Хаягжуулалтын тухай хуулийн шинэчилсэн найруулгын төслийн ажлын хэсэг хуралдлаа
Барилга, хот байгуулалтын сайдын 2022 оны 141 дүгээр тушаалаар байгуулагдсан “Хаягжуулалтын тухай хуулийн шинэчилсэн найруулгын төсөл, үзэл баримтлалын төслийг боловсруулах, холбогдох судалгаа, үнэлгээг хийх үүрэг бүхий ажлын хэсэг”-ийн хурлыг 2022 оны 10 дугаар сарын 20-ны өдөр зохион байгуулав.
Тус хуралдаанаар улсын хэмжээнд байгуулсан хаягийн мэдээллийн нэгдсэн системийн хэрэглээ, ач холбогдол, үр дүнгийн талаар болон хаягжуулалтын тухай хуулийн шинэчилсэн найруулгын төслийн үзэл баримтлалыг хэлэлцлээ. Мөн хаягийн мэдээллийн нэгдсэн системийг хэрэглээнд бүрэн нэвтрүүлэхэд тулгамдаж буй асуудал, цаашид шийдвэрлэх асуудал болон хууль, эрх зүйн хүрээнд өөрчлөлт оруулах хэрэгцээ, шаардлагын талаар хэлэлцэв.
Энэхүү ажлын хэсгийн ахлагчаар Барилга, хот байгуулалтын яамны Төрийн нарийн бичгийн дарга С.Магнайсүрэн, дэд ахлагчаар Газар зохион байгуулалт, геодези, зураг зүйн газрын дарга А.Энхманлай нар ажиллаж байна.
Тус ажлын хэсэг нь Барилга, хот байгуулалтын яам, Хууль зүй, дотоод хэргийн яам, Байгаль орчин, аялал жуулчлалын яам, Зам тээврийн хөгжлийн яам, Цахим хөгжил, харилцаа холбооны яам, Харилцаа холбооны зохицуулах хороо, Улсын бүртгэлийн ерөнхий газар, Татварын ерөнхий газар, Мэргэжлийн хяналтын ерөнхий газар, Стандарт хэмжил зүйн газар, Цагдаагийн ерөнхий газар, Нийслэлийн газар зохион байгуулалтын алба, Нийслэлийн хот байгуулалт, хөгжлийн газар зэрэг төрийн байгууллагууд болон МУИС, ШУТИС, Монголын кадастрын холбоо, Газар зохион байгуулагчдын холбоо, Геодези, фотограмметр, зураг зүйн холбооны төлөөллүүдээс бүрдэж байна.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.