН өөрийн оффисоо барьж, ашиглалтад оруулав. 

• 2014 он - Байгууллагын  стратеги төлөвлөгөөгөө боловсруулан, жилээс жилд сайжруулан өнөөдрийг хүртэл хэрэгжилтийг ханган ажиллаж байна.

• 2016 оны 3 сар - “ХАНГАН НИЙЛҮҮЛЭГЧДИЙН АНХДУГААР ЧУУЛГА УУЛЗАЛТ”-ыг зохион байгуулж, салбарын төрийн болон төрийн бус байгууллагуудтай хамтран уламжлал болгон зохион байгуулагдаж байна. 

• 2016 он - Шинэ үеийн барилгын салбар үүсэж хөгжсөний 90 жилийн ойд зориулан “БАРИЛГА, ҮЛ ХӨДЛӨХ ХӨРӨНГИЙН САЛБАРЫН СУДАЛГААНЫ ТАЙЛАН”-г гаргав.

• 2017 он - Улаанбаатар хотод хэрэгжүүлж буй “ШИНЭ ОРОН СУУЦНЫ ТӨСЛҮҮДИЙН ТООЛЛОГО, СУДАЛГАА”-г жил бүр хийж эхлэв. 

• 2019 оны 4 сар - “BARILGA.MN” платформын 5 дахь удаагийн бүрэн шинэчлэлтийг ашиглалтад оруулав.

• 2020 он - БХБЯам, БХТөвтэй хамтран “ГОЛ НЭР ТӨРЛИЙН 12 МАТЕРИАЛ”- ын   албан ёсны үнэ ханшийн судалгаа гаргав. 

• 2020 оны 5 сар -  Барилгын салбарт анх удаа “BARILGA EXPO - 2020” цахим үзэсгэлэнг зохион байгуулж, 120 000 гаруй үзэгч, хэрэглэгчдэд хүрч ажиллав. 

• 2021 он -  Орчин цагийн хөгжил дэвшилтэй хөл нийлүүлэн “БАРИЛГА МН” сэтгүүл нь онлайн хэлбэрт давхар шилжив.

• 2022 он - “ХАУС ДИЗАЙН”  катологийг бүрэн шинэчлэн гаргав. 

• 2022 он 6 сар “CONSTRUCTION MARKETING” барилгын салбарынханд зориулсан маркетингийн анхдугаар уулзалтыг зохион байгуулав.

• 2022 он 10 сар “BARILGA.MN” платформын 6 дахь хувилбарын ажлыг эхлүүлэв.

БАРИЛГА МН-ийн 15 жилийн ойд зориулсан салбарын эрхэм хүндтэй төлөөллүүдийн сэтгэгдлийг хүргэж байна. 

БАРИЛГА МН-ийн Үүсгэн байгуулагч Г.Батсүх

Барилгын салбарт тухайн үед дутагдаж байсан зүйл нь салбарынхан болоод иргэд энэ салбарын мэдээллийг тухайн цаг үед нь хоцролгүй авах мөн нэг дороос компаниудын мэдээллийг, бүтээгдэхүүн, үйлчилгээтэй танилцахад зориулсан хэвлэл мэдээллийн хэрэгсэл байгаагүй явдал юм. Энэхүү компаниудын болоод иргэдийн хүсэл шаардлагад тулгуурлан нэгдсэн мэдээллийн вэбсайтаа 2007 онд байгуулсан. Монголын барилгын салбарын хамгийн анхны нэгдсэн портал сайтыг нээсэн нь өдгөө 5 удаагийн бүрэн хэмжээний шинэчлэлтийг хийгээд буй бидний брэнд болсон barilga.mn вэбсайт юм. 

Үүний хажуугаар цаасан хэвлэлийн үнэ цэнийг харуулсан уламжлалт сэтгүүлийг эрхлэн гаргахыг салбарын эрхэм хүндтэй хүмүүс маань зөвлөж, хүссэн учир 2010 онд Барилга МН сэтгүүлээ сар тутам хэвлүүлэн гаргахаар төлөвлөж анхны дугаараас хойш нэг ч удаагийн тасралтгүйгээр өдгөө 151 дэх дугаар нь уншигч та бүхэнд хүрээд байна. Өнөөдөр бид 15 жилийн үр дүнгээ хэлэлцэж байгаа нь төдийгөөс өдийг хүртэл бидэнтэй хамтран ажиллаж ирсэн барилгын салбарын итгэлт түншүүд та бүгдийн минь хамтын ажиллагааны үр дүн билээ. 

“Барилгын хөгжлийн төв”-ийн Захирал Ц.Амарсанаа 

Монгол Улсын Засгийн газраас хэрэгжүүлж буй “Алсын хараа 2050” хөтөлбөрийн хүрээнд цахим үндэстэн болох дунд хугацааны хөтөлбөрийг дэвшүүлсэн. Үүнтэй уялдуулан барилгын салбарын хамгийн том хэвлэл мэдээллийн хэрэгсэл болох Барилга МН нь barilga.mn вэбсайт болон Барилга МН цахим сэтгүүлээрээ дамжуулан төр хувийн хэвшлийн хамтын ажиллагааг холбохоос гадна иргэдэд салбарын талаарх мэдээллийг цахимаар нэг дороос авах боломжийг ханган ажиллаж буй давуу талтай.  

Монгол Улсын Гавьяат барилгачин, ШУТИС-ийн хүндэт профессор, доктор Л.Шагдаррагчаа 

Барилга МН-ийн 15 жилийн ой тохиож буй энэ явдлыг барилгын салбарынхан маань “Монголын барилгын салбарын хүчирхэг хэвлэл мэдээллийн хэрэглэсэн” гэж үнэлж дүгнэн хамт баярлаж байна. barilga.mn вэбсайт, Барилга МН сэтгүүл мөн барилгын салбарын компаниудыг хамруулсан жилд 2 удаа зохион байгуулагддаг үзэсгэлэн зэрэг үйл ажиллагаа нь Барилга МН-ийн нэгдэл юм. Мэдээлэл технологийн хөгжлийн эрин зуунд мэдээлэлгүйгээр хөгжил дэвшил үгүй болсон энэ цаг үед Барилга МН сэтгүүл нь барилгын салбарын инженер техникийн ажилтнуудад ус, агаар шиг хэрэгтэй гол хэрэглүүр болсон байна. 

МБМҮХолбооны бодлогын зөвлөх, Барилга МН сэтгүүлийн бодлогын зөвлөлийн гишүүн, Зөвлөх инженер  О. Лхагвадорж

Барилгын салбар бүхэлдээ хувьчлагдсан. Тиймээс салбарын төрийн байгууллага, хувийн хэвшлийн хоорондын уялдаа холбоог хангахад ямар нэгэн мэдээллийн хэрэгсэл бидэнд дутагдаж байсан орон зайг “Барилга МН” амжилттайгаар бий болгож чадсан. Барилга МН сэтгүүлийн хувьд Монгол Улсад хэрэгжүүлж буй томоохон төслүүд, бизнес эрхлэгчдийн нэвтрүүлж буй ноу-хау, шинэ техник технологи, инновац зэргийг барилгын салбар төдийгүй бүхий л салбарт түгээж буй өндөр ач холбогдолтой сэтгүүл юм. 

МБГБХолбооны ерөнхийлөгч, Монгол Улсын гавьяат барилгачин, Зөвлөх инженер Б.Жүгдэр 

Бид Барилга МН сэтгүүлээс барилгын салбарын бүхий л мэдээллийг авч байгаа нь хэвлэл мэдээллийн орон зайд болон салбартаа томоохон байр суурь эзэлсэн, бодитой мэдээлэл хүргэдгийг илтгэнэ. Мэдээлэл, нийтлэл тэр дундаа үнэ ханшийн судалгаа гэдэг бол салбарт, иргэдэд хамгийн эрэлттэй, чухал материалын нэг юм.

“Дельта констракшн” ХХК-ийн  үүсгэн байгуулагч, Монгол Улсын Гавьяат барилгачин, Зөвлөх инженер Ц.Эрдэнэбат 

Манай улсад 15 жилийн өмнөөс эхлээд барилга гэдэг бол менежмент, нөөцийн удирдлага, мэдээллийн урсгалын зохицуулалт юм гэдэг ойлголт бий болсон. Яг энэ ойлголттой зэрэгцээд Барилга МН-ийн үүсгэн байгуулагч Г.Батсүх барилгын мэдээллийн тухай ярьж эхэлсэн түүхийг би мэднэ. Товчхондоо, барилгын талаарх мэдээллийн урсгалыг зөв ашиглаж, барилга барих процессыг мэдээллээр дамжуулан бусад хүмүүс мэдэж эхэлсэн. Миний мэддэг барилгын салбарт цоо шинэ мэдээллийн урсгалыг бий болгосон Барилга МН-ийн хамт олонд 15 жилийн ойн баярын мэндийг хүргэе!

ШУТИС доктор, Дэд профессор Монгол Улсын Гавьяат барилгачин, МБИХ-ны хүндэт ерөнхийлөгч Э.Ганзориг

2000-аад оны барилгын салбарын сэргэлтийн үед төр болон төрийн бус байгууллага, сургалтын төвүүд, хувийн хэвшлүүд, жирийн иргэдэд гээд бид бүгдэд одоогийн Барилга МН-ийн явуулж буй үйл ажиллагаа, бүхий л мэдээллүүд дутагдаж байсан. Энэ дутагдаж буй орон зайг бий болгосон, өнөөг хүртэлх тасралтгүй ажиллагааныхаа үр дүнг харж буй энэхүү байгууллагын хамт олонд 15 жилийн яруу алдарт замналыг нь сайшаан, цаашдын арвин их амжилттай байхыг хүсэн ерөөе! 

МБҮА-ийн Ерөнхийлөгч Н.Баярсайхан

Барилгын салбар нэгдсэн нэг том салбар боловч араасаа 100 гаруй салбарыг дагуулдаг томоохон ам бүлтэй толгой салбар гэж хэлж болно. Энэ ам бүлийн мэдээллийг хурдан, шуурхай, орчин үеийн технологийг ашиглан сэтгүүл, вэбсайт, үзэсгэлэн яармаг гэх хэлбэрүүдээр түгээж байгаа салбартаа нөлөө бүхий хэвлэл мэдээллийн хэрэгсэл болсон байна. 15 жилийн турш салбарынхыг хооронд нь холбож байгаа энэ үйлс нь улам өргөжиж зуу зуун жил үйл ажиллагаагаа үргэлжлүүлэх ерөөлийг салбарынхаа хамт олны зүгээс дэвшүүлье!

Монгол Улсын Гавьяат Барилгачин, Зөвлөх архитектор, Профессор Ч. Дагшигдорж

Барилга МН сэтгүүл бол хот суурин газар, бүх төрлийн барилга байгууламж, тэр бүхнийг илрүүлж, сурталчилж, сайн, мууг ялган дэлгэж тавьдаг, энэ салбарт ажилладаг бүх хүмүүст хүрдэг нөлөө бүхий сэтгүүл юм. 

Барилга МН-ийн Мэдээлэл технологийн албаны дарга Д. Алтан-Очир 

Barilga.mn сайтыг олон нийтэд тэр дундаа барилгын салбарынханд хүргэх, таниулах, илүү өргөн цар хүрээг хамрах ажлын хүрээнд энэ хугацаанд 5 удаагийн бүрэн хэмжээний шинэчлэлтийг хийсэн байна. Хамгийн сүүлийн шинэчлэлтээрээ барилгын салбарын 1200 орчим компаниудын мэдээллийг дэд сайтын системд шилжүүлж, компани бүр өөрсдийн сайтыг хөгжүүлэх, цаг хугацаа, санхүүгийн асуудалгүйгээр сайтаа шинэчлэх боломжоор хангасан. Мөн салбарын норм дүрэм, баримт бичиг болоод бусад цахимаар унших боломжтой мэдээллүүдийг номын сан болгон нэгтгэсэн нь салбарынхан болоод иргэд  цахимаар мэдээлэл авах боломжтой болж байгаа юм. Одоогийн байдлаар цахим номын санд байршсан Барилга МН сэтгүүлийг өдөрт 2000 орчим хэрэглэгч уншиж байгаа үзүүлэлттэй байна.  

“Монкон констракшн” ХХК-ийн Гүйцэтгэх захирал Г.Батбаяр

Барилга МН-ийн үйл ажиллагааг барилгын салбарын компаниуд болон хэрэглэгч хоорондын уялдаа холбоог бий болгож, салбарын компаниуд нэг нэгнээсээ суралцах, мэдээлэл солилцох, бизнесийн харилцаа холбоо тогтоох, хөгжих үйл явцад нэмэр болдог гэж миний зүгээс дүгнэн хэлнэ. 

“Акватерм” ХХК-ийн Ерөнхий захирал О.Батнаран

Гаднын улс руу аялал болон салбарын үзэсгэлэнд явахдаа тухайн улсад байгаа барилгын салбарын сэтгүүлүүдийг хараад манайд энэ төрлийн сэтгүүл бий болбол хамгийн түрүүнд, хамгийн сайн байршилд манай компанийн зар сурталчилгаагаа байрших ёстой гэж боддог байснаа тун удалгүй биелүүлсэн нь Барилга МН сэтгүүл байсан. Тус сэтгүүл хэвлэгдэж эхэлсэн цагаас бид хамгийн арын нүүрэнд өнөөдрийг хүртэл сурталчилгаагаа байршуулан хамтран ажиллаж байна. 2 болон 3 дугаар сар, 9 болон 10 дугаар саруудын дугаарууд, үзэсгэлэнгийн үеэр тараагддаг тусгай сэтгүүлд илүү их ач холбогдол өгч хамтран ажилладаг. Сэтгүүлээс гадна хавар, намар зохион байгуулагддаг BARILGA EXPO, БАРИЛГА-ОРОН СУУЦ үзэсгэлэн, яармагуудад тогтмол оролцож, зөвхөн өөрсдийн бараа бүтээгдэхүүнээ 10 мянга хүртэлх хэрэглэгчдэд тухайн өдрүүдэд танилцуулан хүргэсэн байдаг. Үүнээс дүгнэхэд Барилга МН нь манай байгууллагын бизнесийн салшгүй нэгэн хэсэг болсныг баяртайгаар хэлмээр байна. 

“Тесо пропертис” ХХК-ийн Бизнес хөгжлийн газрын захирал П.Лхагвадорж

Барилга үл хөдлөхийн тухайлсан сэдвээр 15 жил тасралтгүй үйл ажиллагаагаа явуулж, дугаараас дугаар хүртэл салбарынхны хүсэн хүлээдэг сэтгүүл болно гэдэг маш их тууштай болон туйлбартай хөдөлмөрийн үр дүн. Бид Барилга МН-тэй байнгын хамтын ажиллагаатай байж, үзэсгэлэн бүрд оролцдог. Үзэсгэлэн, яармаг дууссанаас хойш бүтээгдэхүүний борлуулалтын эрч сулардаггүй, үзэсгэлэн дээр хүрэлцэн ирсэн худалдан авагчид эргэж холбогддог идэвх нь 2 сар хүртэлх хугацаанд буураагүй байдаг. Барилгын салбараас гадна үл хөдлөх, орон сууц, барилгын материал сонирхогчдын хүсэн хүлээдэг үзэсгэлэн болсон гэдэгт бид маргахын аргагүй болсон байна. 

“Барилгачин худалдааны төв” Төслийн захирал Д.Цолмонтуяа

Анх үзэсгэлэн, яармаг зохион байгуулах тухайн үед компаниуд “гурван өдрийн үйл ажиллагаанд ямар их нөсөр арга хэмжээ болдог юм” гэж хардаг байсан. Харин өнөөдөр оролцогчид гаднын улсын үзэсгэлэнгүүд шиг өндөр ач холбогдол өгдөг болсон нь урт хугацаанд зохион байгуулсан энэхүү ажлын үр дүн, ололт амжилт гэж хардаг. Бидний хувьд үзэсгэлэн, яармагийг зохион байгуулахаас гадна үзэсгэлэнд хэрхэн амжилттай оролцох, тухайн өдрүүдийг үр ашигтай байлгах, богино хугацаанд хамгийн үр дүнтэй борлуулалт хийх боломж бол үзэсгэлэн юмаа гэдэг ойлголтыг өгөхийн тулд тухайн байгууллагын ажилтнуудыг давхар хөгжүүлэхийг хичээдэг. Нэг удаагийн үзэсгэлэнд 300 орчим компанийг хамруулж, 58 тэрбум төгрөгийн борлуулалтыг эргэлдүүлж байна гэдэг нь үзэсгэлэн салбартаа хэр хэмжээний өндөр ач холбогдолтой болж, цаашлаад энэ нь компаниуд, хэрэглэгч, нийгэмд гээд аль аль талдаа өгч буй үнэ цэн гэж хэлж болно. 

Салбарынхаа ололт, амжилт, алдаа оноо бүхэнд нь хамт байсан 15 жил, Төрийн болон төрийн бус байгууллага, аж ахуй нэгжүүд, харилцагч компаниудаараа жигүүрээ дэлгэж хамтдаа хөгжсөн он жилүүд байлаа. Ирээдүйд бидний хамтын хүч барилгын салбарын хөгжлийг илүү өндөрт нисгэнэ гэдэгт итгэлтэй байна. 

Эрүүл нийгмийг хамтдаа бүтээцгээе!