Хүүхдийн хүмүүжилд эцэг эх, асран хүмүүжүүлэгч нараас гадна чухал ач холбогдол үзүүлдэг зүйл бол тэдний сурч боловсрон өдрийн ихэнх цагийг өнгөрөөдөг газар болох цэцэрлэг юм. Энэхүү  орчин нь хүүхдийг уйдаадаггүй, сонирхолтой, бүтээлч, хүүхдэд шинэ зүйлсийг сургаж байх шаардлагатай. Тийм ч учраас цэцэрлэгийн интерьер нь багш нарын хичээлийн заах арга барилтай нийлээд бүтээлч байдлыг бий болгох, сурах хүсэл эрмэлзлийг төрүүлэхүйц байх ёстой юм. 

Хүүхдийн инээдээр цалгих энэхүү орчныг аль болох эерэг, сургамжтай, гэгээлэг байдлаар бий болгох нь цэцэрлэгийн үйл ажиллагаа эрхлэгчдийн хувьд багагүй сорилт болдог. Тиймээс энэ удаагийн “Интерьер” булангаараа “СаяСанаа” ХХК - ийн бүтээсэн цэцэрлэгийн интерьерийг танилцуулах гэж байна. 

Энэхүү цэцэрлэгийн интерьерийн онцлог нь хүүхдүүдийг эх орныхоо эртний түүхээр аялах, Монгол ахуйгаа таньж мэдэх, орчин үеийн сонирхолтой, сургамжтай хүүхэлдэйн кинонуудын баатруудтай хамтдаа өдөржин цагийг өнгөрөөх нөхцөлийг бүрдүүлсэн байна.

Өнгөний хувьд маш их ач холбогдол өгсөн. Учир нь тод олон төрлийн өнгө нь хүүхдийн сэтгэлзүйд маш ихээр нөлөөлдөг. Тиймээс хүүхдийн цэцэрлэгийн орчин нь энэхүү мэдрэмжийг бий болгодог учраас дотоод орчин буюу өнгө ихээхэн чухал  нөлөө үзүүлдэг байна. 

Тиймээс өнгийг таньж мэдэж буй хүүхдүүдэд өнгөний ялгааг тод харуулах, тайван, эерэг, гэгээлэг, аюулгүй орчныг бий болгож, эрүүл мэндэд хор нөлөөгүй эко модон тавилга, хүүхдийг гэмтээхгүй байх талаас нь бодолцож энэхүү интерьерийг гаргажээ.

Уг цэцэрлэгийн нэг анги нь үүдний хэсэг, урлаг танхим, бие бялдар хөгжүүлэх хэсэг, үндсэн танхим,  багш нарын болон эмчийн өрөөг шийдэж өгсөн байна. 

Үүдний хэсэг 

Өглөөг шинээр эхлүүлж буй хүүхдүүд, эцэг эхчүүдийг угтах энэхүү хэсгийг ая тухтай байхаас гадна мэдлэгийг түгээх зорилготойгоор бүтээсэн. Онгойлгоход эвтэйхэн, хүүхдийн хэмжээнд нь тохирсон хувцасны шүүгээ, сандлыг байрлуулж, эцэг эхчүүд хүүхдээ хүлээж суух хэсэг болон хүүхдүүдэд зориулсан хүлээлгийн хэсгийг мөн бий болгосон. 

Энэ хэсгийн гол онцлог бол эртний Монголын сүг зургуудаар чимэглэж, Монгол ахуйг таниулах зорилгоор монгол гэр /тооно, унь, хана гэх мэт/ авдар зэргийг байрлуулсан байна. Мөн байгаль дэлхийгээ хайрлах мэдрэмжийг бий болгохын тулд ногоон ургамлыг бүх хэсгүүдэд байрлуулж, таазны гэрлийг ч ийм маягаар тохижуулсныг дараах зургуудаас харж болно. 

Хүлээлгийн өрөөний булангийн хэсэг 

Урлаг танхим 

Хүүхдүүдэд урлагийн анхны мэдэгдэхүүн, тайзан дээр гарах анхны мэдрэмжийг өгдөг газар бол тайз. Эцэг, эхчүүддээ зориулан тайлан тоглолтоо үзүүлдэг энэхүү хэсгийг биеийн тамирын буюу бие бялдрыг хөгжүүлэх хэсэгтэй хамт байхаар төлөвлөж, илүү өргөн, чөлөөтэй орон зайг бий болгохыг зорьсон. Бялдаржуулах тоглоомын хувьд хүүхдийн гар хөлийг чангаруулж хөгжүүлэх, мөн аюулгүй байх талаас бодолцож бүтээсэн байна. 

Ариун цэврийн өрөө 

Хүүхэд санаандгүй байдлаар дотроосоо түгжих зэрэг олон эрсдэлийг гаргахгүйн тулд  00 өрөөг хаалгагүй байхаар төлөвлөж, хүүхдэд хувийн орон зайг нь мэдрүүлэхийн тулд тусгаарлах хаалтыг хийж өгсөн. Тусгаарлах хана, угаалтуурын шүүгээ гэх мэт энэхүү цэцэрлэгийн ихэнх тавилгуудыг модон материалаар хийгдсэн бүтээгдэхүүнийг сонгосноороо онцлог юм. 

Үндсэн танхим 

Хүүхдүүдийн суралцах, тоглох энэхүү танхимыг орон зайтай, аюулгүй мэдрэмжийг өгөх байдлаар шийдсэн бөгөөд олон төрлийн өнгө, хэлбэр дүрсээр дамжуулан шинэ зүйлийг мэдэж авч, тогтооход туслах юм. Жишээлбэл, хананы өнгө нь өөр өөр байна. Үүнийг ашиглан багш цэнхэр ханан дээр зургийн хичээл орно, ногоон өнгийн хананд тоглоомоо өрөөрэй гэх мэтээр таниулдаг. 

Ширээ сандлын хувьд Монголд үйлдвэрлэсэн модон тавилгыг сонгосон бөгөөд хүүхдийг гэмтээх хурц өнцөггүй, хөнгөхөн, хүүхдийн биеийн хэмжээнд тохирсон гэдгээрээ онцлог юм.