Барилгын салбарт олон залуучууд манлайлж, орчин цагийн дэвшил, олон улсын хөгжилтэй хөл нийлүүлэн алхаж байна. Тэдгээр чадварлаг бизнесмэнүүдийн нэг  "UB group" - ийн ерөнхий захирал Ц.Батбаатарыг энэ удаагийн VIP ярилцлагаараа онцоллоо. 

Бага байхаасаа бизнесийн ухаанд суралцаж, 8 дугаар ангиа төгсөөд анхны компаниа байгуулж байсан тэрээр одоо 300 гаруй ажилтанг удирдан ажиллаж байна. Нийгмийн хариуцлагын хүрээнд олон сайн үйлсийг хийсэн төдийгүй барилгын салбарт ногоон ирээдүйг бий болгохын төлөө зүтгэж, түүнийгээ ч бодит ажил болгон явж буй.

Ажлын гараагаа хэрхэн эхэлж байсан бэ? 

Би 8 дугаар ангиа төгсөөд биеэ даан ажиллаж эхлэх хүртлээ аав, ээжийнхээ ажилд тусалж, бизнесийн арга ухаанаас нь суралцаж өссөн юм. 8 нэрийн хүнсний дэлгүүр ажиллуулах, орон нутгуудаар наймаа хийх гээд юм юм л хийж үзсэн дээ. Бизнесийн салбарт эргэлт буцалтгүй орохыг хүссэн учраас гэрийнхнийхээ зөвлөснөөр Хятад хэлний орчуулагчаар сурангаа Санхүү эдийн засгийн дээд сургуулийн Бизнесийн удирдлагын ангид давхар сурч дипломоо зэрэг авч байлаа. 

Албан ёсоор 2006 онд компаниа байгуулж, тухайн үед цөөн байсан орчуулгын товчоо нээж ажиллуулсан. Цаашлаад тээвэр логистикийн чиглэлээр ажиллаж, Хятадын гүн рүү 300 км тээвэр хийдэг Монголын анхны компани болж байлаа. Хятад руу нэвтрэх нь Хятадын зам тээврийн газрын шийддэг асуудал учраас миний хувьд маш том шинэ сорилт болж байсан юм.

Барилгын салбарын хувьд би мөрөөдлөө биелүүлээд явж байгаа гэж хэлж болно. Бага байхаасаа л барилгын инженер болохыг хүсдэг байлаа. Энэ салбарт хийж бүтээх ажил маш их байгаа. Тухайлбал, Улаанбаатар хотод 230 мянга гаруй яндантай гэр хороолол байна. Энэ нь нийгмийн том асуудлуудын нэг мэдээж мөн. Тиймээс үүнд өөрийн хувь нэмрийг оруулах замыг сонгосон. 

Таны эхлүүлсэн бизнес одоо 300 гаруй ажилтантай болтлоо өргөжсөн байна?  

Анх 2006 онд нягтлан, менежер хоёр ажилд аваад гурвуулаа эхэлж байлаа. Бид гурав одоо 300 болон өргөжсөн байна. Манай ажилтнуудын 200 орчим нь барилгын чиглэлээр, 100 гаруй нь тээвэр логистик, худалдаа гэх мэт бусад салбарт ажиллаж байна.

Бид хөгжиж л яваа дундаж компани. Бидэнд хийх зүйл маш их байна. Цаашид Developer буюу Хөгжүүлэгч компани болохыг зорьж ажиллаж байгаа. Өөрөөр хэлбэл, төсөл хөгжүүлэлт, судалгаа концепц, инженеринг, дэд бүтцийн хангамж, логистик гэсэн эдгээр ажлуудыг цогцоор нь хийх болно. 

15 гаруй жилийн хөдөлмөрийн үр дүнд өнөөдрийн өндөрлөгт хүрсэн байна. Энэ хугацаанд шантрах, хэцүү цаг үе байв уу? 

Бизнес миний өдөр тутмын амьдралын хэмнэлд заавал байх ёстой зүйл шиг санагддаг юм. Маш сонирхолтой, дараа дараагийн шат ахих тусам намайг сорьж, улам хурцалж байдаг. Тиймээс шантрах, болих тухай бодож байгаагүй. 

Ер нь хүний амьдрал гэдэг яг л хувьцаа шиг. Өсвөл унадаг, унавал ахиад өсдөг. Энэ бол амьдралын бичигдээгүй хууль учраас уналтанд орсон ч эрч хүч аваад дараагийн үе дээрээ илүү сайн байхыг л боддог. 

Та өөрийн энэ хандлагаараа ажилтнуудаа хэрхэн идэвхжүүлдэг вэ? 

Миний бизнесийн зарчим тун энгийн. Өмнөхөө хий, үр дүн гарга, ядрахгүйгээр хөгжилтэй ажилла. Хийж буй ажилдаа дурласан хүн илүү хөнгөн, аз жаргалтай ажилладаг санагддаг.   Хүн бүр л сайн сайхан зүйлсийг мэдэрч амьдрахыг хүсдэг шүү дээ. Тиймээс ажил дээрээ ч, гэртээ ч аз жаргалтай байвал амьдрал ямар амттай, сайхан байх вэ. Бүх ажилтнууд маань ийм мэдрэмж, сэтгэл ханамжтай байгаасай гэж хүсдэг. 

Манай ажилтнуудын ихэнх нь залуучууд. Зөв хандлагатай, байгууллагынхаа ирээдүй, хэтийн зорилгыг нэгэн зүгт хамтдаа харж чаддаг хүмүүс гэж боддог. Тийм ч учраас ямар ч асуудал үүссэн түүнийг баг хамт олноороо давж гарч чаддаг.  

Татвар нь бизнес эрхлэгчдэд багагүй дарамтыг бий болгодог гэдэг. Татварын системийн тал дээр ямар бодолтой байдаг вэ? 

Татвар дээр улс орон оршин тогтнодог. Тиймээс бид татвар төлөх ёстой. Харин бидний төлсөн татварыг зөв менежмент хийж чадаж байна уу гэдэг хамгийн гол асуудал. 

Олон улсад иргэний төлсөн татвар нь хуримтлагдан тэтгэвэрт гарах үед нь тэтгэврийн сангаас олгогддог. Тэрхүү санд хуримтлагдсан мөнгөөр сайн төслүүдэд хөрөнгө оруулалт хийж, зөв эргэлдүүлэн, хөрөнгө оруулалтын системийг бий болгодог. Манай улс ч ийм жишиг рүү шилжих ёстой гэж боддог. Татвар нь эргээд улс орны эдийн засагтаа үр ашгаа өгдөг байх ёстой.

Инфляцийн өсөлт, хил гаалийн асуудлаас болоод барилгын салбарын өнөөгийн нөхцөл байдал хүндхэн байна. Энэ байдлаас гарах шийдлийг та хэрхэн харж байна вэ?  

Нэг цонхны бодлого баримтлах ёстой гэж боддог. Бид нэг л тогооноос хооллож байгаа учраас тус тусын амбиц хөөлгүйгээр нэгдэж, дуу хоолойгоо хүргэж, хамтарч ажиллавал илүү хөгжинө, асуудлаа шийдэж чадна гэж боддог. Зөвхөн ярих бус бодитоор эхлүүлэх зорилгоор барилгын компаниудаа нэгтгэх, хамтдаа гарц гаргалгааг гаргах, үнийн хөөрөгдөл үүсгэдэг ченжийн системгүй болгохын тулд iDepot гээд барилгын материалын бөөний “супермаркет” нээхээр төлөвлөж байна. Өөрөөр хэлбэл, гадаадаас болон дотоодоос барилгын материал худалдан авахдаа ганцаараа бус олон компаниуд нэгдвэл нэгж бүтээгдэхүүний зардлыг бууруулах бүрэн боломжтой юм.  

Манайхан хоорондоо нэгдэж чаддаггүйгээс гадна нэг компани бүх зүйлээ өөрсдөө хийдэг нь гол алдаа болдог. Хөрөнгө оруулалтаа хийнэ, өөрөө гүйцэтгэнэ, өөрөө борлуулна гэх мэт. Ингэснээр маш их цаг хугацааг алддаг. Хэрвээ хамгийн сайн чаддаг нэг ажлаараа дагнан хөгжүүлбэл, чаддаг зүйлээ чаддаг компани нь хийж, бие биедээ итгэж хамтарч ажиллавал хэн хэндээ ашигтайгаагаас гадна манай салбарын зах зээл богино хугацаанд өргөжин тэлж, хурдацтайгаар хөгжинө гэдэгт итгэлтэй байдаг.

Энэ хамтралыг бий болгохын тулд Монголын Барилгын Үндэсний Ассациоци, мэргэжлийн холбоодууд гэх мэт компаниудыг чиглэлээр нь нэгтгэсэн байгууллагууд нь манлайлаад ажиллах хэрэгтэй гэж боддог юм.

Манайхан ашигтай гэсэн сургаар нэг зүйлрүү олуулаа хошуурдаг. Энгийнээр хэлэхэд, нэг барилгад 5 ижил кофе шоп байвал тавуулаа дампуурна шүү дээ.

2018 оноос гадаад харилцаагаа өргөжүүлэн ажилласан байна. Гадны хөрөнгө оруулалт авахад ямар хүндрэлтэй асуудлууд тулгарч байна вэ? 

Манай группын хувьд Япон, Хятад, Солонгос, Герман, Турк улсуудтай харилцаатай ажиллаж байна. Гаднаас хөрөнгө оруулалт авахад гол асуудал бол улсын үнэлгээ байдаг. Манай улс олон улсын санхүүгийн байгууллагад аль зэрэглэлд байгаа, санхүүгийн чадавх хэр вэ гэдэг нь бидний хөрөнгө оруулалт авах гол үзүүлэлт болдог. Жишээлбэл, улс их хэмжээний өртэй бол томоохон хөрөнгө оруулалтууд татгалзаж, засгийн газрын баталгаа нэхдэг. Томоохон сангуудаас тавигддаг шаардлага нь 30%-ийг өөрсдийн дансандаа байршуулан, засгийн газрын баталгаагаа авчрахыг хүсдэг. Гэтэл бид тэр баталгаа авч чаддаггүй нь бага хүүтэй хөрөнгө оруулалтыг авах боломжгүйд хүргэдэг. 

Тавигдах шаардлага багатай хөрөнгө оруулагчид бий боловч хүү нь тун өндөр байна. Доллараар 7-8%-ийн хүү гэдэг төгрөгөөр шилжихээрээ 20% болдог нь бидний хувьд хүндрэлтэй. Үүнээс гадна итгэлцэл гэдэг маш чухал. Гадны компаниуд хөрөнгө оруулалтынхаа өгөөжийг найдвартай байлгахыг хүсдэг боловч Монголын компанид хулхидуулсан тухай мэдээлэл, муу түүхүүд олон байгаа нь маш том саад болдог. Тэд маш хашир болсон байна.  

Манай дотоодын нийт бүтээгдэхүүн 10 гаруй тэрбум доллар, үүнийг 2-3 дахин өсгөх боломж нь гадны хөрөнгө оруулалт юм. Тиймээс ёс зүй, итгэлцлийг бий болгох тал дээр манай компаниуд анхаарч ажиллах ёстой болоод байна.  

Банкны систем нь гадны хөрөнгө оруулалт авахад саад болоод байдаг гэж сонсож байсан?  

Монгол Улс нь Ази, Европыг холбосон онцгой байршилтай, хоёр том гүрний дунд оршдог. Үүгээрээ давуу талтай, мөн сул тал ч бий. Бидний давуу тал бол холбох юм. Тиймээс Дубай шиг, Казакстан шиг олон улсын санхүүгийн чөлөөт бүс, хөрөнгө оруулалтын чөлөөт бүсийг бий болговол гадны хөрөнгө оруулалт саадгүй орж ирэх нөхцөл бүрдэнэ.  

Энэхүү чөлөөт бүс нь олон улсын арбитрийн хуулиар зохицуулагддаг учраас итгэлцлийг бий болгоно. Гадны том банкууд, хуулийн фирмүүд, санхүүгийн томоохон зөвлөх компаниуд, түүнийг дагаад олон боломжууд бий болж Монгол улсын эдийн засаг тэлэх боломжтой. 

Хөрөнгө оруулалт хийхэд хэзээ ч үнэ цэнээ алддаггүй гурван зүйлийн нэг нь үл хөдлөх хөрөнгө гэдэг. Тэгэхээр хөрөнгө оруулалт хийхийн ач тус юу вэ? 

Таны хадгаламжинд 100 сая төгрөг байлаа гэж бодоход одоогийн өссөн байгаа инфляцийн 20 хувьд идүүлээд жилийн дараа гэхэд 80 сая болно. Тиймээс үүний эсрэг хамгийн сайн хөрөнгө оруулалт бол үл хөдлөх хөрөнгө юм. Харилцах дансны хадгамжинд 20 гаруй их наяд төгрөг байна. Үүний 5 гаруй их наяд нь үл хөдлөхөд хөрөнгө оруулалт хийх боломжтой гэж харж байгаа. 

Удахгүй Үл хөдлөх хөрөнгийн салбарт хөрөнгө оруулах боломжуудыг танилцуулах маш ач холбогдолтой үйл ажиллагаа болох гэж байгаа. Энэ үйл ажиллагаанд манай групп иргэдийн хэрэгцээ, хүсэл дээр тулгуурлаж 10 төрлийн судалгаа хийсний үр дүнд концепц, зураг төслийг нь гаргасан 6 төслөөр оролцож байгаа. Хөрөнгө оруулагчид ирж танилцах хэрэгтэй гэж бодож байна.

Нийгмийн хариуцлагын хүрээнд маш олон сайхан ажлуудыг хийжээ. Нийгмийн хариуцлагыг та юу гэж ойлгодог вэ? 

Тогтвортой хөгжлийн хүрээнд үйл ажиллагаа явуулах, өндөр үнэтэй ч гэсэн эх дэлхийнхээ төлөө ногоон материалыг сонгож, барилгын хог хаягдал бага гаргах нь бидний нийгмийн хариуцлага юм.

Хүн төрөх нь үнэн, үхэх нь үнэн гэдэг дээ. Тиймээс амьдралын утга учрыг мэдэрч, бусадтай хуваалцаж, үнэ цэнийг бий болгох нь миний хувьд их чухал санагддаг. Хийж байгаа зүйлээрээ бусдад үлгэр дуурайлал болж сайн сайхан зүйлийг түгээхийг хүсдэг. Нийгмийн хариуцлага гэдэг хувь хүний ухамсартай ихээхэн холбоотой болов уу.  

Спортын олон тэмцээнүүдийг ивээн тэтгэсэн байна. Та өөрөө тамирчин уу? 

Спортод маш сонирхолтой. Би фитнессээр олон жил хичээллэж, тэмцээн уралдаанд оролцож, улсын аварга ч болж байлаа. Тийм ч учраас тамирчдын зовлон, жаргалыг сайн ойлгодог гэж бодож байна.

Тамирчид өөрсдөө хөдөлгөөн, эрүүл амьдралын хэв маягийг нийгэмд ойлгуулж, үлгэрлэж байдаг. Тиймээс тэднээс идэвхтэй амьдралын хэв маягийг мэдэрч, үлгэр дуурайл авч байгаасай гэж хүсээд спортын арга хэмжээнүүдийг өөрийн хэмжээнд дэмжиж ажилладаг. 

Таныг машины цуглуулгатай гэж сонссон. Хэдэн машин эзэмшдэг вэ? 

Спорт машинд их дуртай. Миний нэр дээр 6 машин байдаг. Залуучууд өөрсдийн хөдөлмөрөөрөө яаж амжилтад хүрдгийг харуулж, өөрийн хийж бүтээснээрээ бахархаад явдаг болсон байна. Худлаа хэлээгүй, хулгай хийгээгүй, өөрийн хөдөлмөрийн үр шимийг хүртэж байгаа бол хэнээс ч санаа зовохгүйгээр явах нь их хотын соёл гэж бодож байна.  

Амжилт гэдгийг хэрхэн тодорхойлох вэ? 

Амжилт гэдэг нь бизнесд амжилттай ажиллахыг хэлэхгүй. Гэр бүлдээ хэр цаг зарцуулдаг. найз нөхөдтэйгээ, эргэн тойрны хүмүүстэйгээ хэрхэн харилцдаг гэх мэт бүх харилцааг ижил тэгш авч явах нь бас нэг амжилт юм.

Бизнесийн амжилтанд хэрхэн хүрэх тухай залуучууд надаас асуудаг. Хүн эхлээд өөрийгөө олох хэрэгтэй гэж бодож байна. Юунаас сайхан зүйлийг мэдэрч амьдардаг вэ гэдгээ тодорхойлох ёстой. Хүний амьдрал хязгаартай. Тиймээс утга учиртай амьдрах л чухал учраас хүн өөрөө өөрийгөө олох нь чухал. Аз жаргал олон зүйлд оршдог шүү дээ. 

Гадны болон дотоодын олон компаниудтай хэлэлцээр хийдэг байх. Таны хувьд өөртөө илүү ашигтай, давуу байдлыг бий болгохын тулд ямар арга барил ашигладаг вэ? 

Хэлэлцээр хийхдээ зөвхөн өөрийн талаас нь харж болохгүй. Нөгөө талынхаа олж хараагүй давуу талыг гаргаж ирэх, бие биендээ байгаа нөөц бололцоог маш сайн судлах ёстой. Цаасан дээрх зүйлсдээ баригдахгүйгээр сэтгэж, бодож чадвал хэлэлцээр илүү үр дүнтэй болдог.

Жишээлбэл, бид Yoshinoya гээд Японы номер 1 франчайзыг Монголд оруулж ирсэн. Энэ франчайзыг нээх нь бидэнд өндөр ашиг гэхээс илүү хөрөнгө оруулалтын зардал их, эргэлт /feedback/ нь удаан. Гэхдээ энэ франчайз нь дэлхийд 2400 гаруй салбартай үүний 1000 нь Хятадад байна. Тэгэхээр ирээдүйд Монгол үхэр, хонины махаа гадны салбаруудад нийлүүлдэг болвол ямар вэ гэдгийг давж бодох ёстой.

Судалгаанаас харахад үл хөдлөхийн үнэ бараг 20 гаруй хувиар өслөө.  Гэвч иргэдийн худалдан авах чадвар буурч, банкны зээл хүртэл зогсонги байдалтай байна. Энэ нь борлуулагдахгүй олон байр бий болох эрсдэлтэй харагдаж байгаа. Энэ нь улс орны эдийн засагт хэрхэн нөлөөлөх бол?

Инфляци өнгөрсөн жил 20 орчим хувьтай гарсан. Энэ жил ч буурахгүй байх хандлагатай байна. Инфляц өссөнтэй холбоотойгоор ганц улирлын дотор бодлогын хүү 6-9,6 хувь болон өссөн. Банкиуд бүх мөнгөө татаад төв банк руу төлөвлөрүүлээд байна. Ингэснээр зах зээл дээр бэлэн мөнгөний хомстол бий болж байгаа.

Ковидын дараа дэлхийн эдийн засгийн сэргэлт явагдахад эрэлт эрс нэмэгдэж, түүхий эд болон бараа материалын үнэ өссөн. Манай улс барилгын материалынхаа 60 орчим хувийг импортлодог учраас барилга угсралтын өртөг 50 хувь өссөн. Түүнчлэн үл хөдлөхийн бизнес нь өнөөдөр бариад маргааш зарагддаг зүйл биш. 2-3 жил зарцуулагддаг. Тиймээс энэ хугацааны менежментийн зардал, тогтмол зардал, санхүүжилтийн зардал, банкны хүү гээд өртөг өндөр болсоор байна. 

Саяхан цементийн үнэ өслөө. Цементийн үнэ өсвөл бетоны үнэ дагаад өсдөг. Өссөн үнэ буурдаггүй. Гэтэл бид нэг тогооноос л хоол идэж байгаа. Бензины үнэ өссөн гээд материалын үнээ өсгөөд өнөө маргаашийн алдагдлаа нөхөж болох ч хэтдээ салбар уналтанд орвол яах вэ? Хэрвээ үнийн өсөлт үргэлжилсээр дефолт болж, салбар дампуурвал улсын эдийн засаг дагаад уналтад орно. Тиймээс бид нэгдэж, хамтарч ажилласнаар энэ хүндхэн цаг үеийг даван туулна.

Гэрэл гэгээтэй талаас нь харвал олон улсад эдийн засгийн сэргэлт бий болж, Монголд ч томоохон мега төслүүд хэрэгжиж байна. Ингэснээр долларын урсгал нэмэгдэж, богино хугацаанд салбар сэргэх боломжтой гэж бодож байна. Барилгын салбар нь богино хугацаанд уналтанд ордог шигээ сэргэлт авахдаа ч хурдан байдаг онцлогтой. Дэлхийн эдийн засаг аажмаар өсөж байхад Монголын эдийн засаг огцом өснө гэсэн хүлээлттэй байна. 

Барилгын салбарын хөгжлийн чиг хандлагыг хэрхэн харж байна вэ? Ногоон барилгын талаар ямар бодолтой байна? 

Ногоон барилга барих нь нийгмийн хариуцлагын асуудал. Тиймээс бидний хувьд аль болох ногоон хөгжлийг дэмжиж, тогтвортой хөгжлийн бодлогыг хэрэгжүүлж ажиллахыг хичээдэг. Ногоон барилгын хамгийн энгийн шалгуур бол EDGE. Тухайн барилгыг барихдаа эрчим хүчийг 20% хэмнэсэн байх, баригдах явцдаа байгальд орчинд ээлтэй байх гэх мэт шалгуур үзүүлэлтүүд байдаг. Одоо хэрэгжиж байгаа төслүүд дээрээ энэ шалгуурыг хангаж ажиллахыг зорьж байна. Хэрвээ манай салбарыхан ногоон барилга барьж эхэлбэл, олон улсаас арилжааны зээл биш нэмэлт хөнгөлөлттэй зээлийн эх үүсвэрүүдийг бий болгох боломж бүрдэнэ. 

Миний баримталж байгаа зарчим бол гэр хорооллын дахин төлөвлөлтөөр баригдаж байгаа орон сууцуудыг бизнес зэрэглэлийн чанартай, үнэ цэнийг бий болгох барилга байлгахыг зорьж байна. 

Жишээлбэл, манайх Яармагийн 16 га-д EDGE стандартыг хангасан, тогтвортой хөгжил рүү чиглэсэн, судалгаан дээр тулгуурласан концепц, зураг төсөлтэй, өртгийн хувьд 3 сая төгрөгийн үнэ санал болгож, ашиглалтад ороод 7 сая төгрөгийн үнэд хүрэх төслийг хэрэгжүүлж байна. Энэ нь тухайн иргэний газрыг илүү үнэ цэнтэй болгож, ашигтай байх боломжийг бий болгож байна. 

Тогтвортой хөгжлийн бодлоготой хэр уялдаж ажиллаж байна вэ? 

Манай компани “Тогтвортой хөгжлийг дэмжих хөтөлбөр”-ийн хүрээнд НҮБ рүү тайлан өгч эхэлж байгаа. Тогтвортой хөгжлийн 17 зүйлээс 9 нь барилгын салбартай шууд холбогддог. Барилгын хог хаягдал, эрчим хүчний хэмнэлт, тэгш хүртээмжтэй байдал гэх мэт. Тиймээс уг хөтөлбөрийн 4 зүйлийг сонгож, барилга болон тээврийн салбартаа хэрэгжүүлж байна.  Тэгш хүртээмжтэй байдал тэр дундаа хөгжлийн бэрхшээлтэй, тусгай хэрэгцээт хүмүүсд ээлтэй байх тал дээр онцгой анхаарч, зураг төслөөсөө эхлүүлээд суулгаж өгч байна. Бид одоо залуу байгаа ч 20, 30 жилийн өөрсдөө тусгай хэрэгцээт хүмүүс болох л болно. Тиймээс ирээдүйг бодолцож, өөриймсөг бодож төлөвлөхийг хичээж байгаа. Дэлхий нийтээрээ л ногоон хөгжил рүү явж байгаа учраас бусад компаниуд маань ч гэсэн хамт урагшлаасай гэж хүсдэг.  Энэ бол нийгмийн хариуцлага шүү дээ.  

Гэр хорооллын дахин төлөвлөлтөд хөрөнгө оруулалтын ажил чухал байгаа учраас асуудал ихтэй байна. Таны бодлоор энэ хөрөнгийг хэрхэн босгох ёстой вэ? 

Дотоодын нөөц бололцоогоор гэр хорооллын дахин төлөвлөлтийг хийх боломжгүй. Тиймээс гадны хөрөнгө оруулалтыг авах нөхцөлийг бүрдүүлэх шаардлагатай болж байна. Хэрвээ бид жилд 20 мянган айлыг орон сууцжуулаад явбал 10 жилийн дотор утаагүй болох боломжтой.  

Орон сууц барихад тулгарч байгаа эхний асуудал бол дэд бүтцийн асуудал. Тиймээс дулааны цахилгаан станц барих шаардлага тулгарч, үүнийг барихын тулд маш их хөрөнгө хэрэгтэй болж байна. Тэгэхээр бид сайн төсөл бичиж, улс үүнийг дэмжиж ажиллавал гадны томоохон сангуудаас хөрөнгө оруулалт татах боломжтой. Манай улс байршил сайтай, байгалийн баялагтай хоосон ядуу орон бол биш шүү дээ. 

Хэрвээ улс барилгын салбарыг дэмжээд хөрөнгө оруулалт авах нөхцөлийг бүрдүүлбэл дараах боломж харагдаж байна. Жишээбэл, 200 сая долларын санхүүжилт татаад 3000 айлын орон сууц барьж, үүнийгээ зээлээр зах зээлд гаргавал тэр 3000 айлын ордер нь олон улсын хувьд маш сайн зээлийн бүтээгдэхүүн болдог. Өөрөөр хэлбэл олон улсын санхүүгийн байгууллагуудын хувьд баталгаатай зээлийн багц болдог гэсэн үг. Үүгээрээ хөшүүрэгдээд ахиад 10 мянган айлын хөрөнгийг босгох боломжтой. Үүнийг UB групп ганцаараа хийх боломжгүй. Тиймээс бид хамтрах ёстой. 

Цаашдаа ямар төлөвлөгөө, зорилготой ажиллаж байгаа вэ?  

Ц.Батбаатар гэдэг хувь хүнийхээ хувьд утга учиртай, сэтгэл ханамжтай, харамсах зүйлгүй амьдрахсан гэж боддог. Хүний хэрэгцээ гэдэг хязгаарлагдмал. 10 машинтай байлаа гээд биеэ 10 хувааж суухгүй шүү дээ. Харин нийгэмд, улс эх орондоо юу хийж бүтээсэн, юу үлдээсэн бэ гэдэг хүний амьдралын утга учир санагддаг. 

Харин компанийн хувьд “Эх хүүхдийн төлөө” гэсэн уриатай ажиллаж байна. Үр хүүхэд бидний ирээдүй учраас тэд маань эрүүл нийгэмд, аюулгүй орчинд хайраар бялхаж, аз жаргалтай амьдрах ёстой. Энэ орчныг бид бүрдүүлэх үүрэгтэй учир хийж байгаа төсөл бүр дээрээ олон талыг бодолцож байна. Цаашдаа өөрийнхөө хэмжээнд нийгмийн асуудлуудыг хийж буй ажлаараа дамжуулан шийдэх, улсынхаа эдийн засагт хувь нэмрээ оруулах, тэгш хүртээмжтэй байдлыг бий болгох, нийгмийн хариуцлагатай ажиллах болно.  

2030 он гэхэд 20 мянган айлын орон сууц ашиглалтад оруулах төлөвлөгөөтэй ажиллаж байгаа. Ингэснээр нийгмийн асуудлыг шийдэх, гэр хорооллыг бууруулахад түлхүү анхаарч, хувь нэмрээ оруулна гэж бодож байна. 

“Барилга, орон сууц” 2022 үзэсгэлэнгийн ивээн тэтгэгчээр яагаад ажиллах болсон бэ? 

Барилга МН - ын 15 жилийн ой, манай компанийн тэгш ой давхцаж байна. Бид залуу хөгжиж яваа компанийнхаа хувьд салбарынхандаа дуу хоолойгоо хүргэж, нээлттэй хамтарч ажиллахыг хүсэж байна. Урьд нь бүгд өмнөх ажлаа хийдэг байсан бол одоо бид хамтарч, хамтдаа салбараа хүнд байдлаас гарган хөгжүүлэх ёстой гэдгийг энэхүү үзэсгэлэнгээрээ дамжуулан уриалмаар байна. Мөн бараа материал нийлүүлэх, хамтдаа урагш алхах түншүүд, компаниудтай танилцаж, харилцаа холбоогоо нэмэгдүүлэн дараагийн шатанд гарч ажиллахыг зорьж байна. Мөн ямар нэгэн дундын зуучгүйгээр иргэд, хэрэглэгч нартаа хөрөнгө оруулалт хийж, ашигтай худалдан авалт хийх боломжийг нээж өгөхийг зорьж үзэсгэлэнд оролцож байна. 

Цаг зав гарган бидэнтэй ярилцсан танд маш их баярлалаа.   Барилгын салбарт хийж хэрэгжүүлэхээр төлөвлөсөн олон сайхан ажлууд байгаа юм байна. Цаашдын ажилд, амьдрал нь амжилт бүтээлээр дүүрэн байхыг хүсэн ерөөе!