УИХ-ын чуулганы баасан гаригийн нэгдсэн хуралдаанаар Хүний хөгжил сангаас иргэдэд хишиг, хувь хүртээх ажлын явцын талаар Засгийн газраас мэдээлэл хийлээ.

Иргэдэд хишиг, хувь олгохдоо иргэний шинэчилсэн бүртгэлийн ажлыг улс орон даяар өрнүүлснээр бичиг баримтын зөрчилтэй 50 мянга гаруй иргэн зөрчлөө арилгуулжээ. Өнгөрсөн онд иргэн бүрт бэлнээр олгосон 120 мянган төгрөгийг 2617.9 мянган хүн авсан байна. Харин энэ онд олгож буй cap бүрийн 21 мянган төгрөгийг хоёр сая 396.2 мянган иргэн аваад байгаа аж. Мөн 10 сая төгрөгөөс доошгүй хэмжээгээр бөөнөөр нь 637.5 сая төгрөг олгоод байна. Цаашид ийм хэлбэрээр авах хандлага нэмэгдэхээр байгааг Засгийн газрын хэрэг эрхлэх газрын дарга Ч.Хүрэлбаатар тэмдэглэв.

Үүний зэрэгцээ бэлэн бусаар 162 мянган оюутанд сургалтын төлбөрийн 500 мянган төгрөг олгохоор төсөвлөсөн. Гэхдээ Хөдөлмөр, халамжийн үйлчилгээний газарт Сургалтын төрийн сангаар дамжуулан 140.4 мянган оюутны нэрс ирүүлснээс зөрчилгүй 124 мянган оюутны нэрийг баталгаажуулан 62 тэрбум төгрөгийн сургалтын төлбөрийг холбогдох сургуулийн дансанд шилжүүлжээ. Мөн эрүүл мэндийн даатгалын шимтгэлийн төлбөрийг бэлэн бус хэлбэрээр авахыг хүссэн 76 мянган иргэний 605.3 сая төгрөгийг Эрүүл мэндийн даатгалын санд шилжүүлсэн байна.

Мэдээлэлтэй холбогдуулан гишүүд саналаа хэлж, холбогдох сайд нараас асуулт асуусан юм.
Тухайлбал,

УИХ-ын гишүүн Ж.Сүхбаатар:
-Хүний хөгжил санд хэдий хэмжээний хөрөнгө төвлөрөөд байна вэ. Ойрын хугацаанд санхүүгийн эрсдэлийг хэрхэн харж байна вэ.

Сангийн сайд С.Баярцогт:
-Санхүүжилт төлөвлөсний дагуу явж байгаа. Ойрын саруудад хүндрэл гарахгүй. Сангийн нийт орлого 301.2 тэрбум төгрөг. Санхүүжүүлэх эх үүсвэр нь 504 тэрбум төгрөгөөр батлагдсан. Бид улирал, cap бүрээр төлөвлөн ажиллаж байна. Ер нь манай улсын төсвийн орлого 2-3 дугаар улиралд түлхүү орж ирдэг. Эхний улирлын дүнгээр ашигт малтмалын нөөц ашигласны төлбөрт 55.3 тэрбум төгрөг орж ирнэ гэж тооцсон ч 114.1 тэрбум төгрөг төвлөрсөн нь 206 хувийн биелэлттэй гэсэн үг. Гэхдээ өсөн нэмэгдэх нөөцийн төлбөрөөс 37.4 тэрбум төгрөг орж ирнэ гэж тооцсон ч 13.7 тэрбум төгрөг төвлөрч биелэлт 36.8 хувьтай байна. Тодорхой хэмжээний хөрөнгө урьдчилгаа төлбөрөөс орж ирнэ. Одоогоор "Эрдэнэс МГЛ" компаниас 25 тэрбум төгрөг аваад байна. Оюутолгой төслийн урьдчилгаа төлбөр болох 132 тэрбум төгрөг ирэх зургадугаар сарын 30-ны өдөр гэхэд орж ирнэ.

Б.Бат-Эрдэнэ:
-Хишиг, хувийг ахмадуудад бэлнээр олгох асуудал ямар шатанд яваа бол. Ер нь нийгмийн халамжийн чиглэлээр хийж байгаа ажлууд төдийлөн үр дүнгээ өгөхгүй байгааг ийн шалтгааныг тайлбарлахгүй юу.

-Нийгмийн хамгаалал, хөдөлмөрийн сайд Т.Ганди.
-Хишиг, хувь болгон тарааж байгаа өргөн хүрээтэй халамжийн бодлого нь нийгмийн халамжийн бодлогод тусгалаа олохгүй байгаа юм. Тиймээс ч Засгийн газраас Халамжийн хуулиа шинэчлэх төслийг УИХ-д өргөн барьсан Зайлшгүй халамж хүссэн иргэдэд чиглэгдсэн ажиллагааг яаралтай эхлүүлэх хэрэгтэй байна. Нөгөө талаас 21 мянган төрөгийн хуваарилалтаас үүдэн манай яам ачаалалтай ажиллаж байна 66-68 төрлийн халамжийг яам хариуцдаг. Гэтэл 21 мянган төгрөгийн хуваарилалтыг бид хийж дийлэхгүй байна. Зарим банк бидэндээ хамтарч ажиллахаас татгалзаж эхэлсэн. Тиймээс мөнгийг хадгаламж хэлбэрээр олгох боломжийн талаар Засгийн газарт танилцуулахаар төлөвлөөд байна. Хуулийн дагуу ахмад настан гэж үзэх 55 аас дээш настай эмэгтэй, 60-аас дээш насны эрэгтэй 76574 хүн бий. Тэдэнд сая тэрбум төгрөг шаардлагатай. Энэ хөрөнгийг УИХ баталвал мөнгийг олгох боломжтой.

Ц.Батбаяр: -Ухаалаг иргэний үнэмлэхтэй болох ажил ямар шатанд байна вэ. Хувь, хишгийн сая төгрөгийг орон сууц худалдан авахад урьдчилгаа төлбөр байдлаар олгох боломж хэр байна вэ.

Т.Ганди:
-Орон сууц худалдан авах иргэдэд хишиг, хувь хүртээхдээ сая төгрөгийг урьдчилгаа төлбөр хэлбэрээр санхүүжүүлэх боломжтой гэж Засгийн газар үзэж байгаа. Энэ асуудлыг энэ долоо хоногийн Засгийн газрын хуралдаанаар хэлэлцэхээр төлөвлөсөн.

Улсын бүртгэлийн ерөнхий газрын дарга Л.Мөнхбаатар:
-Энэ онд багтаан иргэдийг ухаалаг үнэмлэхтэй болгоно.