“Контент Маркетинг” ХХК-ийн үүсгэн байгуулагч 

   Д.ГЭРЭЛТ-ОД

Барилгын материал, барилга угсралт, сантехник, цахилгаан, зураг төсөл гэх мэтийг барилгын төсөл хэрэгжүүлэгч худалдан авдаг болохоор хоёр бизнесийн хоорондох харилцаа буюу Business to Business (B2B) маркетингд илүүтэй хамааруулдаг. 

B2B маркетинг өөрийн гэсэн онцлогтой ч маркетингийн үндсэн дараах зарчмуудыг маркетинг хийхдээ санаж байх хэрэгтэй.

1. Бизнесийн зорилго бол зах зээл бий болгох. Тиймээс танай маркетингийн үйл ажиллагаа шинэ харилцагч бий болгоход туслах учиртай.

2. Хүн бүрт асуудал байдаг. Түүнийгээ шийдэхийг хүсдэг. Танай бүтээгдэхүүн үйлчилгээ хэний, ямар асуудлыг шийдэх вэ?

3. Аливаа шийдвэрийг хүн л гаргана. Хүн бол хувиа бодсон амьтан. Тэд хамгийн түрүүнд “надад ямар ашигтай вэ?” гэж боддог. 

4. Гайхамшигтай бүтээгдэхүүн өөрөө зарагддаггүй. Түүнийг гайхамшигтай болохыг ойлгох хүмүүст тэр тухай мэдээлэл, мессежийг хүргэх учиртай. 

5. Маркетингийн зардлын хэмжээ танай жилийн борлуулалтын орлогын багадаа 5%-тай тэнцүү байх учиртай. 

6. Харилцагч танай компанийн эсвэл брэндийн нэрийг огт мэддэггүй байхаас эхлээд үнэнч хэрэглэгч болох хүртэл 1) Танайхыг сонсож, таньдаг болох, 2) Танайхаас худалдан авалт хийх сонирхол, хүсэл төрөх, 3) Танай бүтээгдэхүүний талаар судалж, эргэлзээгээ тайлах, 4) Танайхаас худалдан авах, 5) Танайхыг бусдад санал болгох гэсэн замналыг туулдаг. 

МАРКЕТИНГАА АМЖИЛТТАЙ БОЛГОХ АРГУУД: 

ОЛОН ПЕРСОНА: B2B маркетингийн хувьд шийдвэр гаргах түвшний олон хүмүүс оролцдог. Тиймээс оролцогч болгонд зориулан персоно хөгжүүлж, тэдэнд тулгардаг асуудал, эмзэг цэгүүдийг бодолцон мессеж боловсруулж, суваг сонгох хэрэгтэй. Зэт, Миллениал, Икс гээд аль үеийнхэн шийдвэр гаргалтад оролцож байгааг заавал бодолцон маркетингийн ажлаа төлөвлө. 

ЗАХИРАЛ ХАМГИЙН САЙН МАРКЕТЕР: 

Маркетингийн контентууддаа захирал оролцох нь өрсөлдөгчдөөс ялгарахад, харилцагчидтайгаа холбогдоход, танигдахад илүү тустай. Захирал өөрийн гэсэн влогтой болох хэрэгтэй. 

МАРКЕТИНГ БОРЛУУЛАЛТ ХОЁРЫН ИХЭР ЮМ: 

Америкт хийсэн судалгаагаар, борлуулалтынхны 80% нь маркетингийн сэжмийг үл тоодог, борлуулалт ба маркетингийн багийн 3/2 нь хоорондоо таатай харилцаатай байдаггүй, энэ байдлаас болж бизнесүүд жилд 1 триллион долларын алдагдал хүлээдэг аж. Тиймээс, байгууллагын зохион байгуулалтаа эргэн харж, хоёр албын хамтрал, зохилдлогоог үр өгөөж өндөртэй байхаар зохицуулаарай. 

ДАТА БОЛ АЛТНЫ УУРХАЙ ЮМ: 

Бизнесийн эзний хүсэл бол яг хэрэгтэй хүнд нь мэдээллээ хүргэж, борлуулалт хийх. Хэдхэн жилийн өмнө энэ хүсэл “даварсан” мөрөөдөл гэгддэг байсан бол өнөөдөр технологийн ачаар бодит болж байна. Форрестерийн судалгаагаар, Америкт B2B худалдан авагчдын 68% нь онлайнаар бизнес хийх хүсэлтэй болсон аж. Ингэхдээ, тэд өөрсдийнхөө талаар дараа нь борлуулалтад эерэг нөлөө үзүүлэх боломжтой их хэмжээний дижитал мэдээллийг үлдээдэг болсон. Ямар түлхүүр үгэнд анхаарал хандуулж байгаа, ямар төрлийн контентыг их үзээд байна гэх мэт мэдээлэл дээр үндэслэн та дараагийн алхмаа тодорхойлох боломжтой. 

ВИДЕО МАРКЕТИНГ: 

Хүмүүс залхуу болсон. Урт юм унших дургүй. Харин видео нь бусад төрлийн контентуудаас илүү итгэл төрүүлдэг. Хүний анхаарал татахдаа ч илүү. Бизнесүүд ур чадвар, мэргэшсэн байдлаа видеогоор харуулж, харилцагч асуудлаа шийдсэн сонирхолтой түүх өгүүлж, хэрэглэгчийн сэтгэл ханамжийг бусадтай хуваалцах боломжтой. Тийм ч учраас дээр бизнесийн эзэн влогтой болохыг зөвлөсөн хэрэг. 

САЛБАРЫНХАА МЕДИА КОМПАНИ БОЛ: Шийдэхийг хүсэж буй асуудлынх нь талаар хэн их мэдээлэл, мэдлэгтэй байна түүнд итгэх итгэл илүү байдаг. Тиймээс, харилцагчаа мэдлэгжүүлсэн, тэднийг илүү ухаалаг сонголт хийж, шийдвэр гаргахад тусалсан контентуудыг тогтмол бүтээ. Ингэж бүтээхдээ, хэвлэл мэдээллийн байгууллага шиг байх хэрэгтэй. Олон төрлийн контент бүтээж, олон сувгаар түгээ. Хаанаас ч хайсан танай мэдээлэл гарч ирж байх хэрэгтэй. Ялангуяа, онлайн хайлтад олддог байх нь чухал. Вэбсайт, сошиал медиа суваг зайлшгүй байх ёстой. 

 КОНТЕНТ БОЛ ХААН: Аливаа бизнес түүний харилцагч хоёрыг холбодог зүйл бол контент байсаар ирсэн. Интернэт, сошиал медиа хөгжсөн энэ үед бүр ч илүү чухал болсон. Тиймээс, ямар асуудалтайгаа ч мэдэхгүй эсвэл түүнийгээ хэрхэн шийдэх ухаанаа олоогүй, олсон ч үйлдэл хийхгүй байгаа харилцагчдадаа зориулж сайн, чанартай контент бүтээ. 

МАРКЕТИНГИЙН АВТОМАТЖУУЛАЛТ: Шинэ харилцагчдаа яаж барьж авдаг вэ? Худалдан авагчдаа яаж бүртгэдэг вэ? И-коммерстой юу? Байгууллага дээр чинь дижитал шилжилт хийгдсэн үү? Ажилтнуудын ажил хөнгөрсөн үү? Энэ бүх асуултад шийдэл олсон байх хэрэгтэй. Учир нь дижитал бол ирээдүй.

CX БОЛ ШИНЭ МАРКЕТИНГ: CX буюу Customer Experience гэдэг нь хэрэглэгч танай компани эсвэл брэндийн талаар анх сонссон цагаас эхлэн шууд болон шууд бус байдлаар төрөл бүрийн шүргэлтийн цэг (touchpoint)-үүдээр дамжуулан бие махбодь, оюун ухаан, сэтгэл санаа, далд ухамсарт үүссэн мэдрэмжүүдийн нийлбэр юм. Товчоор хэлбэл, хэрэглэгч зөвхөн хэрэгтэй бүтээгдэхүүн үйлчилгээгээ авах үед л сэтгэл хангалуун байх хангалтгүй. Танай бүтээгдэхүүнийг хараад чат бичихэд хариу шуурхай хэрэгтэй мэдээллийн өгдөг, захиалга авдаг, хурдан хүргэлт хийдэг, худалдан авсны дараах асуудалд найрсаг хандаж, шийдэж өгдөг, дараа дахин хандахад таньдаг байх гээд бизнес харилцагчтайгаа учирч буй цэг болгон дээр тэднийг сэтгэл хангалуун байлгаж чадвал тэд танайхаас дахин худалдан авалт хийнэ. Тиймээс, энэ үед шатуудын зураглалыг гаргаж, харилцагчийг сэтгэл хангалуун байлгаж чадаж байна уу гэдэгт аудит хий.   

ХИЙМЭЛ ОЮУН УХААН: Чатботууд яг амьд хүнтэй харилцаж байгаа мэт харьцдаг болсон. Энэ бол хиймэл оюун ухааны ач. Таны бизнес таныг завгүй, эзгүй, унтаж байхад ч ажиллаж, танд орлого авч ирж байх учиртай. Дээр нь ухаалаг чатбот харилцагчийн санал гомдлыг барагдуулахад туслана, борлуулалтын ажилтны цагийг хэмнэж, илүү чухал зүйлд төвлөрөх боломж олгоно. 

AUGMENTED REALITY БУЮУ ТӨСӨӨЛЛИЙГ БОДИТООР ХАРУУЛАХ: 

Ихэнх хүн хартлаа юу хүсээд байгаагаа мэддэггүй. Харин АR хүмүүсийн төсөөллийг худалдан авалт хийж, ажил болохоос өмнө бодитоор харуулж, шийдвэр гаргахад нь тусалдаг.  

ҮЗЭСГЭЛЭН ХУДАЛДАА ХУДАЛДАН АВАХ ШИЙДВЭР ГАРГАХАД ТУСАЛНА: 

Зарим хүмүүс бүтээгдэхүүн үйлчилгээний талаар хангалттай мэдээлэл авсан хэдий ч худалдан авах шийдвэрээ гаргаж, үйлдэл хийлгүй байсаар байдаг. Энэ үед үнийн хямдрал, урамшуулал түлхэц болдог ч дандаа хийгээд байх нь зардалтай. Харилцагчдыг үйлдэл хийхэд нь нөлөөлж болох өөр нэг арга бол үзэсгэлэн худалдаа юм. Олон брэндүүд нэг дор цугладаг учраас хүмүүс биеийн амраа бодож ирэх нь элбэг. Нөгөөтээгүүр, худалдан авалтын замналын энэ үед ирсэн хүмүүс харьцангуй мэдлэгтэй болчихсон, худалдан авах брэндээ бараг л сонгоод, шигшчихсэн байдаг. Энэ үед нь тэднийг найрах боломж бол үзэсгэлэн худалдаа юм. 

ОДОО БАЙГАА ХАРИЛЦАГЧДАДАА ОНЦГОЙ ИХ АНХААРАЛ ТАВЬ: Одоо байгаа харилцагчаа халамжлах нь цоо шинэ харилцагч үүсгэхээс зардал багатайн дээр борлуулалтын орлогыг нэмэгдүүлэхэд тустай.