Энэхүү музей нь ирээдүйн оюун санаа, үйлчилгээ, бүтээгдэхүүн ба инновацийн хөгжлийг харуулах зорилготой. Өөрөөр хэлбэл технологийн хөгжил, инновацийн дэвшил, ялангуяа роботын технологи болон хиймэл оюун ухааны дэвшил, хэтийн хөгжлийг харуулах, шинжлэх ухааны туршилтуудыг хийх юм.

Арабын нэгдсэн Эмират улсын дэд ерөнхийлөгч бөгөөд Дубай хотын захирагч Мохамед Мактум анх 2015 онд музейг байгуулах шийдвэр гаргаснаа зарласан бөгөөд 2021 онд нээхээр төлөвлөсөн ч 2022 оны 2 сарын 22-нд тэгш тоотой өдрийг бэлгэдэн нээсэн байна. 

Дубай хотын Бизнес дүүрэгт байрлалтай музейн зориулалттай энэхүү барилга нь 7 давхар бөгөөд давхрын нийт талбай 30,000м2, барилгын өндөр нь 78 м аж. Барилга нь дэлхийн хотуудын ирээдүйд тулгарч болох асуудлыг шийдвэрлэхэд гүүр болох, улмаар эрдэмтэн судлаач, инженер, дизайнер, зохион бүтээгч болон санхүүгийн мэргэжилтнүүдийг нэгтгэж шинжлэх ухаанаар асуудлыг шийдвэрлэх юм.

Дубайн ирээдүй сангийн тэргүүн, хотын захирагч Мохамед Мактумын гурван онч үгсийг уламжлалт Араб калиграфаар барилгын экстерьерт гурван хэмжээст байдлаар сийлсэн мэт цонх, байгалийн гэрэлтүүлэг болгон хийсэн байна. 

Онч үгсийг дурдвал: 

1.    Бид олон зуун жил амьдарч чадахгүй ч олон зуун жил орших зүйлийг бүтээж чадна

2.   Ирээдүй бол төсөөлж, загварчилж, бүтээж чаддаг хүмүүсийнх бөгөөд ирээдүй биднийг хүлээхгүй ч өнөөдөр бид ирээдүйг бүтээж чадна. 

3.    Шинэ амьдрал, соёл иргэншлийн хөгжил дэвшил, хүн төрөлхтний үе шатыг нэг үгээр илэрхийлбэл : инновац

Зураг-1. Архитектор Шон Килла 

Төслийн ерөнхий архитектор Кила дизайн фирмийг үндэслэгч Шон Кила бүтээлийнхээ талаар ярилцлагадаа: “Музейн нээлтэн дээр маш олон хүн ирж, хоорондоо гайхан ярилцаж, зураг дарж байсан нь их сэтгэл хөдлөм байсан. Анх төслийн уралдаан зарлахад 20 орчим архитектурын фирм оролцсоноос манайх шалгарсан. Байршлын хувьд дан өндөр барилгууд дунд хотын өндөр зэрэглэлийн бүсэд байсан нь барилгыг өндөр цамхагт хэлбэрээр биш, өвөрмөц дахин давтагдашгүй хэлбэртэй хийх санааг төрүүлсэн. Дэлхийн хамгийн өндөр барилга Бурж Халифаас холгүй, Дубайн алдарт Эмират хос цамхагийн хажууд, метроны шугамтай зэрэгцээ байрлал юм.

Зураг-2. Музей ба Эмират цамхаг

Хамгийн анхны гар таталбартаа би эртний Араб калиграфыг барилгын фасаданд оруулж зурсан ба хэрэгжүүлэхийн тулд захиалагчаас ирээдүйн талаар онч үгс бичиж өгөх боломжтой эсэхийг асуусан юм. Тэгээд хотын захирагч Махомед  наймыг бичиж өгснөөс гуравыг нь сонгосон. Төслийн хамгийн хүндрэлтэй хэсэг нь торус хэлбэрийн /цлиндр хэлбэрийн цагираг/ гадаргуун дээр калиграфыг тэгшхэн байрлуулах байв. Ингэхдээ гадна диогналь төмөр каркасыг үсгэн дээр аль болох тааруулахгүйгээр байрлуулах нь барилгын бүтээцтэйгээ калиграфыг уялдуулах бас нэг хүндрэл байсан. Олон удаагийн оролдлого, комьпютрийн программын тусламжтайгаар энэ сорилтыг давсан юм.    

Зураг-3. Архитекторын анхны санаа

Мөн барилгын хэлбэрээс шалтгаалан дотор инженерийн шугам сүлжээний ажлыг угсрах хүндрэлтэй байв. Барилгын 7 давхар тус бүр 9 м-ийн өндөртэй бөгөөд ирээдүйд технологийн хөгжлийг даган музейн үзмэр ямар хэмжээтэй болохыг мэдэхгүй учир ийм цэлгэр орон зайг төлөвлөсөн.

Зураг-4. огтлол

Барилга байрласан ногоон довцог бүхий давхартай хэсэг  нь газар буюу дэлхийг бэлгэднэ. Барилгын хамгийн гол онцлох концепц нь түүний хэлбэр бөгөөд голын задгай хэсэг нь тодорхойгүй ирээдүйг илэрхийлнэ. Өөрөө хэлбэл эрдэмтэн, зохион бүээгчид тодорхойгүй зүйлийг эрэн хайх явцдаа нээлт хийдэг. Энэ нь музейн үндсэн зориулалтад нийцэж байгаа юм. 

Зураг-5. Шөнийн байдал 

Барилгын бас нэг онцлог нь дотор орон зайд нэг ч баганагүй юм. Хучилтын бүх ачааг гадна диогналь каркас хүлээн авах нь энэ боломжийг бүрдүүлнэ. Музейн үзмэр нь шинжлэх ухаан, технологийн хөгжлийг харуулах боловч музейн барилгын архитектур, интерьер, инженерийн шийдэл нь өөрөө АНЭУ-ын технологийн хөгжлийн харуулна” гэжээ. 

Төсөл эхлэхээс дуусах хүртэл BIM-ийг бүрэн ашигласан байна.

Зураг-6.  Гадна каркасын тооцоо 3D 

Барилга нь саарал усыг эргүүлж бүрэн ашиглах, эрчим хүчний хэмнэлттэй цахилгаан шаттай, нарны тусгалыг барилгад жигд тараах, дотор орон зайд байгалийн ба эрчим хүчний хэмнэлттэй зохиомол гэрэлтүүлгийн тэнцвэрийг хадгалах, агаарын чанарыг шүүгч системтэй зэрэг нь усны ашиглалтынг 45 хувь, эрчим хүчний хэмнэлтийг 25 хувь хүртэл дээшлүүлж улмаар LEED platinum certificate-ийг хүртсэн байна. 

Барилгын эхний 3 давхар нь сансар огторгуй, био-инженерчилэл, эко систем, эрүүл мэндийн орон зайд, дараагийн 3 давхар нь ойрын ирээдүйн технологийн орон зайд, 7-р давхар нь хүүхдэд зориулсан орон зай байна. 

Зураг-7. Интерьер-1

Зураг-8. Интерьер-2

Зураг-9. Интерьер-3

Барилгын гадна бүтээцэд 2400 төмөр хийц ашигласан ба нийт 14 сар угсралтын ажил үргэлжилсэн байна. Мөн 1024 ширхэг өнгөлгөөний галд тэсвэртэй хөнгөн хавтанг угсарчээ.   

Зураг-10.  Угсралтын явц

Зураг-11.  Харагдах байдал

Барилгын ерөнхий мэдээлэл

• Төслийн захиалагч-Дубайн ирээдүй сан

• Архитектурын фирм-Кила дизайн

• Тэргүүн зөвлөх бөгөөд барилгын бүтээц, инженеринг болон барилгын ашиглалтын үеийн инженеренгийн зөвлөх-Буро Хаполд фирм

• Зам гүүр, дэд бүтэц, геотехник, хүмүүсийн хөдөлгөөн ба галын аюулгүй байдал, тусгай гэрэлтүүлэг, акустик болон хог хаягдлын менежмент-Буро Хаполд фирм

• Төслийн менежмент-Матьюс Саудвест фирм

• Ландшафтын архитектур-Кракнел фирм

• Төсвийн зөвлөх-ЭЙКОМ фирм

• Төсөлд ашигласан програм хангамжууд-Revit with Dynamo, Rhino with grasshopper, Tekla structures, structural BIM software developed by Trimble.