Цахилгаан шат, урсдаг шат бол өнөө цагт бүх хүний хэрэгцээ болсон салшгүй нэгэн орон зай билээ. Орон сууц, худалдааны төвөөр үл хязгаарлагдан, ачаа тээвэр, эмнэлэг, сургууль гээд бүх төрлийн орчинд бүх насны, хүйсийн, хөдөлгөөний бэрхшээлтэй болоод эрүүл мэндийн шалтгаантай гэх мэтчилэн хүн бүрийн цаг зав, энергийг хэмнэхэд тустай нэгэн төрлийн тээвэрлэх хэрэгсэл юм. Тиймээс манай компани ямар ч нөхцөлд хүмүүсийг лифтэнд илүү эрүүл, аюулгүй зорчуулах зарим зөвлөмжүүдийг бэлтгэн хүргэж байгаа билээ.

Бид энэ удаа урсдаг шатаар зорчихдоо өөрийн хэмжээнд төхөөрөмж аюулгүй эсэхийг хэрхэн шалгах талаар зөвлөгөөг хүргэж байна. Энэхүү үзлэг шалгалтыг хийхдээ өөрийгөө аюулгүй байлгах үүднээс үсээ боож, ороолт, зангиа, үнэт эдлэлүүдээ авч сул хувцас өмсөхгүй байхыг хичээнэ үү.

| УРСДАГ ШАТНЫ АЮУЛГҮЙ БАЙДЛЫН ТОГТМОЛ ҮЗЛЭГ ШАЛГАЛТ

1.Үзлэгийг эхлүүлэхээс өмнө төхөөрөмжийг унтрааж, хариуцсан ажилтан түлхүүрийг өөрийн биед  хадгална уу. Бүх хэсгүүд найдвартай бэхлэгдсэн эсэх, хамгаалалт болон барилгатай залгаа хэсгийн хооронд ямар ч зай завсаргүй эсэхийг шалгаарай.

2. Эхлэл, төгсгөлийн самнууд шаттайгаа жигд, зэрэгцээ байрласан эсэхийг, саманд ямар нэгэн зүйл гацсан эсэхийг шалгана. Мөн шүдний хэсгийг шалгаж дутуу хэсэг байгаа тохиолдолд төхөөрөмжийг бүрэн унтрааж хариуцсан техник үйлчилгээний албатай холбогдоно уу.

3. Урсдаг шатны бариул орох, гарах хэсэг асуудалгүй, цэвэрхэн эсэхийг шалгана уу.

4. Буух, суух хэсгийн тавцан цэвэрхэн, хуурай эсэхийг шалгах.

5. Урсдаг шатаар өгсөж уруудах явцад хажуугийн хормой, болон сойз зэргийг шалгаарай. Хажуугийн хамгаалалтын шилэнд ямар нэг хурц ирмэг, эвдрэл гэмтэл, хагархай байх ёсгүй. Мөн хажуугийн хормойд цухуйсан ирмэг, сул, дутуу хэсэг, элэгдэл, зураас байх ёсгүй тул үүнийг шалгаарай. Хэрэв байгаа бол хариуцсан үйлчилгээний албатай холбогдоно уу.

6. Урсдаг шатны төгсгөл хэсэгт байрлах аюулгүйн санамж урсдаг шат дээр байгаа эсэхийг шалгаарай. Хэрэв байхгүй бол урсдаг шатыг ашиглаж болохгүй. Учир нь аюулгүйн санамж нь олон улсад тавигддаг нэн тэргүүний шаардлага юм.

7. Хяналтын самбарыг түлхүүрээр идэвхжүүлэн төхөөрөмжийг асааж түлхүүрээ өөртөө хадгална уу. Хэвийн ажиллагааг шалгахын тулд урсдаг шатыг бүтэн хоёр тойрог ажиллуулж үзнэ үү.

8.  Бариул жигд, сайн ажиллаж байгаа эсэхийг шалгана.

9. Бүх гишгүүр цэвэр, хуурай, гэмтэлгүй, дутуу гишгүүргүй эсэхийг шалгана.

10.  Урсдаг шатны ажиллаж байх үед гацах, дуу чимээ гарах, чичрэх гэх мэт хэвийн бус зүйлс ажиглагдвал хариуцсан үйлчилгээний албатай холбогдон мэдэгдэх.

11. Төхөөрөмжийг унтраах шаардлагатай бол хоосон эсэхийг шалгаад түлхүүрээр унтраана уу. Үүгээр аюулгүй байдлын үзлэг дуусах болно.

Уншигч та урсдаг шатаар анхаарал болгоомжтой байж аюулгүй зорчоорой.

Бид дараагийн дугаарт орон сууцны цахилгаан шатаар аюулгүй зорчих зөвлөмжүүдийг хүргэх болно.

"Дельта Элеватор" ХХК