Хаягийн нэгдсэн системийг хэрэглээнд нэвтрүүлнэ
Барилга, хот байгуулалтын сайд Б.Мөнхбаатар, Цахим хөгжил, харилцаа холбооны сайд Н.Учрал нар хаягжилтийн асуудлаар хамтарсан ажлын хэсэг байгуулж хамтран ажиллахаар болсны дагуу /2022.10.27/ төрийн байгууллагууд, хувийн хэвшлийнхнийг оролцуулсан уулзалтыг зохион байгууллаа. Уулзалтад БХБЯ, ЦХХХЯ, ХЗДХЯ, НЗДТГ, УБЕГ, Нийслэлийн газар зохион байгуулалтын алба, Нийслэлийн Хот байгуулалт, хөгжлийн газар, Харилцаа холбооны зохицуулах хороо, Шуурхай удирдлагын төв /101,102,103/, "И-Монгол академи" УТҮГ, Үндэсний дата төв, "Монгол шуудан" ХК, "Монголын цахилгаан холбоо" ХК, "Монголын банкуудын холбоо" ТББ, "Ubcab", "Songo", "Google" төсөл, "ICT" group, "Номадик жеограп" ХХК-ийн төлөөллүүд оролцлоо.
Уулзалтаар Газар болон үл хөдлөх хөрөнгийн хаягжуулалт, түүний цахим системийг хэрэглээнд нэвтрүүлэхэд тулгамдаж буй асуудал, төрийн байгууллагуудын мэдээллийг нэгтгэж солилцох үйл явцыг түргэн шуурхай гүйцэтгэх, төрийн байгууллагуудын мэдээллийн давхцалыг арилгах асуудлуудыг авч хэлэлцлээ.
Хаягийн нэгдсэн систем хэрэглээнд нэвтэрвэл төрийн үйлчилгээг нэгдсэн бодлого, хүртээмжтэй, шуурхай хүргэх нөхцөл бүрдэхээс гадна улсын хэмжээнд хаягжуулалтын ажил нэгдсэн зохион байгуулалттай эмх цэгцтэй болж, төрийн болон бизнесийн үйлчилгээнд учирч байсан хүндрэлүүд шийдэгдэх юм.
Өнөөгийн байдлаар Газар зохион байгуулалт, геодези, зураг зүйн газраас Хаягийн мэдээллийн санд нийт 1,081186 нэгж талбар, 689895 барилга байгууламж, 49826 гудамжны өгөгдлийг оруулаад байна. Мөн хот суурин газрын 650489 нэгж талбар, 283995 барилгыг хаягжуулж, малчдын өвөлжөө, хаваржаа, газар тариалангийн зориулалтаар ашиглаж байгаа нийт 206511 нэгж талбарт газар усны нэрийн дагуу шинээр хаяг олгоод байгаа юм. Энэхүү хаягийн нэгдсэн системийг хэрэглээнд нэвтрүүлж, ашиглах чиглэлд бүхий л талуудын оролцоог хангасан ажлын хэсэг байгуулж, хамтын ажиллагааг эрчимжүүлэхээр тогтлоо.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.