Дани улсын Рандерс хотын эмнэлгээс гарсан хуванцар хаягдлуудыг KOMPAN үйлдвэр дахин боловсруулж, цоо шинэ тоглоомын талбай болгон тус эмнэлгийн гадна талбайг тохижуулжээ. Рандерс хотод орших уг тоглоомын талбай энгийн нэгэн тоглоомын талбай мэт харагдах боловч давхар утга агуулсан юм. Хэрэв та дахин боловсруулах логоны хажууд байрлах НҮБ-ын тогтвортой хөгжлийн зорилтыг илэрхийлэх 17 өөр өнгө бүхий логог анзаарвал, та “Circular playground” буюу “Тойргон хүүхдийн тоглоомын талбай” гэдэг нэр нь ямар утга илэрхийлж байгаа болохыг тааж магадгүй.

“Уг тоглоомын талбайд ашигласан загварууд нь KOMPAN үйлдвэрийн олон жилийн турш үйлдвэрлэсээр ирсэн загваруудтай ижил бөгөөд энэхүү тоглоомын талбайг онцгой болгож байгаа зүйл нь тоглоомын эд ангиудыг дахин боловсруулсан материалаар үйлдвэрлэсэнд оршино” гэж KOMPAN үйлдвэрийн Тогтвортой хөгжлийн төсөл хариуцсан захирал хатагтай Дорте Торуп Керрул хэлжээ.

Тоглоомын талбайг НҮБ-ын тогтвортой хөгжлийн зорилтуудаас санаачлан хамтын ажиллагааны хүрээнд байгуулсан. Уг төсөл нь төрийн болон хувийн хэвшил хэрхэн хамтран ажиллаж, хаягдал материалыг дахин ашиглах замаар нүүрстөрөгчийн давхар ислийг бууруулж болохыг харуулж байна.

Уг төслийг хэрэгжүүлэхэд олон байгууллагууд хамтран ажилласан ба үүнд хүүхдийн тоглоомын талбайн KOMPAN үйлдвэр, Юутланд мужийн Рандерс хотын захиргаа, Рандерс хотын эмнэлэг, хуванцар дахин боловсруулах Dansk Affaldsminimering ApS үйлдвэр, эдийн засгийн стратегийн Compas төв багтана. Рандерс хотын эмнэлэгээс гадна бүс нутгийн хэд хэдэн эмнэлгүүд нийлж 300 кг хуванцар хог хаягдал бүрдүүлсэн ба нэмэлтээр далайн хаягдал, хүнсний сав баглаа боодлын хаягдал, нэхмэлийн хаягдал, тэр ч байтугай хуучин гутал зэргийг цуглуулан үйлдвэрлэлд ашигласан байна. Энэ нь энгийн хуванцраар хийгдсэн тоглоомын талбайтай харьцуулахад нүүрстөрөгчийн давхар ислийн хийг 54 хувиар бага ялгаруулан үйлдвэрлэгдсэн. Мөн уг дахин боловсруулсан материалаар хийгдсэн тоглоомуудыг эргүүлэн дахин боловсруулж ашиглах боломжтой юм.

YouTube дээрх Рандерс дахь байгальд ээлтэй тоглоомын талбай (Sustainable Playground in Randers) гэх бичлэг дээр – хатагтай Дорте Торуп Керрул дахин боловсруулсан материалаар хийсэн болон уламжлалт аргаар үйлдвэрлэсэн тоглоомнууд дээр тогшиж, хоорондох дуу чимээний ялгааг харуулан “Энэ бол ирээдүйн дуу чимээ юм” гэж тодотгоно. Ирээдүй бол ашигласан материалыг хаяхын оронд шинэ зүйлд дахин ашиглах явдал юм. “Circular playground” буюу “Тойргон хүүхдийн тоглоомын талбайн” санаа нь анх эмнэлэгийн нэгэн ажилтны “яагаад бид гэртээ хогоо ангилдаг мөртлөө, ажил дээрээ тэгдэггүй юм бол” гэсэн бодлоос эхэлсэн. Бид хог хаягдлыг дахин ашиглах замаар эрүүл орчинг бий болгохыг хичээж байна гэж тэрээр бичлэг дээр хэлэв. Эмнэлэгийн хог хаягдал эмнэлэгийн цэцэрлэгт хүрээлэнгийн үзэсгэлэнт тоглоомын талбай болон эргэж ирсэн нь түүний санаа зөв байсныг илэрхийлнэ.

Рандерс хотын эмнэлэгийн гаднах тоглоомын талбай нь эмнэлэгт ирсэн хүүхдүүд болон тэдний асран хамгаалагчдын цагийг эрүүл орчинд баяр хөөрөөр дүүрэн өнгөрөөж болох газар болсон. “Миний хувьд энэ тоглоомын талбай бол шинэ эриний эхлэл. Шинэ цагийн дохио. Бид өөрөөр сэтгэж эхлэх ёстой" гэж эдийн засгийн стратегийн Compas төвийн хамтран үүсгэн байгуулагч хатагтай Энн Поулсен эцэст нь хэлсэн байна. 

ТӨСЛИЙН ДЭЛГЭРЭНГҮЙ

Төслийн нэр: Тойргон тоглоомын талбай

Байршил: Дани улс, Рандерс хот

Түншүүд: KOMPAN, Рандерс хотын захиргаа, Төв Юутландын бүс нутаг, Dansk Affalds minimering ApS, Compas төв

Багийн бусад гишүүд: Рандерсийн бүсийн эмнэлэг, Орхусын их сургуулийн эмнэлэг, Хорсенсийн бүсийн эмнэлэг

Архитектор: Лександер Сундбе