Шинэ орон сууц, барилгын материалын үнэ ханшийн судалгааг сар бүр, ажил гүйцэтгэлийн үнэлгээг улирал тутамд шинэчлэж, барилгын салбартай холбоотой мэдээ мэдээлэл, мэргэжилтнүүдийн  нийтлэлийг бэлтгэн хүргэдэг Барилга МН сэтгүүлийн 10 дугаар сарын дугаар хэвлэгдэн гарлаа. 

Энэ дугаарын нүүр хуудсанд “Тоонот хаалга констракшн” ХХК хамтран ажилласан бөгөөд тус компани нь бүх төрлийн цонх, тавилга, шилэн хийц, хаалга, автомат хаалга, хаалт, авто зогсоолын автомат хаалга, шилэн хаалга, фасад хаалтууд хийж байна. 

Энэ дугаарт гарсан онцлох булангуудаас танилцуулбал…

VIP ярилцлага: Инженерүүд бол улс эх орныг хөгжүүлэх нэгэн түлхүүр гэдэг. Инженерүүдийн гайхамшигт оюун ухаан, ур чадвар, бүтээн байгуулалтын үр дүнд өнөөгийн бидний амьдрах орчин бүтээгдсэн билээ. Ийм бахархам үйлсийг Монголдоо бүтээлцэж буй нэгэн эрхэм бол “Монкон групп” ХХК- ийн Ерөнхий захирал Ч.Дарханбаатар юм. 

Тэрээр Туркийн Докуз эелуль их сургуулийг 2006 онд төгссөн бөгөөд үүнээс хойш төр болон хувийн хэвшилд ажиллаж, улмаар хувийн компаниа байгуулан томоохон төслүүдийг хэрэгжүүлж, дотоодын төдийгүй гадны зах зээл дээр амжилттай ажиллаж байна. 

Тодруулга: Барилгын гол материал болох цементийг эх орондоо үйлдвэрлэж буй 5 томоохон үйлдвэр байдаг. Үүний хоёр үйлдвэрт засварын ажил хийгдэж,  үлдсэн гурав нь зах зээлийн эрэлтийг хангаж чадахгүйд хүрэн, улмаар цемент хомосдож үнийн хөөрөгдөл үүсэн тонн цемент 500-600 мянган төгрөг болоод байна. Үүнтэй холбоотойгоор Засгийн газрын зүгээс импортын цементийн гаалийн 20 хувийн татварыг энэ он дуустал чөлөөлсөн байдлаар зохицуулалт хийж байна. Учир нь улсын хэмжээнд хэрэгжиж буй томоохон төслүүд тэр дундаа Дарханы замын ажил зогсонги байдалд орохоос урьдчилан сэргийлэх үүднээс энэхүү арга хэмжээг авч байна гэсэн тайлбарыг өгсөн юм. 

Үүнээс гадна улсын болон хувийн хэвшлийн төслүүд цементгүйн улмаас зогсоход хүрч, цаашлаад захиалга өгсөн орон сууцны хугацаа 1-2 жилээр хойшлогдож буй асуудлууд гарч байгааг иргэдийн зүгээс илэрхийлж байгаа юм. Энэ талаар холбогдох мэргэжилтнүүдээс тодруулга аван бэлтгэлээ. 

Монгол уран бүтээлч: Өмнөговь аймгийн Даланзадгад хотод сүндэрлэсэн "Gobi Museum of Nature and History" музейн барилга өнгөрсөн зун нээлтээ хийсэн бөгөөд 2022 оны шилдэг барилгаар шалгараад байгаа билээ. Уг музей нь дэлхийн стандартад нийцсэн засал чимэглэл, тоног төхөөрөмжөөр тоноглогдсон танхимуудтай ба эртний үлэг гүрвэл, хүн төрөлхтний өлгий нутгийн нууцыг агуулсан байна. Музейг “Оюу толгой” компанийн хөрөнгө оруулалттай Говийн Оюу Хөгжлийг Дэмжих Сангийн 10.9 тэрбум төгрөгийн санхүүжилтээр барьжээ. 

Энэ удаагийн “Монгол уран бүтээлч” булангаараа өвөрмөц архитектур, шинэлэг интерьер бүхий уг барилгын талаар танилцуулахаар бэлтгэлээ. Энэхүү музейн барилгын зураг төслийг "BALDAN'S", "ЦНТ", "Ялгуун баян" ХХК- нд боловсруулсан байна.   

Хууль, эрхзүй: Түлхүүр гардуулах нөхцөлтэй ЕРС гэрээ байгуулах тохиолдолд талуудын тендерийн шатанд анхаарах зүйл, цаашид учирч болзошгүй зарим эрсдэлээс тендерийн шатанд урьдчилан сэргийлэх боломж, нөхцөлийн тухай энэхүү нийтлэлд өгүүлэх болно. 

Та чадна: Шувуу ажиглах, тэдэнтэй ойр байх нь ихэнх хүмүүст тайвшрал, сэтгэл ханамжтай байдлыг бий болгодог зүйлсийн нэг юм. Та шувууны хайрцаг, шувууны байшин барьж өгснөөр зуслангийнхаа хашаанд ч байгалийн амьтдыг авчирч болох юм. 

Иймээс Хараацай, Хөх бух, болжмор зэрэг жижиг шувуудад тохирох үүрэн хайрцгийг хэрхэн хийх талаар зааврыг танд хүргэж байна. 

Сэтгүүл захиалах бол энд дарна уу

Цахимаар унших бол энд дарна уу

Утас: 9100-0233, 7711-3333 /2/

Та өөрт ойрхон байршлаас сэтгүүлээ худалдан авах боломжтой бөгөөд Барилга МН сэтгүүл нь дараах цэгүүдэд худалдаалагдаж байна.