Дэнжийн 1000-ын Hybrid Town төсөл дээр ХБНГУ-ын Эдийн засгийн хамтын ажиллагаа, хөгжлийн яамны Парламент дахь Төрийн нарийн бичгийн дарга Нийлс Аннен, ХБНГУ-аас Монгол Улсад суугаа Элчин сайд Ёорн Розенберг болон Германы Олон улсын хамтын ажиллагааны нийгэмлэг (GIZ), Германы Сэргээн босголт, зээлийн банкны (KfW) зочид төлөөлөгчид хүрэлцэн ирж цаашид маш олон байшин гэр хороолол барихад дэмжин ажиллахаа илэрхийлжээ. 

Барилгын салбарт инновац нэвтрүүлж буй тус төслийн хамт олон 100 гаруй эко барилгыг ашиглалтад оруулсан бөгөөд энэ хугацаанд технологио сайжруулж 100 хувь нарны илчээр дулаанаа шийдсэн амины орон сууцуудыг барьж эхэлжээ.  Эрс тэс уур амьсгал, хотын алдаатай төлөвлөлтийн улмаас үүссэн нийслэлийн утааны асуудлыг цэгцлэхэд олон улсын стандартад нийцсэн эко барилгын төсөл, санаачилгууд зөв шийдэл байх болно гэдгийг салбарынхан илэрхийлж байгаа юм.