Геодези, зураг зүйн тухай хуулийн шинэчилсэн найруулгын төслийг УИХ-д өргөн барихаар шийдвэрлэлээ
Монгол Улсын Засгийн газрын 2022 оны 08 дугаар сарын 17-ны өдрийн ээлжит хуралдаанаар Геодези, зураг зүйн тухай хуулийн шинэчилсэн найруулгын төслийг хэлэлцүүлж Улсын Их Хуралд өргөн мэдүүлэхээр шийдвэрлэлээ.
Геодези, зураг зүйн тухай хууль нь 1997 онд батлагдан хэрэгжиж эхэлсэнээс хойш 11 удаа 26 хэсэг, заалтад нэмэлт, өөрчлөлт орж, 2 хэсэг, 7 заалтыг хүчингүй болсонд тооцож, 2 хэсэг шинээр нэмэгдсэн. Эдгээр нь бусад холбогдох хууль тогтоомж шинээр болон шинэчлэн батлагдсантай холбоотой бөгөөд хуулийн 30 хувьд өөрчлөлт орсон нь шинжлэх ухааны үндэслэл, тооцоотойгоор хийгддэг геодези, зураг зүйн үйл ажиллагааг хэрэгжүүлэх, тэдгээртэй холбоотой бусад салбартай харилцах зохицуулалтууд алдагдахад хүрсэн.
Шинэчлэн найруулсан Геодези, зураг зүйн тухай хуулийн төсөл хэлэлцэгдэж батлагдсанаар геодези, зураг зүйн үйл ажиллагааг нэгдсэн удирдлага, зохион байгуулалтаар явуулах, зардлын давхардал, хийдлийг арилгах, ил тод, нээлттэй, иргэн, хуулийн этгээдийн хувьд цаг хугацаа хэмнэсэн, чирэгдэлгүй, чанартай бүтээгдэхүүнээр хангах, мэргэжлийн түвшинд үйл ажиллагааг хэрэгжүүлэх нөхцөл бүрдэх юм.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.