Шувуу ажиглах, тэдэнтэй ойр байх нь ихэнх хүмүүст тайвшрал, сэтгэл ханамжтай байдлыг бий болгодог зүйлсийн нэг юм. Та шувууны хайрцаг, шувууны байшин барьж өгснөөр зуслангийнхаа хашаанд ч байгалийн амьтдыг авчирч болох юм. 

Иймээс Хараацай, Хөх бух, болжмор зэрэг жижиг шувуудад тохирох үүрэн хайрцгийг хэрхэн хийх талаар зааврыг танд хүргэж байна. 

Дээрх зааврын дагуу үүрэн хайрцаг бэлдэхийн тулд та гарын доорх, зуслангийн байшин, хашаан дотор чинь ч байж болох хямд төсөр цөөн хэдэн зүйлсийг урьдчилан бэлдэх хэрэгтэй болно. 

Ингээд шувууны  үүр хийх зааварчилгаатай танилцана уу.

Юуны түрүүнд та 1,5 см орчим зузаантай банз мод эсвэл хавтан, метр, харандаа, модны хөрөө, хадаас, алх зэргийг бэлтгээрэй. 

1. 2 ХАЖУУГИЙН ХАВТАНГ ЗҮСЭЖ БЭЛДЭНЭ.

Сонгодог шувууны үүр хийхийн тулд хажуугийн хавтангуудын дээд талыг нь налуу болгон хөрөөдөөрэй.

Шувуу үүр хийх модны зузааны хэмжээ нь 1,5 см буюу бүх хэсэгт адил зузаантай хавтан болон бусад төрлийн модыг ашиглана. 15 см өргөнтэй хавтанг нэг тал нь 20 см урт, нөгөө тал нь 25 см урттайгаар хэмжин ташуулдаж хөрөөдөн 2 хуваана.

2. СУУРЬ, ДЭЭВЭР, УРД ТАЛ БОЛОН АРЫН ХЭСГИЙГ БЭЛДЭНЭ.

Суурь, дээвэр, урд тал болон арын хэсэгт орох 4 хэсэг модыг доорх хэмжээсийн дагуу тайрч бэлдэнэ. 

• Суурь хэсэг: өргөн 15 см, урт 20 см

• Дээвэр хэсэг: өргөн 15 см, урт 21 см 

• Урд хэсэг: өргөн 15 см, урт 20 см 

• Арын хэсэг: өргөн 15 см, урт 35 см 

3. УРД ТАЛЫН ХЭСЭГТ 3,2 СМ ДИАМЕТРТЭЙ НҮХ ГАРГАНА

Урд талын хэсгийнхээ  ⅓ орчимд харандаагаар тэмдэг тавина. Модны ухдаг өрөм ашиглан харандаагаар тэмдэглэсэн хэсэгтээ 3,2 см өргөн нүх гаргаснаар шувууд үүрэнд орох боломжтой. Хэдий жижиг нүх мэт санагдаж байгаа ч энэ нь жижиг шувууд үүрэн хайрцагт орох боломжийг олгож, том махчин шувуудыг оруулахгүйгээр тэднийг хамгаална. 

4. СУУРЬ ХЭСЭГТ ТАВАН ЖИЖИГ НҮХ ГАРГАНА

Суурь  хэсгийн дагуу жигд таван цэгт харандаагаар тэмдэглэнэ. Дараа нь үүрэн хайрцагнаас ус, хог хаягдал урсгах мөн агаар нэвтрүүлэхийн тулд энгийн өрөм ашиглан таван нүх гаргана. Эдгээр ус зайлуулах, агааржуулалтын нүхнүүд нь үүрийг илүү цэвэр байлгах тул шувууд удаан хугацаагаар үүрлэх магадлал өндөр байдаг. 

5. ХОЁР ХАЖУУ ТАЛЫГ АРЫН ХЭСЭГТЭЙ НИЙЛҮҮЛЭН ХАДНА

Хоёр хажуугийн тэгш ирмэгүүд нь арын хавтангийн ёроолтой давхцаж, хажуугийн хэсгийн дээд тал нь доошоо налуу байна. Хажуугийн хэсгүүдийг арын хавтангийн хажуу талд бэхлэхийн тулд 2 талаас нь хадна. Арын хавтангийн дээд зай 50мм байна. Арын хавтангийн дээр зай үлдээх нь дээврийн хэсгийг бэхлэхэд ашиглагдана.

6. СУУРИЙГ АРЫН ХЭСЭГТЭЙ ХОЛБОЖ, ХАЖУУ ТАЛТАЙ ТЭНЦҮҮЛНЭ.

Бэлдсэн нүхтэй суурь хавтангаа арын хавтан, 2 хажуугийн хавтангийн ёроол хэсэгтэй тэнцүүлнэ. Шувууд сууж үүрлэх тул суурь хэсэг найдвартай бат бөх байх ёстой. Үүний тулд суурь хэсгийг ар болон 2 хажуу талын хавтантай сайтар бэхлэж хадаасаар хадна.

7. УРД ТАЛЫГ 2 ХАЖУУ ТАЛУУДТАЙ ХОЛБОНО

Урд талын урьдчилан бэлдсэн нүх нь хайрцагны дээд хэсэгтэй ойр байна. Урд талын хавтанг 2 хажуу болон суурь хэсэгтэй холбон байрлуулна. Дараа нь байрлуулан бэлдсэн хавтангуудаа хадаасаар бэхлэж хадна.

8. ДЭЭВЭР БОЛОН АРЫН ХАВТАНГ РЕЗИНЭН НУГАСААР ХОЛБОНО.

15 см өргөн, 12 см урттай резин бэлдэнэ. Бэлдсэн резинэн нугасыг арын хавтангийн дээд талд бэхлэнэ. Дараа нь дээврийн дээд хэсэгт резинэн нугасны ирмэгийг тогтооно. Дээврийг хадаасаар биш шүрүүпээр бэхлэх нь цаг хугацааны явцад хайрцгийг буцаан задлаж цэвэрлэж, арчилахад хялбар байх болно.

9. ҮҮРЭН ХАЙРЦГИЙГ БУДАЖ ЧИМЭГЛЭХ

Та шувууны үүрээ будаж чимэглэхийг хүсвэл усан суурьтай хоргүй будаг, багс бэлдэнэ. Өөрийн хүссэнээр будаж чимэглэснээр таны зуслангийн хашаанд өнгө нэмж, таатай байх болно. Гадаа өлгөхөөс өмнө хайрцгийг сайтар бүрэн хатаана.

10.   АРЫН ХАВТАН ДЭЭР ӨЛГӨХ НҮХИЙГ БЭЛДЭНЭ.

Арын хавтангийн дээд хэсэгт 0,64 см өрмийн хошуу ашиглан нүх гарган өрөмдөнө. Энэ нь дараа нь хаана ч байрлал солин өлгөхөд хялбар болгоно.

11. ҮҮРЭН ХАЙРЦГИЙГ ГАЗРААС 2-5 МЕТР ӨНДӨРТ БАЙРЛУУЛНА

Шувууныхаа үүрийг байрлуулахдаа нарны шууд тусгалгүй мод эсвэл шонг сонгоно. Гар өрөм ашиглан сонгосон газраа бэхлэж тогтооно. Шувууд амархан орж гарахын тулд бат бөх эсэхийг шалгаж үзээрэй. Шувууны хайрцгийг өндөрт байрлуулснаар шувууг газрын махчин амьтдаас хамгаалах болно. Та шувуунд үүрлэх бусад материал бэлдэх шаардлагагүй учир нь шувууд өөрсдөө үүрлэх үүрээ засдаг билээ.

12.  2-Р САРААС 3-Р САРЫН ХООРОНД ҮҮРЭН ХАЙРЦАГАА БАЙРЛУУЛНА

Үржилийн улиралд хайрцгийг байрлуулах нь тохиромжтой. Шувууд таны бүтээн байгуулсан хайрцгийг олоход хэдэн жил шаардагдах тул байрлуулсан дариуд шувууд үүрлэхгүй байвал сэтгэлээр унах хэрэггүй. 

13. 10,11-Р САРУУДАД ШУВУУНЫ ҮҮРЭЭ ЦЭВЭРЛЭНЭ

Үржлийн улирал бүрийн дараа хайрцгаа бэхэлгээнээс нь буулгаж доторх хог хаягдлыг хаяж, буцлам халуун усаар дотор талыг нь цэвэрлэж, ариутгаад өлгөхөөс өмнө агаарт хатаана. Шувууны үүрэн хайрцгийг цэвэрлэхдээ хэзээ ч химийн бодис агуулсан цэвэрлэгээний бүтээгдэхүүн ашиглаж болохгүй. Энэ нь шувуунд хор хөнөөл учруулж болзошгүй. Хэрэв та хайрцгийг нээхэд өндөг байвал тэдгээрийг хайрцганд нь үлдээгээрэй. 

Ингээд шувууны үүр хийх таны бяцхан ажилд амжилт хүсье.   

БЭЛТГЭСЭН: С.Оргилцэцэг