“Барилгын тухай хуулийн хэрэгжилт, тулгамдсан асуудал" сэдэвт хэлэлцүүлэг /2022.11.29/ болж Барилга, Хот байгуулалтын сайд Б.Мөнхбаатар салбарын төрийн болон төрийн бус байгууллага, аж ахуйн нэгж байгууллагуудын төлөөллүүд, инженерүүд, зураг төсөл зохиогч нартай уулзаж, саналыг нь сонсов. 

"Барилгын тухай хуулийн шинэчилсэн найруулга" 2016 онд батлагдсанаас хойш 11-н удаагийн нэмэлт өөрчлөлт орсон. Энэ удаад хуульд өөрчлөлт оруулах шаардлагуудын тухайд барилгын салбарт төрөөс баримтлах бодлого, төлөвлөгөө шинээр батлагдсан мөн салбарын хөгжлийн урт, дунд хугацааны хөгжлийн стратегийн баримт бичиг өргөн баригдсантай холбоотой мөн Монгол Улсын хөгжлийн гол чиг хандлагыг тодорхойлсон “Алсын хараа -2050” бодлогын баримт бичигтэй тус хуулийг уялдуулах, төрийн үйлчилгээний цахимжилт, ковид цар тахалтай холбоотойгоор шинэ зохицуулалтуудыг хуульд тусгах нөхцөл үүссэн гэдэг дээр талууд санал бодлоо илэрхийлж, хэлэлцүүлэг өрнүүллээ.

Барилгын тухай хуулийг цаг үетэйгээ нийцүүлэн шинэчлэх шаардлага нэгэнт бий болсныг хэлэлцүүлэгт оролцогсод санал нэгтэйгээр хүлээн зөвшөөрсөн бөгөөд хуулийн төслийг боловсруулахаар төрийн бус байгууллагуудын төлөөлөл болон өмнө нь хууль боловсруулж байсан хүмүүсээс бүрдсэн ажлын хэсэг болон зөвлөх багийг удахгүй томилохоор боллоо. 

Ажлын хэсэг байгуулагдсанаар хуулийн хуульд оруулах өөрчлөлтийн саналуудыг нэгтгэн боловсруулж Засгийн газар, УИХ-ын чуулганаар хэлэлцүүлэх юм байна. Иймд хуулийн төсөлд оруулах санал дээр эхний ээлжид салбарын мэргэжлийн Төрийн бус байгууллагууд ажиллах тул инженер мэргэжилтнүүд Монголын Барилгын Инженерүүдийн холбоонд саналаа хүргүүлж болох юм.