ЗТБХБЯ-ны Сургалт, Судалгаа, Хөрөнгө Оруулалт, Барилга Захиалагчийн албаны дарга Б.Чинтулга: Тогтвортой орлоготой, чанартай байшинтай, чадвартай боловсон хүчинтэй, үйлдвэртэй нь үлдээх бодлого хэрэгжүүлэх нь чухал
-    Сайн байна уу? Танд энэ өдрийн мэнд хүргэе.
УИХ-аас баталсан “Шинэ бүтээн байгуулалт” дунд хугацааны зорилтот хөтөлбөрийн талаар яриагаа эхлэх үү?
-    Шинэ бүтээн байгуулалт” дунд хугацааны зорилтот хөтөлбөр нь УИХ-ын 36 дугаар тогтоолын дагуу 2010 оны зургадугаар сарын 25-нд батлагдсан. Энэ тогтоол  бүтцийн хувьд “Хотууд”, “Шинэ Улаанбаатар-Ногоон нийслэл”, “Хөдөөгийн хөгжил”, “Орон сууц”, “100 мянган айлын орон сууц”, “Барилгын материалын үйлдвэр” зэрэг төслүүдийг нэгтгэсэн томоохон хэмжээний ажил. Төсөл  дотроо хот байгуулалт, төлөвлөлт, дэд бүтэц, орон сууцны хангамж, ажлын байр нэмэгдүүлэх боловсролыг дэмжих, Улаанбаатар хотын агаарын бохирдлыг бууруулах, хөдөөгийн хөгжил, үйлдвэржилтийг дэмжих, шилжилт хөдөлгөөнийг  сааруулах гэсэн найман чиглэлээс бүрдсэн.
Монгол улсын хэмжээнд үүсээд байгаа нийгмийн сөрөг үзэгдлүүдийг шийдэхийн тулд түүнд нөлөөлж байгаа үндсэн гол хүчин зүйлүүдийг тодорхойлж, цогц хэлбэрийн арга хэмжээ авч хэрэгжүүлснээр агаар, хөрсний бохирдол, ажилгүйдэл, ядуурал, нийгмийн хүртээмж, орон сууцны хангамж гэсэн асуудлуудыг шийдэх юм. Бид эдгээрийн гол шалтгааныг судлаад үзэхээр хот хөдөөгийн хөгжлийн ялгаанаас үүдэлтэй хөдөөнөөс хот руу шилжин ирэгсдийн тоо жил ирэх тусам өсөн нэмэгдэж, хотод хэт их хүн амын төвлөрөл үүсэж байгаа юм. Хүн амын төвлөрөл нь гэр хорооллыг замбараагүйгээр тэлэх нөхцөлийг бүрдүүлж, энэ тэлэлт нь агаар, хөрсний бохирдлыг ихээр нэмэгдүүлж байгаа юм. Мөн төрөөс үзүүлэх үйлчилгээний хүртээмж муудсан. Сургууль, цэцэрлэг, эмнэлэг, ахуйн үйлчилгээний төв, цэвэр бохир усны хангамж гээд Нийгмийн асуудал хүрэлцэхгүй байгаа юм. Нөгөө талаасаа Нийслэлийн хүн амын орон сууцны хангамжийг нэмэгдүүлж чадахгүй болсон. Тиймээс шилжилт хөдөлгөөнийг бууруулах зорилгоор хот хөдөөгийн ялгааг багасгах, хөдөөгийн хөгжлийг дэмжих, хөгжүүлэх боломжийг хайсан. Хөдөө орон нутагт буюу тухайн аймаг, сум, сууринд нь ард иргэдийг ажлын байраар хангаж, амьдрах амьдралын орчныг нь сайжруулж, нөхцлийг нь бүрдүүлэх шаардлага урган гарч байгаа юм. Мөн хот байгуулалт, бодлого төлөвлөлтийн асуудлыг шийдэх хэрэгтэй юм. Дэд бүтцийн асуудлыг буюу Нийслэлтэй холбосон авто зам барих, инженерийн шугам сүлжээг шийдэх, эх үүсвэрийг нь тавьж өгөх, мөн нийгмийн хангамжийн асуудал болох сургууль, эмнэлэг, цэцэрлэг, ногоон байгууламж, спорт цогцолбор гээд цогц орчныг бүрдүүлж өгье. Дараа нь орон сууцных нь хангамжийг шийдэж өгөх хэрэгтэй юм. Үндсэндээ хот, хөдөөгийн амьдрах орчныг нь ижил түвшинд хүргэх замаар иргэдийг тогтвортой ажлын байртай, орон сууцанд амьдрах худалдан авах боломжийг  бүрдүүлэхээр зорьж байна. Энэ асуудлыг шийдэхийн тулд орон нутагт нь ажлын байр бий болгох, үйлдвэр үйлчилгээний салбарыг хөгжүүлэх хэрэгтэй. Үүний дараагаар одоо байгаа гэр хорооллын түлшний асуудлыг зохицуулах, агаар бохирдуулагч хатуу түлшийг түлэхгүй байх арга хэмжээ авахаар тусгагдсан. Мөн хот суурин газруудын ногоон байгууламжийг нэмэгдүүлье гэдэг цогц арга хэмжээг шийдэх юм. Нийслэлийн хэмжээнд хатуу хог хаягдлыг цэвэрлэх, хур хогийг арилгах, хогийг дахин боловсруулах үйлдвэр байгуулах зэрэг ажлыг хөтөлбөрийн хүрээнд хийхээр мөн төлөвлөж байгаа. Ингэснээр Нийслэлд үүссэн хэт төвлөрлөөс үүссэн агаар, хөрсний бохирдлыг багасгах, шилжилт хөдөлгөөний зохицуулалт, эрхзүйн орчныг бүрдүүлж өгөхөөр төлөвлөж байгаа юм.
Үндсэн хуулиар иргэн бүр хүссэн газраа амьдрах эрхээ хамгаалуулсан байдаг. Гэхдээ эрхээ эдлэхийн сацуу үүргээ ухамсарладаг байх хэрэгтэй. Үүрэг нь бусдыг хохироохгүйгээр эн зэрэгцэн оршин амьдрах юм. Тэгэхээр шилжилт хөдөлгөөнийг саармагжуулахын тулд эрхзүйн орчин болон бодлогын хүрээнд зохицуулалт хийх шаардлагатай болж байгаа юм. Олон улсын жишгээс харахад Нийслэл хотдоо амьдралын түвшин өндөр байдаг учраас амьдрах чадамж өндөртэй, байнгын орлоготой, татвар хураамжуудыг төлөх чадвартай гэсэн шалгуурыг тавьдаг. Энэ туршлагыг нэвтрүүлснээр Улаанбаатарчууд гэсэн нэрийг зүүх эрх олгох юм. Уг хөтөлбөр нь энэ бүхнийг цогцоор нь агуулсан 1990-ээд оноос хойш хэрэгжүүлж байгаа хамгийн том цогц хөтөлбөр юм. Одоогоор бид хөтөлбөрийнхөө үйл ажиллагааны төлөвлөгөөг боловсруулаад Засгийн газарт өргөн барихаар ажиллаж байна.
-    Хөтөлбөрийг ерөнхийд нь хаанаас удирдан зохион байгуулж ажиллах вэ? Удирдлагын тогтолцооны хувьд?
-    Хөтөлбөрийг хэрэгжүүлэх, боловсруулах, батлуулах чиг үүрэг бүхий үндэсний хороо байгуулагдсан байгаа. Үндэсний хорооны даргаар Ерөнхий сайд ажилладаг. Хороо нь дотроо дэд хороодтой. Хот төлөвлөлт, үйлдвэржилт, шилжилт хөдөлгөөнийг сааруулах, агаарын бохирдлыг бууруулах чиглэл гээд  долоон чиглэлд хуваагдан ажиллаж байгаа. Хороод нь үйл ажиллагааны төлөвлөгөөгөө боловсруулаад хэрэгжүүлэх чиглэл, удирдамж, туслалцаа дэмжлэг өгөх үүрэгтэй ажиллаж байгаа. Эдгээр дэд хороодын ажлыг Үндэсний хороон дээр нэгтгэж асуудлаа Засгийн Газарт хүргэж байх юм.
-    Хөтөлбөр хэрэгжиж эхлэхэд эрхзүйн орчин хэр бүрдэж чадсан байгаа вэ?
-    Хөтөлбөрийг хэрэгжүүлэхэд шаардлагатай байгаа шинээр батлуулах болон одоогийн мөрдөгдөж байгаа хуульд нэмэлт өөрчлөлт оруулахаар шийдсэн 40 гаруй хуулийн жагсаалт гарсан байгаа. Энэ их багц хууль тогтоомжийг нэг дор түргэн шуурхай батлаж, шинэчлэх боломжгүй л дээ. Гэхдээ хэрэгжилтийн явцад тухай бүр шийдвэрлүүлээд явах юм. Чиглэл чиглэлээрээ хуулийн төслүүд хэлэлцэгдээд холбогдох салбарын яамдын удирдлага дор ажлын хэсгүүд байгуулагдан явж байгаа. Хөтөлбөр хэрэгжихэд эрхзүйн орчныг сайжруулах хүрээнд хийгдэх дээрх хуулийн төслүүдийг 2011 оны хаврын чуулганаар амжиж батлуулахаар УИХ-аас Засгийн газарт чиглэл өгөөд ажиллаж байна.
-    Хөтөлбөрийн хүрээнд барилгын салбарт ямар бүтээн байгуулалт хийгдэхээр төлөвлөгдсөн бэ?   - Хөтөлбөр маань Зам, тээвэр, барилга, хот байгуулалтын салбарын хэмжээнд гурван том төсөлд хуваагдаж байгаа. Үүний нэг нь барилгын салбарт буюу “100 мянган айлын орон сууц” төсөл байгаа. Энэ нь дан ганц орон сууц гэхгүйгээр нийгмийн дэд бүтэц, ногоон байгууламж, тав тухтай амьдрах орчныг нь бүрдүүлэхүйц цогц байгууламж барьж ашиглалтанд оруулах юм. Асуудлыг ингэж цогцоор нь шийдэхийн тулд мэргэжилтэй боловсон хүчнийг сургаж, бэлтгэх гэсэн нэг дэд хэсэг байгаа. Нөгөөтэйгүүр барилгын чанарын тухай яригдана. Барилгын хувьд чанартай барьж үүнийг нь бага дунд орлоготой иргэд хэрхэн өрхийн орлогод нь нөлөөлөхгүйгээр орон сууц худалдан авах боломжийг бүрдүүлэх вэ гэдгийг шийдэж өгөх хэрэгтэй юм. Хямд сууц барихад өртгийг өсгөхгүй байх нь чухал. Харин өсгөхгүй байхын тулд барилгын материалын үйлдвэрлэлийг хөгжүүлэх, өөрийн орны нөөц баялагт тулгуурлан шинээр үйлдвэр байгуулах боломжийг бий болгох юм. Ингэснээр импортоор орж ирж байгаа бараа бүтээгдэхүүнээс дор хаяж гаалийн татвар, НӨАТ, тээврийн зардлыг хямдруулах юм. Нөгөө талаас импортын бүтээгдэхүүнийг орлохуйц, дотооддоо нэмүү өртөг бий болгох замаар түүхий эдийг оруулж ирж дотооддоо эцсийн бүтээгдэхүүнийг нь гаргах юм бол материалыг өртөг буурах боломж бүрдэх юм. Нөгөө талаар ийм үйлдвэр ажлын байрыг бий болгоно. Ингэснээр тогтмол орлоготой өрхийн тоо нэмэгдэх, улмаар орон сууцаар хангагдах боломж бүрдэх юм.
Нийтдээ 75 мянган айлын орон сууцыг нийслэлд барихаар төлөвлөж байгаа. 25 мянга нь аймгийн төв, бүсийн тулгуур хөгжлийн төвүүдэд хэрэгжинэ. Сумдын хувьд эхний ээлжинд 96 суманд “Шинэ сумын төв” гэсэн төслийг хэрэгжүүлнэ. Үүнд төр захиргааны төв, ахуйн үйлчилгээний төв, ногоон байгууламж, спорт цогцолбор, өрхийн эмнэлэг сургууль цэцэрлэг гээд цогц шийдлийг хийх юм. Дараагийн ээлжинд 96 гэх мэтээр хэрэгжиж суурин газрыг бий болгох юм. Монголын нийт хүн амын 61 гаруй хувь нь Улаанбаатар хотод суурьшиж байгаа, тэдгээрийн мөн 61 хувь нь гэр хороололд амьдарч байна гэсэн судалгаа байдаг учраас “100 мянган айлын орон сууц” төслийн дийлэнх хувийг Нийслэлд хэрэгжүүлэх болсон. Улаанбаатар хотын хэмжээнд 160 гаруй мянган өрх гэр хороололд амьдардаг. Тэдний дөнгөж 75 мянгыг нь орон сууцаар хангахаар төлөвлөж байгаа юм. Аймгуудын хувьд орон сууцны эрэлт болон барих нөхцөл боломж хомс байгаа. Материаллаг бааз дутмаг, боловсон хүчин, нөгөө талаасаа худалдан авах чадвар муу байгаа. Тиймээс эхний ээлжинд орон нутагт бага хэмжээний орон сууц барихаар төлөвлөсөн. Энэ хөтөлбөрийн дараагаар дахин хөтөлбөр хэрэгжүүлэхдээ орон нутагт түлхүү буюу 75 мянга, Нийслэлдээ бага байхаар төлөвлөж байгаа юм. Орон нутагт эхний ээлжинд материал үйлдвэрлэл, боловсон хүчнээ бэлтгэсний дараагаар их хэмжээний бүтээн байгуулалтыг явуулах боломж бүрдэх юм. Нийслэлд өнөөдөр энэ боломж нь бүрдчихсэн байгаа юм. Бараа материалын үйлдвэрүүд төвлөрсөн, хувийн хэвшлийн болон төрийн олон сургалтын төвүүд мэргэжилтэн бэлтгэж байна. Мөн худалдан авах эрэлт болон боломж нь түлхүү байгаа юм.
-    Төслийн санхүүгийн орчинг хэрхэн бүрдүүлж байгаа вэ?
-    Манайд орон сууцны эрэлт жинхэнэ утгаараа байхгүй байгаа. Эрэлтийг жинхэнэ утгаар нь бий болгоход урт хугацаатай, бага хүүтэй зээл олгогдохгүй байгаа юм. Тиймээс “100 мянган айлын орон сууц” төсөл нь иргэдэд урт хугацаатай, бага хүүтэй зээлээр орон сууц олгох боломжийг бүрдүүлэх юм. Ингэхийн тулд уул уурхайн бүтээгдэхүүнийг бий болгон барьцаалах замаар иргэдэд 25-30 жилийн хугацаатай жилийн 7-8 хувийн хүүтэй орон сууцны зээлийг олгох юм бол бидний тооцоолж байгаагаар 40 м/кв талбайтай нэг өрөө байрыг нэг өрх худалдаж авахад сардаа 140-170 мянган төгрөг төлөөд явах боломж бүрдэх юм. Сарын 140-170 мянган төгрөг гэдэг маань бага дунд орлоготой иргэд, 300 мянган төгрөгийн цалинтай төрийн албан хаагчийн сарын цалингийн 40-45 хувийг орон сууцны зээлд төлөх боломжтой юм. Манайд ерөнхийдөө бага, дунд орлоготой иргэд нь сардаа  300-600 мянган төгрөгийн орлоготой гэж бүртгэгдсэн байдаг.
Нэг талаас бид чанартай барилга барина, нөгөө талаас өртгийг нь хямдруулах боломжийг хангаж өгч байгаа юм. Тэгснээр иргэд сэтгэлдээ нийцсэн орон сууцанд орох боломж бүрдэж хөтөлбөрийн үндсэн зорилгод нийцэх юм. Өмнөх “40 мянган айлын орон сууц” хөтөлбөрт орон сууцны нэг метр квадратын үнийг тогтоож гаргах нь чөлөөт зах зээлийн тогтолцооны ёс биш байсан учраас хэрэгжилтэнд нөлөөлсөн юм. Учир нь чөлөөт зах зээлийн тогтолцоогоор эрэлтэн дээр тулгуурласан нийлүүлэлт байх ёстой. Эрэлтийг үүсгээгүй байж нийлүүлэлтээ баривал эрэлт нь бүрдэхгүй. Эрэлтийг нь бий болгосноор нийлүүлэлтийг хийх хэрэгтэй юм.
-    “Орон сууцны санхүүжилтийн корпораци” гэдэг шиг тусгай төрийн өмчит байгууллагаар дамжин орон сууцны зээл олгогдох уу?
-    Энэ удаад бид ОССК-тай төстэй байгууллага байх шаардлагагүй гэж үзэж байгаа. Зээлийн асуудал Хөгжлийн банкаар дамжин хэрэгжихээр төлөвлөж байна. Хөгжлийн банкны гол чиг үүрэг нь Монгол Улсын хөгжлийг хангах, түүнийг дэмжин санхүүжүүлэх юм. Тус банк нь ашгийн төлөө бус, хөрөнгө оруулалт хийх юм. Хөгжлийн банк нь өөрийн гэсэн чиглэлтэй. Хөгжлийн банк нь өөрөө ачааллаа даах чадвартай учраас энэ банкаараа дамжуулан санхүүжилтээ гаргах нь дээр гэж үзэж байна. Энэ бүгд бол хөтөлбөрийн эхний ээлжийн төлөвлөгөөнд тусгагдсан асуудал. Хэрэгжилтийн эцсийн шийдвэрийг  Засгийн газар л батална шүү дээ.
-    Орон сууцны гүйцэтгэгчээ хэрхэн сонгон шалгаруулах вэ? Ямар шалгууртай байгаа вэ? 
Манай яамны зүгээс энэ тал дээр зах зээлийн жамаар оролцуулна гэсэн төлөвлөгөөтэй байгаа. Энэ нь төрийн оролцоо байхгүйгээр хийх юм. Төр нь урт хугацаатай орон сууцны зээлийн нөхцөлөөр хангаж өгөх юм. Барихад оролцохгүй гэсэн үг.Тухайн байршлын бүсүүдийг тодорхойлж, уг байршилд ийм хэмжээний орон сууц, ийм дэд бүтэцтэй байна гэж зааж өгнө. Сургууль цэцэрлэг гээд төрийн өөрийнх нь хэрэгжүүлэх ёстой төслүүдийг нээлттэй замаар тендер зарлан сонгон шалгаруулалт хийх юм. Дийлэнх ажлууд нь төрийн өмчийн хороотой  хамтарсан байдлаар хийгдэнэ. Манай яамны хувьд энэ тал дээр дотоодын үндэсний үйлдвэрийг түлхүү оруулах саналтай байгаа. Нийгмийн бухимдлыг бий  болгоод байгаа ажилгүйдэл, ядуурлыг шийдэх зорилгоор дотоодын болон үндэсний үйлдвэрлэлийг дэмжих тал дээр анхаарч байгаа юм. Ингэснээр дотооддоо үйлдвэр ажлын байр бий болохоос гадна валютын нөөцөө хамгаалах, мөнгөний эргэлтийг нэмэгдүүлэх, салбарыг дахин хямралд оруулахгүй байх талаас нь хөтөлбөрийг хэрэгжүүлэх юм. Тиймээс уул уурхайн бүтээгдэхүүнээрээ баталгаа гаргаад эсвэл хөрөнгийн эх үүсвэр гаргасан бол энэ эх үүсвэрээ Монгол улсын хөрсөнд буцаан шингээж мөнгөн хөрөнгийг дотооддоо яаж зөв зарцуулах, эргэлдүүлэхийг  шийдэх хэрэгтэй юм. Ингэж байж улс орны эдийн засгийн чадамж нь нэмэгддэг.  “40 мянган айлын орон сууц” хөтөлбөрийн хүрээнд манай Засгийн газрын хийж чадаагүй гол зүйл бол энэ байсан. Яагаад гэвэл бүгдийг бэлэнчлэх байдлаар хийсэн. Бэлэн материал оруулж ирж, худалдаж авсан, гадны хөрөнгө оруулалтыг ихээр татлаа. Гадны хөрөнгө оруулалт тодорхой хэмжээтэй байх ёстой. Манайх хүн ам багатай орон учраас зах зээл нь их мэдрэмтгий  байдаг. Энэ нь юун дээр илэрдэг вэ гэхээр гадаадаас импортолсон ажилчдын цалинг өгөхөд Монголын валютын нөөц өөрчлөгдөж байдаг. Валютын эх үүсвэр хаанаас бий болж байна вэ гэвэл гадаадад ажиллагсдаас, уул уурхайн бүтээгдэхүүн, дээрээс нь ноолуурын гэх мэт цөөн төрлийн экспортын орлоггос бүрддэг. Өөр манайд экспорт байхгүй учраас энэ жоохон хэсгээс орж ирж байгаа валютын нөөц маань барилгын салбарт орохоороо хятад ажилчдын цалин болон бараа материал болоод гадагшлаад байгаа юм. Ингээд жоохон валютаа гадагшлуулаад байвал хичнээн зэс импортолсон ч манайд зөвхөн байшин л үлдэж байгаа юм. Тэгэхээр тогтвортой орлоготой, чанартай байшинтай, чадвартай боловсон хүчинтэй, үйлдвэртэй нь үлдээх бодлогыг “100 мянган айлын орон сууц” төслөөр хэрэгжүүлэх явдал юм. Төсөлд үндэсний чадамж бүхий барилгын компани, үндэсний мэргэжилтэй боловсон хүчин дээрээс нь маш өндөр зэрэглэлийн барилгын лабораториуд гэсэн гурван үндсэн хүчин зүйлийг манай яамны зүгээс шаардлага болгон тавьж байгаа. Үндэсний чадамж бүхий компаниуд маань нэгдэн нийлж гадаадын хөрөнгө оруулалтаар биш, өөрсдийн хүчээр барьж байгуулахыг чухалчлах хэрэгтэй юм. Мөн бид санхүүжилтийн асуудлыг улсын төсвөөс ангид байх нөхцлийг бүрдүүлэх юм. Улсын төсөвт тогтвортой жил бүр тусган батлан хэрэгжүүлэх магадлал багатай учраас 3-6 жилийн хугацаатай хөтөлбөр, төслүүдийг улсын төсвөөр хийх хүндрэлтэй байдаг. Нэг жил нь баталчихдаг дараа жил нь төсвөөс нь багасгаж батлах магадлалтай байдаг. Тиймээс уул уурхайн бүтээгдэхүүнийг нийлүүлэх замаар хөрөнгийн эх үүсвэрийг болговол бид хэдхэн жилийн дотор олон зүйлийг иргэддээ, улс орныхоо хөгжилд бүтээх боломж бүрдэж байгаа юм.
-    Нийслэлд баригдах 75 мянган айлын орон сууцны төслийн газрыг хэрхэн шийдэж байгаа вэ?
-    Газар чөлөөлөхөд шаардлагатай хөрөнгийг хэрэгжүүлэгч тал, хөрөнгө оруулагч тал өөрөө хариуцаж ажиллахаар зохицуулагдаж байгаа. Төр бол газар чөлөөлөх ажилд шаардлагатай дэмжлэг туслалцаа, зохицуулалтыг нь хийж өгөх юм. Одоогоор зарим хувийн хэвшлийнхэн гэр хорооллын газрыг нь худалдаж аваад, чөлөөлөөд, төлөвлөлтийг нь хийгээд орон сууц бариад хэрэгжүүлээд явж байгаа жишээ байгаа. 14-р хороолол, 7-р хороолол гээд эхний ээлжийн орон сууцууд энэ жишгээр баригдаад явж байна. Энэ бол шийдэж болдог, хувийн хэвшлийнхний хийж чадах асуудал. Хамгийн гол нь чанартай, хямд орон сууцыг нийлүүлэх шаардлагатай байгаа юм. Энгийн хийцтэй, чанартай удаан эдэлгээтэй байх хэрэгтэй. Ер нь орон сууцны хувьд хоёр өрөө байрыг 60 м/кв байхад дундаж гэж үзэж байгаа юм. Хамгийн гол нь бага, дунд орлоготой иргэд рүү чиглэсэн үйл ажиллагаа л байх учиртай. 
-    Гэр хорооллыг барилгажуулахад шаардлагатай дамжин өнгөрөх орон сууцны хангамж хэр байгаа вэ?
-    Засгийн газрын зүгээс 2000 айлын дамжин өнгөрүүлэх орон сууцыг барихаар төлөвлөөд ажиллаж байгаа. Харин гүйцэтгэгч байгууллагын хувьд эхний ээлжид 4-5 айлын газрыг чөлөөлж нэг орцтой дамжин өнгөрөх сууц барих байдлаар дараа дараагийн сууцыг барьж ажиллах бүрэн боломжтой байгаа. Тийм туршлага ч байдаг. Үүнийг зарим хувийн хэвшлийн барилга угсралтын компаниуд хийгээд эхэлж байгаа.
-    Хөтөлбөрийн давуу тал юундаа оршиж байгаа вэ?
-    Энэ нь Улс орныг бүхэлд нь хамарсан том хэмжээний хөтөлбөр учраас дан ганц салбарын яам хариуцан ажиллах биш бусад салбарын чиг үүрэг бүхий тодорхой хэд хэдэн байгууллагын уялдаа холбоотой, зохион байгуулалттай, нэгдсэн хөрөнгө оруулалттайгаар хамтран ажиллах тухай яригдаж байгаа асуудал.
Хөтөлбөр нь Монгол улсад үүсээд байгаа, ажилгүйдэл, ядуурал, тогтвортой ажлын байрны дутагдал, тохирсон мэргэжилтэй боловсон хүчин бэлтгэх тогтолцоо зэргийг шийдэх зорилготой. Энэ бүтээн байгуулалт маань төр засгаас хувийн хэвшлийнхэнд үзүүлж буй томоохон дэмжлэг болно гэж үзэж байгаа. Төр зөвхөн орчныг нь бүрдүүлж өгөх. Нэг үгээр хэлвэл, төр хувийн хэвшил болон иргэдэд орчныг нь бүрдүүлж өгснөөр иргэд маань өөрсдөө их бүтээн байгуулалтыг өөрсдийн гараар бүтээх, улмаар иргэд маань мэргэжилтэй, орлоготой, тогтвортой ажлын байртай болж орон сууцанд тав тухтай амьдрах бүх талын боломж бололцоог нь олгох явдал.