Өмнөговь аймгийн Даланзадгад хотод сүндэрлэсэн "Gobi Museum of Nature and History" музейн барилга өнгөрсөн зун нээлтээ хийсэн бөгөөд 2022 оны шилдэг барилгаар шалгараад байгаа билээ. Уг музей нь дэлхийн стандартад нийцсэн засал чимэглэл, тоног төхөөрөмжөөр тоноглогдсон танхимуудтай ба эртний үлэг гүрвэл, хүн төрөлхтний өлгий нутгийн нууцыг агуулсан байна. Музейг “Оюу толгой” компанийн хөрөнгө оруулалттай Говийн Оюу Хөгжлийг Дэмжих Сангийн 10.9 тэрбум төгрөгийн санхүүжилтээр барьжээ. 

Энэ удаагийн “Монгол уран бүтээлч” булангаараа өвөрмөц архитектур, шинэлэг интерьер бүхий уг барилгын талаар танилцуулахаар бэлтгэлээ. Энэхүү музейн барилгын зураг төслийг "BALDAN'S", "ЦНТ", "Ялгуун баян" ХХК- д боловсруулсан байна. Барилга  угсралтыг "Аглут" ХХК гүйцэтгэжээ. 

Уг барилгыг дараах байгаль цаг уурын нөхцөл, барилгын ангилалын зэргүүдэд тооцож гүйцэтгэсэн байна. 

- Гадна агаарын температур   -40°С

- Цасны ачаалал  50кг/м2 

- Салхины ачаалал    35кг/м2

- Эдэлгээний зэрэг  2    

- Галын аюулын  категори   В

- Гал тэсвэрлэлтийн зэрэг    2

- Газар чичирхийлэлтийн зэрэг   9  балл

- Барилгын ангилал   2

Ерөнхий төлөвлөгөө 

Музейн барилгын гол орцыг шинэ нисэхээс хотын төв рүү чиглэсэн авто зам дагуу зүүн тийш харуулан байрлуулав. Барилгын гол орцны хэсэгт шат, тэргэнцэртэй хүний налуу гарц, гол орцны өмнөх талбайд 18 машины ил зогсоол, барилгын урд талд зоорийн давхарт орох авто машины пандус, музейн үзмэрийг ачиж буулгах орц, барилгын баруун  урд талд галын гарц төлөвлөсөн. Барилгад 2.5 тоннын ачааны лифт, 13 хүний багтаамжтай шилэн лифт, галын зориулалттай шат болон пандус төлөвлөгдсөн байна.  

Архитектур орон зайн төлөвлөлт

Барилга нь зоортой 4 давхар мөн техникийн давхартай юм. Барилга нь тэнхлэгээрээ 44.3х33.8метр. Нийт өндөр газраас дээш 21.93 метр аж. 

Зoорийн давхарт: Музейн үзмэрийг ачиж буулгах орц, ачааны 1 лифт, зорчигчийн 1 лифт, салхивч дулааны узелийн өрөө, цахилгааны өрөө, галын шат, нийтийн ариун цэврийн өрөө, хөгжлийн бэрхшээлтэй иргэдэд зориулсан бие засах газар, үзмэр хүлээн авах, үзмэрт шилжүүлэх 2 өрөө, гэрэл зургийн лаборатори, сэргээн засварлах, зураач дизайнерийн өрөө, мужааны өрөө, үйлчилгээний ажилчдын өрөө, сан хөмрөгийн өрөөнүүд байрлана. Үзмэрийн хэсэгт түр үзэсгэлэнгийн танхим, байгалийн үзмэр агуй, говь байгалийн панорамм, үлэг гүрвэлийн диарамм зэрэг байрлажээ. 

1-р давхарт: Гол орц, вестибюль /лобби/ , ресейпшн , харуул,  хувцасны өлгүүр, үзмэр бэлэг дурсгалын дэлгүүр, музейн захиргаа, боловсролын ажилчид, буфет, номын сан,  үзэсгэлэн галерей, үзэсгэлэнгийн танхим, үлэг гүрвэлийн диараммын үргэлжлэл атриум, нийтийн ариун цэврийн өрөө, зорчих пандус, шат, лифт, лифтийн холл, туслах галын шат, галын шатнаас гадагш гарах гарц төлөвлөсөн.

2-р давхарт: Үзэсгэлэнгийн танхимууд тэдгээрийг холбосон гүүр, зорчих пандус, шат, атриум байна.

3-р давхарт:  Үзэсгэлэнгийн танхимууд, атриум, орчих пандус, галын шат, лифт, лифтний өмнөх талбайг төлөвлөв.

4-р давхарт: Лекцийн танхим, зан үйл ёс заншлын танхим, нийтийн ариун цэврийн өрөө, зорчих пандус, галын шат, лифт, лифтний өмнөх талбайг төлөвлөв.

Техникийн давхарт: Ачааны болон шилэн лифтний техникийн өрөө, дээвэрт гарах гарц төлөвлөсөн.

Барилгын үндсэн бүтээц

Барилгын үндсэн бүтээц нь цутгамал төмөр бетон каркас, цутгамал төмөр бетон хавтан суурьтай, зоорийн давхрын хана нь 30 см зузаан төмөр бетон байна. Барилгад 9х8, 11х10, 10.3х8 метрийн алгасалд дам нуруутай цутгамал хучилт, 9х6 метрийн алгасалтай цутгамал төмөр бетон хөшүүн хана /цөм/ төлөвлөжээ. 

4-р давхрын лекцын танхимын үзэгчдийн суудлын хэсэгт шаталсан төмөр бетон хучилт төлөвлөсөн. Хөшүүн ханагүй хэсэгт 10 см-ын зузаантай цутгамал бетон хана байх бөгөөд дотор хамар ханыг 12 см-ын тоосгоор хийжээ. 

Дээврийн шийдэл

Барилгад салхижуулалтгүй хар цаасан олон үет хавтгай дээвэр, керамик хавтан шалтай ашигладаг дээвэр төлөвлөсөн. Дээврийн дотуур ус зайлуулах системийг дуу тусгаарлах давхар үетэй ган хоолойгоор гүйцэтгэсэн байна. 

Гадна заслал 

Барилгын гадна ханыг дээд зэрэглэлийн боржин чулуугаар өнгөлжээ. 

Техник эдийн засгийн үзүүлэлт

Хэрмэн цав

Музейн барилгын хамгийн чухал шаардлага бол гэрэлтүүлэг .Учир нь музейн үзмэр нь өөрөө барилгаасаа илүү үнэ цэнэтэй байдаг тул ихэнх тохиолдолд байгалийн гэрлийн шууд тусгал  болон зориулалтын бус гэрэлтүүлэг нь сөрөг нөлөөтэй байдаг. Иймд интерьерийн шийдлээр хамгийн зохистой гэрэлтүүлэг болон дуу чимээний шийдлийг бий болгохыг зорьсон байна. Үүнээс гадна үзмэр үзэж сонирхох хөдөлгөөний урсгалыг давхардахгүй бас алгасахгүй байхаар нарийн тооцож гаргажээ.

Интерьер 

Уг музейн интерьерийг Скайлайн Дизайн ХХК гаргажээ. Музейг төлөвлөхдөө Архитектурийн үндсэн хийцэд тохируулан норм дүрмийн дагуу орчин үеийн футурустик хэв маягийн интерьерийн шийдлийг тухайн бүс нутгийн байгалийн тогтоц болох хэрмэн цавтай хослуулан шийдэхийг зорьсон. Дотор заслийн шийдлийн үндсэн санаагаа элсний нүүдлийн хээнээс санаа авч үндсэн хайс хаалтны хэлбэрийг гаргасан. Өнгөний сонголтын хувьд минимал, гэгээлэг өнгийг давамгайлан сонгосон бол материалын хувьд сайн чанарын эдэлгээ удаантай, сөрөг нөлөөгүй байгалийн гаралтай материалуудыг шийдэж өгсөн байна.