Эхний ээлжинд Сүхбаатар дүүргийн 9,11 дүгээр хорооны 50 газрыг чөлөөлнө-

Нийслэлд томоохон бүтээн байгуулалтын ажил өрнөж байна. Улаанбаатарын утааг багасгаж, улмаар иргэдийнхээ амьжиргааг дээшлүүлэх үүднээс гэр хорооллыг орон сууцжуулах ажлыг эхлээд багагүй хугацаа өнгөрч байна.

Бид өмнө нь гэр хорооллыг орон сууцжуулах "Төслийн нэгж" байгуулагдан, 32-ын тойрог орчимд төвөө нээж, иргэдтэй уулзаж долдугаар хорооллын газрыг чөлөөлөх асуудлаар гэрээ байгуулах тухай өгүүлсэн билээ. Энэ удаагийн дугаартаа "Төслийн нэгж"-ийнхний байрлаж буй газраас дараах сурвалжлагыг бэлтгэлээ.

Гэр хорооллыг орон сууцжуулах "Төслийн нэгж" 32-ын тойргийн замын баруун талд, тодруулбал, шинэ замын төгсгөлийн гэрлэн дохионы хажууд төвөө нээжээ. Биднийг очиход тус төвийн үүдэнд иргэд
цугларсан байлаа.

"Төслийн нэгж"-ийнхэн дөрвөн өрөө бүхий жижигхэн саарал байшинд үйл ажиллагаагаа явуулж эхэлжээ. Үүднийхээ өрөөг хүлээлгийн өрөө болгожээ. Энд иргэд долдугаар хорооллын танилцуулгатай танилцах аж.

Харин байшингийн баруун жигүүрт байрлах өрөөнд орж төслийн зохицуулагч менежерүүдтэй уулзаж зөвлөгөө авч, санал асуулгын хуудас бөглөх юм байна.

Харин мэдээллийн өрөөнд хэвлэл мэдээллийнхнийг хүлээн авч уулзан, тохиролцоонд хүрсэн иргэдтэйгээ гэрээ байгуулахаар тохижуулсан байлаа. Өрөөнүүдийн хананд долдугаар хороололтой холбоотой зураг, хэсэгчилсэн ерөнхий төлөвлөгөөг байрлуулжээ. Хашаа байшингаа энэ төлөвлөлтөд багтсан эсэхийг мэдэхээр ирсэн хүмүүс ч цөөнгүй байсан юм.

"Төслийн нэгж"-ийнхэн тэдэнд газрын байршлыг нь зааж өгч харагдана. Эзэмшлийн хашаа, байшин нь долдугаар хороолол байгуулах төлөвлөлтөд багтсан айлууд хүлээлгийн танхимд саатаж, "Төслийн нэгж"-ийн зохицуулагч нартай уулзаж байлаа. Иргэд хүлээлгийн танхимд ирсэн дарааллаараа "Төслийн нэгж"-ийн зохицуулагч менежерүүдээс зөвлөгөө авч, санал асуулгын хуудас бөглөж байв.

Санал асуулгын хуудаст газар өмчлөгч, эзэмшигчийн мэдээлэл, ам бүлийн тоо, өрхийн орлого, газар, үл хөдлөх хөрөнгийн мэдээлэл, хашаанд амьдарч буй өрхийн тоо зэрэг мэдээлэл багтсан бөгөөд иргэд хүсэлтээ бичих хэсэг ч байх ажээ. Зарим иргэн саналын хуудастай танилцаад газар дээр нь анкетаа бөглөж байв. Харин иргэдийн дийлэнх нь санал асуулгын хуудсыг авч харьж, гэр бүлийнхэнтэйгээ зөвшилцсөний үндсэн дээр бөглөж байгаа юм байна.

Манай сурвалжлах хэсгийнхэн "Төслийн нэгж"-ийн зохицуулагч менежерүүдээс зөвлөгөө авч буй өрөөнд хэсэг зуур саатав. Зохицуулагч менежерүүд иргэдэд долдугаар хорооллын хэсэгчилсэн ерөнхий төлөвлөгөөг танилцуулж, газар чөлөөлөх хэлбэрийн талаар санал солилцох ажээ. Тодруулбал, иргэд газраа нэг, хоёр, гурван өрөөгөөр эсвэл бэлэн мөнгөөр худалдаж болох юм байна.

Мөн иргэдээс газраа чөлөөлснийхөө дараа түр орон сууцанд орох эсвэл шинэ суурьшлын бүсэд байрших сонирхлыг нь сонсч байгаа аж. Гэр хорооллыг орон сууцжуулах “Төслийн нэгж" дөрөвдүгээр сарын 18-наас үйл ажиллагаагаа эхэлсэн байна.

Өчигдөр 10.30 цагийн байдлаар энэ төвөөр 75 үйлчлүүлжээ. Тэдний 45 нь санал асуулгад хамрагджээ. Бусад нь гэр бүлийнхэнтэй зөвлөлдөхөөр саналын хуудсыг авч явсан байлаа. Иргэдийн санал асуулга бөглөснөөс үзвэл дийлэнх нь газраа байраар солих хүсэлтэй байгаа юм байна. Хэрэв тохиролцвол өнөөдөр ч хамаагүй газраа чөлөөлж өгмөөр байна гэх хүмүүс байгаа талаар төслийн зохицуулагч менежер Д.Даваадулам ярьж байв. Мөн борооны улиралтай золгохоос өмнө тавдугаар сардаа багтаад газраа чөлөөлж өгье гэх хүмүүс ч байгаа гэнэ.

Өчигдөр өглөөний байдлаар гэрээ байгуулсан хүн байхгүй байлаа. Одоогоор нэг айлын газрыг хэдээр үнэлэх нь тодорхойгүй байгаа бөгөөд иргэдийн санал асуулгад тулгуурлан гаргасан судалгаанд үндэслэж энэ үнийг тогтоох юм байна. Өөрөөр хэлбэл, "Төслийн нэгж"-ийнхэн судалгааг авч,
"Гэр хорооллыг орон сууцжуулах төслийн удирдах зөвлөл"-ийнхөн хуралдаж байж шийдэх гэнэ. Гэхдээ яг тогтсон үнэ биш ч 300 метр.кв газрыг нэг өрөө, 500 метр.кв газрыг хоёр ерөө, 700 метр.кв газрыг гурван ерөө байраар солино гэсэн яриа байгаа аж.

Долдугаар хорооллын газрыг чөлөөлөхтэй холбоотойгоор иргэдээс ирүүлж буй асуултын дийлэнх нь нэг хашаанд олуулаа амьдардаг өрхүүдийн талаар байдаг. Энэ талаар "Төслийн нэгж"-ийн зохицуулагч менежер Д.Даваадулам "Бид газар өмчлөгч, эзэмшигчтэй гэрээ байгуулсаны үндсэн дээр харилцан тохиролцоно. Харин газар эзэмшигчийн хашааг түрээслэгч болон тэдний хашаанд амьдардаг ах дүүс, хамаатан саданг нь хохироохгүйн тулд Шувуун фабрикт газар олгохоор болсон" гэлээ.

Иргэдийн зүгээс "Төслийн нэгж"-ийнхэнд "Шувуун фабрик руу нүүхээр хүүхдүүд сургууль, цэцэрлэгээсээ холдож байгаа тул шинээр баригдах орон сууцанд мөнгөө төлөөд оръё" гэсэн саналыг ирүүлж байгаа аж.

Зарим газар эзэмшигчид "Манай хашааны хэмжээ хоёр өрөөгөөр солих хэмжээнд хүрэх байх. Тиймээс хашаандаа байгаа айлдаа нэг өрөөг нь өгөөд өөрөө нэг өрөөнд нь орж болох эсэхийг лавлаж" байгаа юм байна. "Төслийн нэгж"-ийнхний зүгээс энэ асуултад одоогоор хариулах боломжгүй гэсэн юм. Учир нь иргэдийн өгч байгаа санал асуулгад үндэслэн удирдах зөвлөлийнхөн нь ярилцаж байж уг асуудлыг шийднэ гэв.

Эзэмшил газар дээрээ ямар нэгэн үйлчилгээ /дэлгүүр болон дугуй засвар ажиллуулах г.м/ эрхэлдэг хүмүүс "Төслийн нэгж"-ийнхэнтэй тохиролцон газраа чөлөөлж өгөх юм байна. Түүнээс биш эзэмшил газар дээрээ үйл ажиллагаа явуулдаг гээд газарт оруулахгүй өнгөрөх ёсгүй гэнэ.

Ийнхүү Сүхбаатар дүүргийн Долдугаар хорооллын газар чөлөөлөх ажил эхлээд нэлээн эрчимтэй өрнөж байна. Сүхбаатар дүүргийн 9,10,11,12 дугаар хорооны нутаг дэвсгэр дэх 210 га газарт 46 мянган хүн амтай Засаг захиргаа худалдаа бизнесийн төв, эмнэлэг, сургууль, цэцэрлэгт хүрээлэн бүхий 10950 айлын орон сууцны цогцолбор хороолол барих хэсэгчилсэн ерөнхий төлөвлөгөө боловсруулсан юм. Энд одоогийн байдлаар инженерийн шугам сүлжээ, барилгажилтын нийт талбайд гэр хороололд 2508 нэгж, барилгажсан хэсэгт 372 нэгж байрлаж буй бөгөөд таван үе шаттайгаар талбай чөлөөлөх ажлыг зохион байгуулах аж.

Эхний ээлжинд Сүхбаатар дүүргийн 9, 11 дүгээр хорооны 50 га газрыг чөлөөлөх юм байна. Ирэх тавдугаар сарын 15-наас нүүлгэн шилжүүлэх ажил эхлэх гэнэ.

Гэр хорооллыг орон сууцжуулах уг ажил нь Нийслэлд анх удаа хийгдэж байгаа томоохон бүтээн байгуулалт. Энэ хавийн оршин суугчдын "Төслийн нэгж"-ийнхэнтэй уулзаж байгаагаас харвал газар чөлөөлөх ажилд ямар нэгэн саад тулгарахгүй мэт санагдана. Иргэдийн “Газраа орон сууцаар солино" хэмээн төвөггүйхэн хариулж байгаагаас ингэж дүгнэж болохоор байна.